അമ്പട കേമാ വിഐ കുട്ടാ; ഇത്രയും റീചാർജ് ഓഫറുകൾ ഉണ്ടായിട്ടാണോ, ഇതാ ചില കിടിലൻ പ്ലാനുകൾ അറിയാം

രാജ്യത്തെ പ്രമുഖ ടെലികോം കമ്പനികൾ എല്ലാം തന്നെ അവരുടെ റീചാർജ് പ്ലാനുകളുടെ താരിഫ് വർധിപ്പിച്ചിരിക്കുകയാണ്. അക്കൂട്ടത്തിൽ മുൻനിര സേവന ദാതാക്കളായ വോഡഫോൺ ഐഡിയയുമുണ്ട്. വിഐയുടെ പുതിയ റീചാർജ് പ്ലാനുകൾ, പ്രതിമാസ പ്രീപെയ്‌ഡ്‌ പ്ലാനിന് 199 രൂപയിൽ തുടങ്ങി, വാർഷിക പ്ലാനിന് 3,499 രൂപ വരെയാണ് ചിലവാവുക. എന്നാൽ എയർടെൽ, ജിയോ എന്നിവ പോലെ വിഐ രാജ്യത്ത് 5ജി സേവനങ്ങൾ നൽകുന്നില്ല.

എങ്കിലും ഉപഭോക്താക്കൾക്ക് സാധ്യമായ വേഗതയിൽ ഇന്റർനെറ്റ് സേവനം നൽകാൻ വിഐ എപ്പോഴും ശ്രദ്ധിക്കാറുണ്ട്. കൂടാതെ മറ്റ് കമ്പനികളിൽ നിന്ന് വ്യത്യസ്‌തമായി വിഐയുടെ ചില പ്രത്യേക ഓഫറുകളും ഉപഭോക്താക്കൾക്കായി നൽകിയിട്ടുണ്ട്. അതിൽ അർദ്ധരാത്രിക്കും രാവിലെ 6 മണിക്കും ഇടയിൽ ഡാറ്റ റോൾഓവർ ശേഷിയും പരിധിയില്ലാത്ത ഡാറ്റയും വിഐ വാഗ്‌ദാനം ചെയ്യുന്നുണ്ട്.

300 രൂപ വരെയുള്ള വിഐ പ്ലാനുകൾ: 300 രൂപ വരെ വിലയുള്ള 28 ദിവസത്തെ വാലിഡിറ്റിയുള്ള നിരവധി പ്ലാനുകൾ കമ്പനി നൽകുന്നുണ്ട്. ഏറ്റവും താങ്ങാനാവുന്ന പ്ലാൻ 199 രൂപയിൽ ആരംഭിക്കുന്നു, അൺലിമിറ്റഡ് കോളിംഗിനൊപ്പം 28 ദിവസത്തെ വാലിഡിറ്റിയും മുഴുവൻ കാലയളവിലേക്കുമായി ആകെ 2 ജിബി 4ജി ഡാറ്റയും ഇതിൽ ലഭിക്കും. കൂടാതെ, 28 ദിവസത്തേക്ക് അൺലിമിറ്റഡ് കോളിംഗിനൊപ്പം പ്രതിദിനം 1 ജിബി 4ജി ഡാറ്റ വാഗ്‌ദാനം ചെയ്യുന്ന 299 രൂപയുടെ മറ്റൊരു പ്ലാനുമുണ്ട്.

500 രൂപ വരെ വില വരുന്ന പ്ലാനുകൾ: 349 രൂപയ്ക്ക്, അൺലിമിറ്റഡ് കോളിംഗിനൊപ്പം പ്രതിദിനം 1.5 ജിബി 4ജി ഡാറ്റയുള്ള 28 ദിവസത്തെ വാലിഡിറ്റിയുള്ള പ്രതിമാസ പ്ലാൻ വിഐ അവതരിപ്പിച്ചിട്ടുണ്ട്. അതുപോലെ തന്നെ 30 ദിവസത്തെ വാലിഡിറ്റിയുള്ള 379 രൂപ പ്ലാനിൽ പ്രതിദിനം 2 ജിബി 4 ജി ഡാറ്റ അവർ വാഗ്‌ദാനം ചെയ്യുന്നു. 449 രൂപയ്ക്ക് ഉപഭോക്താവിന് 28 ദിവസത്തേക്ക് 3 ജിബി ഡാറ്റയും അൺലിമിറ്റഡ് കോളിംഗ് ആനുകൂല്യങ്ങളും ലഭിക്കും.

1000 രൂപ വരെയുള്ള വിഐ പ്ലാനുകൾ: 509 രൂപയ്ക്ക്, 6 ജിബി 4ജി ഡാറ്റയും അൺലിമിറ്റഡ് കോളിംഗും ഉള്ള മൂന്ന് മാസത്തെ വാലിഡിറ്റിയുള്ള (84 ദിവസം) റീചാർജ് പ്ലാൻ വിഐ അവതരിപ്പിക്കുന്നു. അടുത്തതായി, 579 രൂപയുടെ ഒരു പുതിയ പ്ലാനും അവർ ചേർത്തിട്ടുണ്ട്, അത് പ്രതിദിനം 1.5 ജിബി 4ജി ഡാറ്റയുമായി രണ്ട് മാസത്തെ വാലിഡിറ്റി (56 ദിവസം) വാഗ്‌ദാനം ചെയ്യുന്നു.

കൂടാതെ 649 രൂപ പ്ലാനും രണ്ട് മാസത്തെ സാധുത വാഗ്‌ദാനം ചെയ്യുന്നു, എന്നാൽ പ്രതിദിനം 2 ജിബി 4ജി ഡാറ്റ പരിധിയാണ് ഇതിനുള്ളത്. 849 രൂപയ്ക്ക് 1.5 ജിബി 4ജി ഡാറ്റയും അൺലിമിറ്റഡ് കോളിംഗും ഉള്ള മൂന്ന് മാസത്തെ പ്ലാൻ വിഐ നമുക്ക് മുന്നിൽ വയ്ക്കുന്നു. അതുപോലെ, 84 ദിവസത്തെ വാലിഡിറ്റിയും 2 ജിബി പ്രതിദിന ഡാറ്റാ ലിമിറ്റും ഉള്ള 979 രൂപയുടെ പ്ലാനും അവർ പുതുതായി അവതരിപ്പിച്ചിട്ടുണ്ട്.

വിഐയുടെ മികച്ച വാർഷിക പ്ലാനുകൾ: വിഐയുടെ ഏറ്റവും താങ്ങാനാവുന്ന വാർഷിക പ്ലാനിന് 1999 രൂപയാണ് വില, കൂടാതെ അൺലിമിറ്റഡ് കോളിംഗിനൊപ്പം മുഴുവൻ കാലയളവിലും 24 ജിബി ഡാറ്റയും കമ്പനി വാഗ്‌ദാനം ചെയ്യുന്നു. അതുപോലെ, പ്രതിദിനം 1.5 ജിബി 4ജി ഡാറ്റയുള്ള 365 ദിവസത്തെ വാലിഡിറ്റിയുള്ള കൂടുതൽ ചെലവേറിയ 3499 രൂപയുടെ പ്ലാനും ഉപഭോക്താക്കൾക്കായി കമ്പനി ഒരുക്കിയിട്ടുണ്ട്.