ബജറ്റ് 2024: ഇത്തവണത്തെ ബജറ്റ് അവതരിപ്പിക്കുമ്പോൾ ആ അപൂർവ നേട്ടം ധനമന്ത്രി നിർമല സീതാരാമന് സ്വന്തം

2024-25 സാമ്പത്തിക വർഷത്തേക്കുള്ള ഇടക്കാല ബജറ്റ് ഫെബ്രുവരി ഒന്നിന് അവതരിപ്പിക്കാൻ കേന്ദ്ര ധനമന്ത്രി നിർമ്മല സീതാരാമൻ ഒരുങ്ങുകയാണ്. വാർഷിക സാമ്പത്തിക പ്രസ്താവനയാണ് യൂണിയൻ ബജറ്റ്. വരാനിരിക്കുന്ന സാമ്പത്തിക വർഷത്തേക്കുള്ള സർക്കാരിന്റെ നിർദ്ദിഷ്ട ചെലവുകളും വരുമാനവും ബജറ്റിൽ വ്യക്തമാക്കും.

ഫെബ്രുവരി ഒന്നിന് ബജറ്റ് അവതരിപ്പിക്കുന്നതോടെ തുടർച്ചയായി ആറ് ബജറ്റ് അവതരിപ്പിക്കുന്ന രണ്ടാമത്തെ ധനമന്ത്രി എന്ന നേട്ടം
നിർമല സീതാരാമൻ സ്വന്തം ആക്കും. മാത്രമല്ല ആറ് ബജറ്റുകൾ അവതരിപ്പിക്കുന്ന ആദ്യ ധനമന്ത്രിയുമാകും ഇവർ.

ഫെബ്രുവരി ഒന്നിന് ആറാം ബജറ്റ് അവതരിപ്പിരിപ്പിക്കുന്നതോടെ മുൻ പ്രധാനമന്ത്രി മൊറാർജി ദേശായിയുടെ റെക്കോർഡിനൊപ്പം ആണ് ധനമന്ത്രി നിർമല സീതാരാമൻ എത്തുക. മൻഹോമൻ സിം​ഗും അരുൺ ജെയ്റ്റ്ലിയും പി ചിദംബരവും യശ്വന്ത് സിൻഹയും തുടർച്ചയായി അഞ്ച് ബജറ്റുകളാണ് അവതരിപ്പിച്ചത്.

മൊറാർജി ദേശായി 1959 നും 1964 നും ഇടയിൽ അഞ്ച് വാർഷിക ബജറ്റുകളും ഒരു ഇടക്കാല ബജറ്റും അവതരിപ്പിച്ചിരുന്നു. ഫെബ്രുവരി ഒന്നിന് നിർമല സീതാരാമൻ അവതരിപ്പിക്കുന്ന 2024 - 25 ഇടക്കാല ബജറ്റ് വോട്ട് ഓൺ അക്കൗണ്ടായിരിക്കും.

ഏപ്രിൽ - മേയിലെ പൊതു തിരഞ്ഞെടുപ്പിന് ശേഷം പുതിയ സർക്കാർ അധികാരത്തിൽ വന്നതിന് ശേഷം സമ്പൂർണ ബജറ്റ് അവതരിപ്പിക്കും. ഇടക്കാല ബജറ്റ് ആയത് കൊണ്ട് തന്നെ വലിയ പ്രഖ്യാപനങ്ങൾക്ക് സാധ്യതയില്ല. എന്നിരുന്നാലും മുന്നിലുള്ള പൊതു തിരഞ്ഞെടുപ്പ് മുന്നിൽ കണ്ട് തന്നെയാവും ബജറ്റ്.

2014 ൽ മോദി സർക്കാർ അധികാരത്തിൽ വന്നതിന് ശേഷം അരുൺ ജെയ്റ്റിലി 2014 - 2015 മുതൽ 2018 - 19 വരെ തുടർച്ചയായി അഞ്ച് ബജറ്റുകൾ അവതരിപ്പിച്ചിരുന്നു. ജെയ്റ്റിലിയുടെ അനാരോ​ഗ്യം കാരണം മന്ത്രാലയത്തിന്റെ അധിക ചുമതല വഹിച്ചിരുന്ന പീയൂഷ് ​ഗോയൽ 2019 - 20 ലെ ഇക്കാല ബജറ്റ് അവതരിപ്പിച്ചിരുന്നു.

2019 ലെ പൊതു തിരഞ്ഞെടുപ്പിന് ശേഷം നിർമല സീതാരാമൻ ധന്യകാര്യ വകുപ്പിന്റെ ചുമതലയിലേക്ക് എത്തി. 1970 - 71 സാമ്പത്തിക വർഷത്തിലെ ബജറ്റ് അവതരിപ്പിച്ച ഇന്ദിരാ ​ഗാന്ധിക്ക് ശേഷം ബജറ്റ് അവതരിപ്പിക്കുന്ന രണ്ടാമത്തെ വനിതയായി നിർമലാ സീതാരാമൻ മാറി.

English summary

Budget 2024: Nirmala Sitharaman Will Become The Second FM To Present The Budget 6 Times In A Row