ആപ്പിളിന്റെ അഡാർ മോഡൽ തന്നെ ഇത്; ഐഫോൺ 16 പ്രോ മാക്‌സ് വാങ്ങാൻ 1 ലക്ഷത്തിൽ താഴെ മതി?

ഇന്നത്തെ കാലത്ത് ചില കാരണങ്ങളാൽ ആപ്പിൾ ഫോണുകൾക്ക് വളരെയധികം ഉപഭോക്താക്കൾ കൂടുന്നു എന്നത് നിഷേധിക്കാനാവാത്ത സത്യമാണ്. ആൻഡ്രോയിഡ് പോലെയുള്ള എതിരാളികളുടെ വീഴ്‌ച്ച കാരണമല്ല ഒരിക്കലും ആപ്പിളിന് അങ്ങനെ സംഭവിച്ചത് എന്നത് നിങ്ങൾ മനസിലാക്കണം. മറിച്ച് പടിപടിയായി അവർ ഇന്ത്യൻ വിപണിയിൽ സ്വാധീനം ഉണ്ടാക്കുകയും ആളുകളെ ആകർഷിക്കുകയും ചെയ്‌തു എന്നതാണ് യഥാർത്ഥത്തിൽ നടന്നത്.

അതിന്റെ പ്രധാന കാരണം മൊബൈൽ ഫോണുകൾ എല്ലാവർക്കും ആക്‌സസ് ചെയ്യാൻ കഴിയുന്ന നിലവാരത്തിലേക്ക് എത്തി എന്നതാണ്. സകലതും ഒരു വിരൽ തുമ്പിൽ ലഭിക്കുന്ന ടെക്‌നോളജിയുടെ കാലമാണിത്. ഇന്നത്തെ കാലത്ത് ഏത് വിലയ്ക്കും നല്ല അടിപൊളി ഫീച്ചറുകൾ അടങ്ങിയ ഫോണുകൾ വാങ്ങാൻ കിട്ടും. എന്നാൽ ഫീച്ചറുകൾക്ക് മാത്രം തീരുമാനിക്കാൻ കഴിയാത്ത ചില കാര്യങ്ങളും ഇക്കാര്യത്തിലുണ്ട്.

ഐഫോൺ 16 പ്രോ മാക്‌സ്

ഫ്ലിപ്‌കാർട്ടിന്റെ വർഷാവസാന വിൽപ്പന ആപ്പിൾ ഐഫോൺ 16 പ്രോ മാക്‌സിനെ സാധാരണയായി കാണാത്ത ഒരു വിലനിലവാരത്തിൽ ചെന്ന് എത്തിച്ചിരിക്കുകയാണ്. ബാങ്ക് കിഴിവുകളും എക്‌സ്‌ചേഞ്ച് ഓഫറുകളും ഒരുമിച്ച് പ്രയോജനപ്പെടുത്തുമ്പോൾ, ഈ മുൻനിര ഫോണിന്റെ ഫലപ്രദമായ വില ഒരു ലക്ഷം രൂപയിൽ താഴെയാകും എന്നതാണ് പ്രത്യേകത. ഇത് ഇന്ത്യൻ വിപണിയിൽ ഫോണിന്റെ മൂല്യം മാറ്റിമറിക്കുന്നു.

കേവലമൊരു ആഢംബര ഉൽപ്പന്നം എന്നതിൽ നിന്ന് മാറി ഇത്, 2025-ൽ ഫോൺ അപ്‌ഗ്രേഡ് ചെയ്യാൻ ആഗ്രഹിക്കുന്നവർക്ക് പരിഗണിക്കാവുന്ന ഒന്നായി മാറിയിരിക്കുകയാണ് ആപ്പിൾ ഐഫോൺ 16 പ്രോ മാക്‌സ്. 256 ജിബി സ്‌റ്റോറേജ് ശേഷിയുള്ള ഐഫോൺ 16 പ്രോ മാക്‌സിന് 1,34,900 രൂപയാണ് പട്ടികപ്പെടുത്തിയ വില. ചില പ്രത്യേക ബാങ്ക് ക്രെഡിറ്റ് കാർഡ് ഉപയോഗിക്കുമ്പോൾ 4000 രൂപയുടെ ഫ്ലാറ്റ് കിഴിവ് തൽക്ഷണം ലഭിക്കും.

ഇതിനുപുറമെ, ഉപഭോക്താക്കൾക്ക് പഴയ ഫോൺ മാറ്റി പുതിയത് വാങ്ങുന്ന എക്സ്ചേഞ്ച് ഓഫറും തിരഞ്ഞെടുക്കാം. ഇതുവഴി 68,050 രൂപ വരെ മൂല്യം നേടാനാകും. പഴയ ഫോണിന്റെ മോഡൽ, അവസ്ഥ, ലൊക്കേഷൻ എന്നിവയെ ആശ്രയിച്ചാണ് എക്സ്ചേഞ്ച് തുക വ്യത്യാസപ്പെടുന്നത്. ഉദാഹരണമായി, ഒരു ഐഫോൺ 13 പ്രോക്ക് ഏകദേശം 30,000 രൂപ കിഴിവ് ലഭിക്കുമെന്നതാണ് കാര്യം..

ബാങ്ക് ഡിസ്‌കൗണ്ടും അതിന് പുറമെയുള്ള എക്സ്ചേഞ്ച് മൂല്യവും ഒരുമിച്ച് ചേരുമ്പോൾ, ഐഫോൺ 16 പ്രോ മാക്‌സിന്റെ അന്തിമ ഫലപ്രദമായ വില ഒരു ലക്ഷം രൂപയിൽ താഴെയാകുന്നു. ആപ്പിളിന്റെ ഉൽപ്പന്ന നിരയിൽ ഇപ്പോഴും പ്രസക്തമായി തുടരുന്ന ഒരു പ്രോ മാക്‌സ് മോഡലിന് ഇങ്ങനെയൊരു വിലനിർണ്ണയം അസാധാരണമാണ്.

ഐഫോൺ 16 പ്രോ മാക്‌സ് ഓഫറുകൾ

എ18 പ്രോ ചിപ്പ് കരുത്തുപകരുന്ന ഈ ഉപകരണം, ദൈനംദിന ഉപയോഗം മുതൽ ഗെയിമിംഗ്, എഐ ദൗത്യങ്ങൾ എന്നിവ വരെ സുഗമമാക്കുന്നു. ആപ്പിളിന്റെ വിപുലമായ സോഫ്റ്റ്‌വെയർ പിന്തുണ വർഷങ്ങളോളം മികച്ച ഉപയോഗാനുഭവം ഉറപ്പുവരുത്തുന്നു. പ്രൊമോഷൻ സാങ്കേതികവിദ്യയോടുകൂടിയ 6.9 ഇഞ്ച് സൂപ്പർ റെറ്റിന XDR OLED ഡിസ്‌പ്ലേയാണ് ഈ ഉപകരണത്തിനുള്ളത്.

120Hz റിഫ്രഷ് റേറ്റ്, എച്ച്ഡിആർ പിന്തുണ, ഓൾവേസ്-ഓൺ ഡിസ്‌പ്ലേ എന്നിവ ഇതിന്റെ സവിശേഷതകളാണ്. ടൈറ്റാനിയം ഫ്രെയിമും സിറാമിക് ഷീൽഡ് മുൻഭാഗവും ഉപകരണത്തിന് മികച്ച ഈട് നൽകുന്നു. ക്യാമറയുടെ കാര്യത്തിൽ, 48 എംപി പ്രധാന സെൻസർ, 48 എംപി അൾട്രാ-വൈഡ് ലെൻസ്, 12 എംപി 5x ടെലിഫോട്ടോ ക്യാമറ എന്നിവ ഉൾക്കൊള്ളുന്നു.

English summary

iPhone 16 Pro Max Discounts: Get This Phone From Flipkart With Price Less Than Rs 1 Lakh.