വട്ടവട കയറാൻ ഇതാണ് പറ്റിയ സമയം; കോടമഞ്ഞും തണുപ്പും അനുഭവിച്ചറിയാം, പക്ഷേ ഈ കാര്യം ശ്രദ്ധിക്കണേ...

വരാനിരിക്കുന്നത് നീണ്ട അവധിക്കാലമാണ്. വിദ്യാർത്ഥികൾക്ക് ക്രിസ്‌തുമസ്‌ അവധിയാണ് മുന്നിലുള്ളതെങ്കിൽ ജോലി ചെയ്യുന്നവരെ സംബന്ധിച്ച് ശൈത്യകാലത്തെ ഏതൊരു അവധിയും യാത്രയ്ക്ക് പറ്റിയ സമയമാണ്. ഡിസംബർ തുടങ്ങിയതോടെ പലരും യാത്രകളുടെ പ്ലാനിംഗ് തുടങ്ങിക്കാണും. കുടുംബമായും ഒറ്റയ്ക്കും സുഹൃത്തുകൾക്കും ഒപ്പം യാത്ര ചെയ്യാനായി ആഗ്രഹിക്കുന്ന ഒട്ടേറെ പേരുണ്ട് നമുക്ക് ചുറ്റും.

അങ്ങനെയുള്ളവർ കൂടുതലായും യാത്ര ചെയ്യാൻ തിരഞ്ഞെടുക്കുന്നത് സീസൺ ആരംഭിച്ചു കഴിഞ്ഞു. ഇക്കുറി കേരളത്തിൽ തന്നെ മതി യാത്ര എന്ന് ആഗ്രഹിക്കുന്നവർ ഉണ്ടെങ്കിൽ അവരെ സംബന്ധിച്ച് ഏറ്റവും മികച്ച അവസരമാണ് ഇടുക്കിയിലെ ടൂറിസം കേന്ദ്രങ്ങൾ മുന്നോട്ട് വയ്ക്കുന്നത്. അതിൽ പ്രധാനപ്പെട്ടത് എല്ലാവർക്കും അറിയാവുന്നത് പോലെ മൂന്നാർ തന്നെയാണ്. എന്നാൽ ഒരു മാറ്റം വേണമെന്ന് ചിന്തിക്കുന്നവർക്ക് പോവാൻ അനുയോജ്യം വട്ടവടയാണ്.

അടുത്തകാലത്തായി മലയാളത്തിലെ ഒട്ടുമിക്ക സിനിമകളിലും വട്ടവടയുടെ സൗന്ദര്യം ഒപ്പിയെടുക്കുന്നത് കാണാം. മലയാളികൾ മാത്രമല്ല അന്യനാടുകളിൽ നിന്ന് പോലും ഈ മലയോര ഗ്രാമത്തിലേക്ക് ധാരാളം സഞ്ചാരികൾ എത്തുന്നുണ്ട്. മനോഹരമായ ഭൂപ്രകൃതി കൊണ്ടും വൈവിധ്യമാർന്ന മറ്റ് കാഴ്‌ചകൾ കൊണ്ടും നിങ്ങളെ ഞെട്ടിക്കുന്ന ഇടമാണ് വട്ടവട.

വട്ടവട എന്ന മനോഹര ഭൂമി

ഇടുക്കിയിലെ മറ്റിടങ്ങളിൽ നിന്ന് തികച്ചും വ്യത്യസ്‌തമാണ് വട്ടവടയിലെ കാഴ്‌ചകൾ. തട്ടുതട്ടായി തിരിച്ചുള്ള കൃഷിയിടങ്ങളാൽ സമ്പന്നമാണ് തമിഴ്‌നാടിനോട് ചേർന്ന് കിടക്കുന്ന വട്ടവടയിലെ പ്രധാന കാഴ്‌ച. മൂന്നാറിൽ നിന്ന് 45 കിലോമീറ്റർ അകലെയുള്ള വട്ടവടയിൽ ഒരുപാട് വേറിട്ട കാഴ്‌ചകൾ നിങ്ങൾക്ക് കാണാനുണ്ട്. സമുദ്രനിരപ്പിൽ നിന്നും 6500 അടി ഉയരത്തിലായാണ് വട്ടവട നിലകൊള്ളുന്നത്. ആ ഉയരക്കൂടുതൽ ഇവിടുത്തെ കാലാവസ്ഥയെയും സ്വാധീനിച്ചിട്ടുണ്ട്.

ഇക്കോ ടൂറിസത്തെ പ്രോത്സാഹിപ്പിക്കുന്ന സ്ഥലമാണ് വട്ടവട. മരവീടുകളിലെ താമസം, പുൽമേടുകളിലൂടെയുള്ള നടത്തം, ട്രെക്കിംഗ് തുടങ്ങിയ സാഹസിക വിനോദങ്ങൾക്ക് ഇവിടെ അവസരമുണ്ട്. വട്ടവടയിലെ രാവിലെകളും വൈകുന്നേരങ്ങളും സവിശേഷമായ ഒരു അനുഭൂതി തന്നെ സഞ്ചാരികൾക്ക് നൽകും. ഇവിടെയുള്ള കോടമഞ്ഞും തണുപ്പുമൊക്കെ ആകർഷിക്കുന്ന പ്രധാന ഘടകങ്ങളാണ്.

ആപ്പിൾ, സ്ട്രോബറി, ഓറഞ്ച്, നെല്ലിക്ക, മറ്റ് പഴങ്ങൾ, പാഷൻ ഫ്രൂട്ട്സ് എന്നിവ വട്ടവടയിൽ കൂടുതലായി കൃഷി ചെയ്യുന്ന ഇനങ്ങളാണ്. ഇവിടേക്കുള്ള യാത്രയിൽ ഈ പഴങ്ങൾ സ്വന്തമാക്കാൻ നിങ്ങൾക്ക് അവസരം ലഭിക്കുന്നു. ഇനി ഇവിടേക്കുള്ള യാത്രയിലെ പ്രധാന അനുഭവങ്ങളിലൊന്ന് പാമ്പാടുംചോല ദേശീയോദ്യാനത്തിലൂടെയുള്ള പാതയാണ്.

വട്ടവടയിൽ ശ്രദ്ധിക്കേണ്ട കാര്യങ്ങൾ ഇവയൊക്കെ

പാമ്പാടുംചോലയിലൂടെ യാത്ര ചെയ്യണമെങ്കിൽ 6 മണിക്ക് മുൻപ് ചെക്ക് പോസ്‌റ്റിൽ എത്തേണ്ടതുണ്ട്. നിങ്ങൾ സഞ്ചരിക്കുന്ന വാഹനത്തിന്റെ നമ്പറും മറ്റ് വിവരങ്ങളും ഇവിടെ നൽകണം. അഞ്ച് കിലോ മീറ്റർ ദൂരം വനത്തിലൂടെ യാത്ര ചെയ്യേണ്ടതുണ്ട്. ഈ ഭാഗത്ത് വാഹനങ്ങൾ നിർത്താനോ വീഡിയോ പകർത്താനോ ഫോട്ടോ എടുക്കാനോ അനുവാദമില്ല. വന്യമൃഗങ്ങൾ ഇവിട സദാചുറ്റിതിരിയുന്നതാണ്. അതുകൊണ്ട് തന്നെ അധികൃതരുടെ നിർദ്ദേശങ്ങൾ അനുസരിക്കാൻ ശ്രദ്ധിക്കണം.

English summary

Explore Vattavada Idukki, This Hidden Gem In Western Ghats Will Stunns You With Its Landscape.