ഒരു ആപ്പിൾ ഐഫോൺ വാങ്ങാൻ ആഗ്രഹിക്കാത്തവർ ആരുണ്ട്? എങ്കിൽ ഐഫോൺ 15 തന്നെയാവാം, വില?

ഇന്ത്യൻ സ്‌മാർട്ട്‌ഫോൺ വിപണിയിൽ പ്രീമിയം മോഡലുകൾക്ക് ഇപ്പോൾ വലിയ പ്രാധാന്യമുണ്ട്. ബജറ്റ് ആൻഡ്രോയിഡ് ഫോണുകളിൽ നിന്ന് കൂടുതൽ ഉപഭോക്താക്കൾ ഉയർന്ന നിലവാരമുള്ള ഉപകരണങ്ങളിലേക്ക് മാറുകയാണ് ഇതിന് കാരണം. പ്രീമിയം വിഭാഗത്തിൽ ആപ്പിൾ വിപണി വിഹിതം വർധിപ്പിക്കുന്നു. ഐഫോണുകൾ പലപ്പോഴും ആൻഡ്രോയിഡ് ഫ്ലാഗ്ഷിപ്പുകളെ വിൽപ്പനയിൽ മറികടക്കുന്നതായി ഗവേഷണങ്ങൾ വ്യക്തമാക്കുന്നു.

ഇന്ത്യൻ വിപണി "പ്രീമിയമൈസിംഗ്" ആണെന്ന് വിശകലന വിദഗ്‌ധരും പറയുന്നു. അതായത്, വിലകൂടിയ ഫോണുകൾ എൻട്രി-ലെവൽ ഉപകരണങ്ങളെക്കാൾ വേഗത്തിൽ വളരുന്നു. ഐഫോൺ 16-ന്റെ മികച്ച വിൽപ്പനയുടെ പിൻബലത്തിൽ, 2025-ഓടെ ആപ്പിളിന്റെ വിപണി വിഹിതം എണ്ണം അനുസരിച്ച് 9 ശതമാനവും മൂല്യം അനുസരിച്ച് 28 ശതമാനവും എത്തുമെന്ന് കൗണ്ടർപോയിന്റ് ഡാറ്റ സൂചിപ്പിക്കുന്നു.

ഇത്രയൊക്കെ ആണെങ്കിലും നിരവധി പുതിയ മോഡലുകൾ വിപണിയിൽ എത്തിയിട്ടും ആപ്പിൾ തങ്ങളുടെ പഴയ മോഡലുകളുടെ കാര്യത്തിൽ ഒട്ടും അലംഭാവം കാണിക്കുന്നില്ല. അതിന്റെ പ്രധാന കാരണം മികച്ച വിൽപ്പന തന്നെയാണ്. ഇന്ത്യൻ വിപണിയിൽ ആപ്പിൾ ഐഫോൺ 15യ്ക്ക് ഇപ്പോൾ മികച്ച വിലക്കുറവ് ലഭ്യമാണ്. നിങ്ങൾ അറിയേണ്ട കാര്യം എന്തെന്നാൽ ഇതൊരിക്കലും ഒരു സാധാരണ വിലക്കുറവ് അല്ലെന്നതാണ്.

ഐഫോൺ 15 ഓഫറുകൾ

പുതിയ വിലക്കിഴിവുകളോടെ ഐഫോൺ 15 ഇപ്പോൾ ഇന്ത്യയിൽ കുറഞ്ഞ വിലയിൽ ലഭ്യമാണ്. 2023-ൽ 79,900 രൂപ മാത്രമായിരുന്നെങ്കിലും, പുറത്തിറങ്ങിയ 128 ജിബി മോഡലിന് നിലവിൽ ഓൺലൈൻ റീട്ടെയിൽ സ്‌റ്റോറുകളിലെ പ്രൊമോഷണൽ ഓഫറുകളോടെ ഏകദേശം 54,000-55,000 രൂപയായി വില കുറഞ്ഞുവെന്നതാണ് കാര്യം.

ബാങ്ക് കാർഡ് ഡിസ്‌കൗണ്ടുകൾ കൂടി ചേരുമ്പോൾ ചില ഉപഭോക്താക്കൾക്ക് ഈ ഫോൺ 50,000-51,000 രൂപയ്ക്ക് സ്വന്തമാക്കാം. പഴയ സ്‌മാർട്ട്‌ഫോണുകൾക്ക് എക്സ്ചേഞ്ച് ഓഫറുകളും, വാങ്ങൽ എളുപ്പമാക്കാൻ നോ-കോസ്‌റ്റ് ഇഎംഐ സൗകര്യങ്ങളും റീട്ടെയിലർമാർ നൽകുന്നു. അതും പ്രയോജനപ്പെടുത്തിയാൽ വില കുത്തനെ കുറയ്ക്കാം.

പുതിയ സ്‌മാർട്ട്‌ഫോൺ മോഡലുകൾ വിപണിയിലെത്തുന്നതിന് മുന്നോടിയായാണ് ഇത്തരം വിലക്കിഴിവുകൾ സാധാരണയായി കാണാറുള്ളത്. പഴയ മോഡലുകളുടെ വിൽപ്പന കൂട്ടാനും നിലവിലുള്ള സ്‌റ്റോക്ക് ഒഴിവാക്കാനുമാണ് റീട്ടെയിലർമാർ ഈ സമയത്ത് കിഴിവുകൾ നൽകുന്നത്. അതുകൊണ്ട് തന്നെ പരമാവധി പ്രയോജനപ്പെടുത്തുകയാണ് നല്ലത്.

എന്തുകൊണ്ട് കൂടുതൽ ഇന്ത്യക്കാർ ഐഫോൺ തിരഞ്ഞെടുക്കുന്നു?

ഐഫോണുകൾ തിരഞ്ഞെടുക്കാൻ പല കാരണങ്ങളുമുണ്ട്. ഉയർന്ന നിലവാരമുള്ള സാംസങ്, ചൈനീസ് മോഡലുകൾക്ക് വില കൂടിയതോടെ ഐഫോണുകൾ-ആൻഡ്രോയിഡ് ഫ്ലാഗ്ഷിപ്പുകൾ തമ്മിലുള്ള വില വ്യത്യാസം കുറഞ്ഞു. സമാനമായ വിലയിൽ, നഗരങ്ങളിലെ ഉപഭോക്താക്കൾ ആപ്പിളിന്റെ ബ്രാൻഡിനും വിശ്വാസ്യതയ്ക്കും കൂടുതൽ മൂല്യം കൽപ്പിക്കുന്നു.

സാമ്പത്തിക കാര്യങ്ങളും പ്രധാനമാണ്. ഇന്ത്യയിലെ സ്‌മാട്ട്‌ഫോൺ വാങ്ങലുകളിൽ ഏകദേശം 40 ശതമാനവും പലിശരഹിത ഇഎംഐ സൗകര്യങ്ങൾ വഴിയാണെന്ന് കൗണ്ടർപോയിന്റ് കണക്കാക്കുന്നു. ആകർഷകമായ എക്‌സ്‌ചേഞ്ച്, ഉത്സവ കിഴിവുകൾ എന്നിവ ചേരുമ്പോൾ, പല ഉപഭോക്താക്കളും വിലകുറഞ്ഞ ആൻഡ്രോയിഡ് ഫ്ലാഗ്ഷിപ്പിന് പകരം ഐഫോൺ തിരഞ്ഞെടുക്കുന്നു.