ഈ മലനിര ആരെയും അതിശയിപ്പിക്കും, താഴ്‌വരയിൽ പെയ്യുന്ന മഴ നനയാം; ബാണാസുര ഹിൽസ് വൈബ് അടിപൊളി

Published: Tuesday, July 2, 2024, 17:17 [IST]

വയനാട്ടിലെ ടൂറിസം കേന്ദ്രങ്ങളെ കുറിച്ച് പറഞ്ഞാലും പറഞ്ഞാലും തീരാത്ത അത്രയും വിശേഷങ്ങളുണ്ട്. ഈ മൺസൂൺ സമയത്ത് അവിടേക്ക് യാത്ര ചെയ്യാൻ തുനിയുന്ന ആരെങ്കിലും ഉണ്ടെങ്കിൽ അവർക്ക് പറ്റിയ ഒരു അടിപൊളി സ്പോട്ടിനെ കുറിച്ചാണ് ഇപ്പോൾ പറയുന്നത്. സ്ഥിരമായ കറങ്ങുന്ന സ്ഥലങ്ങൾ മടുത്തവർക്ക് പോവാൻ പറ്റിയ ഈ സ്ഥലം പക്ഷേ നിങ്ങളെ അതിശയിപ്പിക്കും എന്ന കാര്യം ഉറപ്പാണ്.

അതാണ് വയനാട്ടിലെ ബാണാസുര ഹിൽസ് നൽകുന്ന കാഴ്‌ചാനുഭവം. വയനാട്ടിൽ മികച്ച രീതിയിൽ ഒരു യൂറോപ്യൻ ശൈലിയിൽ ട്രെക്കിംഗ് ഒക്കെ നടത്താൻ കഴിയുന്ന, വിദേശരാജ്യങ്ങളിലേത് പോലെയുള്ള പുൽമേടുകളുടെ കാഴ്‌ച ഒരുക്കുന്ന ചുരുക്കം ചില ഇടങ്ങളിൽ ഒന്നാണ് ബാണാസുര ഹിൽസ് എന്ന മലനിര. മാത്രമല്ല മൺസൂൺ കാലത്ത് ഇവിടെ പെയ്യുന്ന മഴയ്ക്ക് പോലും ഒരു പ്രത്യേക ഭംഗിയാണ്.

ഇതിന്റെ താഴ്‌വരയിൽ മഴ നനഞ്ഞുകൊണ്ട് ചെലവഴിക്കാൻ കഴിഞ്ഞാൽ അത് തന്നെ വലിയ ഭാഗ്യമാണ്. സമുദ്രനിരപ്പിൽ നിന്ന് ഏകദേശം 6800 അടി ഉയരത്തിൽ സ്ഥിതി ചെയ്യുന്ന ബാണാസുര ഹിൽ പശ്ചിമ ഘട്ടത്തിലെ തന്നെ ഏറ്റവും തലക്കനമുള്ള മലനിരകളിൽ ഒന്നാണെന്ന് വേണമെങ്കിൽ പറയാം. അതൊരുപക്ഷേ നേരിട്ട് കാണുമ്പോൾ മാത്രമേ ആർക്കായാലും ബോധ്യപ്പെടുകയുള്ളൂ.

ബാണാസുരൻ എന്ന രാക്ഷസരാജാവ് ഒരിക്കൽ ശ്രീകൃഷ്‌ണനുമായി ഏറ്റുമുട്ടിയെന്നും അവരുടെ ഇതിഹാസ യുദ്ധത്തിന്റെ അനന്തരഫലമായാണ് ഈ കുന്ന് ഉണ്ടായതെന്നുമാണ് ഐതിഹ്യം. കേവലം കുന്നുകയറ്റമല്ല ബാണാസുര ഹില്ലിലേക്കുള്ള ട്രെക്കിംഗ് എന്ന് പ്രത്യേകം ഓർക്കണം. കാരണം ഇടവിട്ട പാറക്കെട്ടുകൾ, വനങ്ങൾ എന്നിങ്ങനെ പലവിധ കാഴ്‌ചകൾ നിങ്ങൾക്ക് ഈ പാതയിൽ ഉടനീളം കാണാൻ കഴിയും.

താഴെ താഴ്‌വരയിൽ നിന്ന് തുടങ്ങുന്ന ട്രെക്കിംഗ് ദൂരം പിന്നിടുന്തോറും അന്തരീക്ഷ താപനില കുറയുന്നത് നിങ്ങൾക്ക് അനുഭവിച്ചറിയാം. ഏറ്റവുമ മുകളിൽ എത്തിയാൽ കാത്തിരിക്കുന്നത് ആവട്ടെ അതിശയിപ്പിക്കുന്ന പ്രകൃതി ഭംഗിയുടെ നേർചിത്രവുമാണ്. മൂടൽമഞ്ഞിൽ പൊതിഞ്ഞ മലനിരകൾ, പച്ചപ്പ് നിറഞ്ഞ താഴ്‌വരകൾ എന്നിവ ഒരു അനുഭൂതി തന്നെ കാഴ്‌ചകാർക്ക് പകരും.

ഇവിടെ എത്തിയാൽ വിട്ട് കളയാൻ പാടില്ലാത്ത ചില കാഴ്‌ചകളുണ്ട്. ബാണാസുര സാഗർ അണക്കെട്ട് ഈ കൊടുമുടിയുടെ താഴ് ഭാഗത്താണ് സ്ഥിതി ചെയ്യുന്നത്. വയനാട്ടിലെ ഏറ്റവും കൂടുതൽ ആളുകൾ എത്തുന്ന ഇടങ്ങളിൽ ഒന്നാണ് ബാണാസുര സാഗർ അണക്കെട്ട്. മൺസൂൺ സമയത്ത്, ഈ ഡാമിന്റെ റിസർവോയറിൽ സന്ദർശകർക്ക് ചെറിയ ദ്വീപുകളും കാണാൻ കഴിയും.

ബാണാസുര സാഗർ അണക്കെട്ടിന് സമീപമാണ് വയനാട്ടിലെ മറ്റൊരു ആകർഷണമായ മീൻമുട്ടി വെള്ളച്ചാട്ടം സ്ഥിതി ചെയ്യുന്നത്. വയനാട്ടിൽ നിന്ന് 23 കിലോമീറ്റർ അകലെയാണ് ഇതിന്റെ സ്ഥാനം. മേഖലയിലെ പ്രധാന ടൂറിസം ആകർഷണങ്ങളിലൊന്നാണ് ഇതെന്ന് എടുത്ത് പറയേണ്ടതാണ്. ചെറിയ രീതിയിലുള്ള ട്രെക്കിംഗിന് ഒടുവിൽ ഈ വെള്ളച്ചാട്ടത്തിലേക്ക് എത്തുന്നു. മൺസൂണിൽ ഈ പ്രദേശത്തിന്റെ കാഴ്‌ചകൾ അതിമനോഹരമാണ്.

Published On July 2, 2024