'കല്യാണമൊക്കെ നല്ല കുടുംബിനികൾക്ക് പറഞ്ഞതാ..'; വീഡിയോയ്ക്ക് താഴെ വിമർശനം, വായ അടപ്പിച്ച് അനുമോൾ

Updated: Tuesday, November 14, 2023, 16:31 [IST]

നിലപാടുകൾ തുറന്നുപറയുന്ന താരമാണ് അനു മോൾ. ഐ ആം ധന്യ വർമ എന്ന ഷോയിലൂടെ കുടുംബ ജീവിതത്തിലേയും വിവാഹത്തിലേയും പുരുഷാധിപത്യത്തെക്കുറിച്ച് അനുമോൾ സംസാരിച്ചിരുന്നു.

ഇതിന് പിന്നാലെ അനുമോൾക്കെതിരെ രൂക്ഷ വിമർശനമാണ് ഉയർന്നത്. ഈ വീഡിയോയ്ക്ക് താഴെ അനുമോളെ വിമർശിക്കുന്ന ധാരാളം കമന്റുകൾ വന്നിരുന്നു. വ്യക്തിപരമായി വിമർശിക്കുന്ന തരത്തിലേക്ക് എത്തിയപ്പോഴാണ് താരം കമന്റുകൾക്ക് മറുപടി നൽകിയത്.

ചെറുപ്പത്തിലൊക്കെ ഒരു സ്ഥലത്ത് പോകണമെന്ന് പറഞ്ഞാൽ കല്യാണം കഴിച്ചിട്ട് ഭർത്താവ് കൊണ്ടുപോകുമെങ്കിൽ പോയ്ക്കോളൂ , ഇഷ്ടപ്പെട്ട ഒരു വസ്ത്രം ഇടണമെന്ന് പറഞ്ഞാൽ കല്യാണം കഴിഞ്ഞ് ഭർത്താവ് സമ്മതിച്ചാൽ ഇട്ടോളൂ എന്നിങ്ങനെയാണ് മറുപടി കിട്ടിയിരുന്നത്. എല്ലാം അങ്ങനെയാണ്.

പഠിക്കണം, ജോലിക്ക് പോകണം എന്ന് പറഞ്ഞാലും ഇങ്ങനെയാണ് പറയുന്നത്. ഭർത്താവാകുമ്പോൾ രണ്ട് തല്ലിയാലും കുഴപ്പമില്ല. ഇങ്ങനെയാണ് നമ്മൾ കേട്ടുവളരുന്നത്. നാട്ടിൻപുറത്ത് മാത്രമേ ഇങ്ങനെയുള്ളൂവെന്നാണ് കരുതിയിരുന്നത്. പക്ഷേ എല്ലായിടത്തും ഇതുതന്നെയാണ് സ്ഥിതി, എന്നാണ് അനുമോൾ അഭിമുഖത്തിൽ പറഞ്ഞിരുന്നത്.

ഈ വീഡിയോയ്ക്ക് താഴെയാണ് കമന്റുകൾ വന്നത്. ഭർത്താവിന്റെ ഗൃഹത്തിന് ദുഷ്പ്പേര് കേൾക്കാതെ അന്തസ്സായി ജീവിക്കണമെങ്കിൽ നല്ല കഴിവും പ്രാപ്തിയും വേണമെന്നും ഒരു കുടുംബം നല്ല രീതിയിൽ കൊണ്ടുപോകുന്നത് സ്ത്രീയുടെ കഴിവാണെന്നും ഒക്കെ ഇതിന് താഴെ കമന്റുകൾ വന്നിരുന്നു.

ഈ കമന്റിന് കുടുംബം നല്ല രീതിയിൽ കൊണ്ടുപോകുന്നത് ഒരു സ്ത്രീയുടെ മാത്രം കഴിവലല്ലെന്നും സ്ത്രീകളും പുരുഷന്മാരും കുട്ടികളും നല്ലരീതിയിൽ ആയാൾ മാത്രമേ ഒരു കുടുംബം നന്നാവൂം എന്നുമാണ് ഈ കമന്റിന് മറുപടി നൽകിയത്.

കല്യാണമൊക്കെ നല്ല കുടുംബിനികൾക്ക് പറഞ്ഞതാ, നീ അതൊന്നും നോക്കേണ്ടെന്നായിരുന്ന ഒരാൾ പറഞ്ഞത്. നല്ല കുടുംബിനിയോ അത് എന്താണ് അതൊക്കെ അളക്കാൻ ചേട്ടൻ ആരാണ് എന്നാണ് അനുമോൾ കമന്റ് ചെയ്തത്. അവസാനം നീ വീട്ടിൽ തന്നെ ഇരിക്കും എന്ന കമന്റിന് സന്തോഷമുള്ളിടത്ത് നിൽക്കുന്നത് നല്ലതല്ലേ എന്നായിരുന്നു അനു മോൾ മറുപടി നൽകിയിരിക്കുന്നത്. നിരവധി പേരാണ് അനുവിന്റെ മറുപടിയെ അഭിനന്ദിച്ച് വന്നിരിക്കുന്നത്.

ഇവൻ മേഘരൂപൻ എന്ന ചിത്രത്തിലൂടെയാണ് അനുമോൾ മലയാള സിനിമയിൽ എത്തുന്നത്. ചായില്യം, റോക്‌സ്റ്റാർ, വെടിവഴിപാട്, അകം, ഉടലാഴം, ഞാൻ, പദ്മിനി തുടങ്ങിയ ചിത്രങ്ങളിലും താരം അഭിനയിച്ചു.