കന്യാകുമാരി കാണാത്തവരുണ്ടോ? ട്രെയിനിൽ ചിലവ് കുറഞ്ഞ യാത്ര മതി, വട്ടക്കോട്ടയും മാത്തൂരും ഞെട്ടിക്കും

ഇന്ത്യയുടെ തെക്കേ അറ്റത്ത് സ്ഥിതി ചെയ്യുന്ന രണ്ട് സംസ്ഥാനങ്ങളാണ് കേരളവും തമിഴ്‌നാടും. പൂർവദിക്കിൽ തമിഴ്‌നാടും, പശ്ചിമ ദിശയിൽ കേരളവും അങ്ങനെ നീണ്ടുനിവർന്ന് കിടക്കുകയാണ്. അവിടെ അങ്ങേയറ്റത്ത് ഒരു മുനമ്പ് പോലെ കിടക്കുന്ന ഒരിടമുണ്ട്. രാജ്യാതിർത്തി പറയുമ്പോൾ നാമെന്നും പറയുന്ന അതേ പേര്, കാശ്‌മീർ മുതൽ കന്യാകുമാരി വരെ. അതെ, കന്യാകുമാരി എന്ന അതിമനോഹരമായ ഇടത്തേക്കുള്ള യാത്ര എന്നും വല്ലാത്തൊരു അനുഭവം തന്നെയായിരിക്കും.

മൂന്ന് പ്രധാന കടലുകൾ- അറബിക്കടൽ, ബംഗാൾ ഉൾക്കടൽ, ഇന്ത്യൻ മഹാസമുദ്രം എന്നിവ കന്യാകുമാരിയിൽ വച്ചാണ് സംഗമിക്കുന്നത്. ഭൂമിശാസ്ത്രപരമായി അനുഗ്രഹീതമായ ഇതുപോലെയൊരു ഇടം അപൂർവമാണ്, ഈ സവിശേഷതകളാണ് കന്യാകുമാരിയെ വർഷം തോറും ഇന്ത്യയിൽ ഏറ്റവുമധികം ആളുകൾ സന്ദർശിക്കുന്ന ടൂറിസ്‌റ്റ്‌ കേന്ദ്രങ്ങളിൽ ഒന്നാക്കി മാറ്റുന്നത്.

ശ്രീകൃഷ്‌ണന്റെ സഹോദരിയായി കരുതപ്പെടുന്ന ഹിന്ദു ദേവതയായ കന്യാകുമാരി ദേവിയിൽ നിന്നാണ് സ്ഥലത്തിന് ഈ പേര് ലഭിച്ചതെന്നാണ് പറയപ്പെടുന്നത്. എന്നാൽ പിൽക്കാലത്ത് ഡച്ച് ഈസ്‌റ്റ് ഇന്ത്യാ കമ്പനി പോർച്ചുഗീസ് ഈസ്‌റ്റ് ഇൻഡീസിൽ നിന്ന് പോർച്ചുഗീസ് സിലോൺ കീഴടക്കിയപ്പോൾ, കന്യാകുമാരി എന്ന പേര് കൊമോറിൻ എന്നാക്കി ചുരുക്കിയിരുന്നു. പിന്നീട് വളരെ കാലത്തിന് ശേഷമാണ് പേര് പുനഃസ്ഥാപിച്ചത്.

തീരദേശ പ്രദേശമായതിനാൽ അവധിക്കാലം ചെലവഴിക്കാൻ അനുയോജ്യമായ മികച്ച ബീച്ചുകൾ കന്യാകുമാരിയിലുണ്ട്. കൂടാതെ കന്യാകുമാരിയുടെ സമ്പന്നമായ സാംസ്‌കാരിക പൈതൃകത്തെക്കുറിച്ച് നിങ്ങളെ ഓർമ്മിപ്പിക്കുന്ന മനോഹരമായ സ്‌മാരകങ്ങളും ഇവിടെയുണ്ട്. കൂടാതെ വിവിധ ക്ഷേത്രങ്ങൾ, പള്ളികൾ, വെള്ളച്ചാട്ടങ്ങൾ എന്നിവയുടെ എല്ലാം സംഗമം ഈ പ്രദേശത്തെ വൈവിധ്യത്തിന്റെ ഉറവിടമായ ഇടമാക്കി മാറ്റുന്നു.

പഴയ തിരുവിതാംകൂറിന്റെ ഭരണകാലത്ത് സുരക്ഷ മനസിൽ വെച്ചുകൊണ്ട് നിർമ്മിച്ച അതി ഗംഭീരമായ കോട്ടകളിൽ ഒന്നാണ് വട്ടക്കോട്ട. തിരുവിതാംകൂറിലെ അവസാനത്തെ കടൽത്തീര കോട്ടകളിൽ ഒന്നായ വട്ടക്കോട്ട അതിന്റെ രൂപഭംഗി കൊണ്ടും ചരിത്രപരമായ പ്രാധാന്യത്തിനാലും പേരുകേട്ട ഇടങ്ങളിൽ ഒന്നാണെന്ന് പ്രത്യേകം പറയേണ്ടതില്ല.

ഇതിന് പുറമെ സ്ഥിരം കാഴ്‌ചകൾ കാണാൻ ആഗ്രഹിക്കാത്തവർക്ക് മാത്തൂർ തൂക്കുപാലം മികച്ചൊരു അനുഭവം നൽകും. ജലസേചന ആവശ്യങ്ങൾക്കായി ജലം കൊണ്ടുപോകുന്നതിനുള്ള ഒരു അക്വഡക്ടായി നിർമ്മിച്ച മാത്തൂർ തൂക്കുപാലം ഏഷ്യയിലെ ഏറ്റവും ഉയരമുള്ളതും നീളമുള്ളതുമായ ഇത്തരത്തിലുള്ള nനിർമ്മിതിയാണ്. ഇവ കൂടാതെ ഗാന്ധി മണ്ഡപം, വിവേകാന്ദ സ്‌മാരകം, തിരുവള്ളുവർ പ്രതിമ എന്നിവയും ഇവിടെയുണ്ട്.

ട്രെയിൻ യാത്ര

തിരുവനന്തപുരം സെൻട്രൽ റെയിൽവേ സ്‌റ്റേഷനിൽ നിന്ന് നിരവധി ട്രെയിനുകളാണ് കന്യാകുമാരിയിലേക്ക് സർവീസ് നടത്തുന്നത്. ഏകദേശം രണ്ടര മണിക്കൂർ യാത്ര മാത്രമാണ് ട്രെയിനിൽ ഇവിടേക്കുള്ളത്. 150 മുതൽ 200 രൂപ വരെ മാത്രമായിരിക്കും ഒരാൾക്ക് ഇതിനായി ചിലവ് വരിക. അതുകൊണ്ട് തന്നെ കന്യാകുമാരി യാത്രയ്ക്ക് ഏറ്റവും അനുയോജ്യം ട്രെയിൻ തന്നെയാണ്.

English summary

Kanyakumari, Tamilnadu: Fulfill The Dream Of A Delightful Vacation In This Splendid Seaside