'മകളെ കുക്കിംഗ് പഠിപ്പിച്ചിട്ടുണ്ട്,മറ്റൊരു വീട്ടിലേക്ക് പോകേണ്ടതല്ലേ'; മുക്തയുടെ പരാമർശം,പരാതി

കൊച്ചി; ഫ്ളവേഴ്സ് ചാനലിലെ സ്റ്റാർ മാജിക് പരിപാടി
വീണ്ടും വിവാദത്തിൽ. നടി മുക്ത പങ്കെടുത്ത ഷോയാണ് ഇപ്പോൾ വിവാദമായിരിക്കുന്നത്. മകൾക്കൊപ്പമായിരുന്നു മുക്ത പരിപാടിയിൽ പങ്കെടുത്തത്. വീട്ടുവിശേഷവും കുടുംബവിശേഷവുമെല്ലാം പങ്കുവെച്ച് സംസാരിക്കവെ മുക്ത പറഞ്ഞ കാര്യങ്ങളാണ് ഇപ്പോൾ പരാതിക്ക് കാരണമായിരിക്കുന്നത്. മകളേയും ചെറിയ വീട്ടുജോലികൾ പഠിപ്പിക്കാറുണ്ടെന്നും അവളും മറ്റൊരു വീട്ടിലേക്ക് ചെന്ന് കേറേണ്ടതല്ലേയെന്നുമായിരുന്നു പരിപാടിക്കിടെ നടി ചോദിച്ചത്.

സ്റ്റാര്‍ മാജിക് 404ാം എപ്പിസോഡിൽ മുക്തയായിരുന്നു അതിഥി. പാരന്റിംഗിനെ കുറിച്ച് സംസാരിക്കവേയായിരുന്നു മുക്തയുടെ വിവാദ പരാമർശം. മകളെ അത്യാവശ്യം ക്ളീനിംഗും കുക്കിങ്ങും ഒക്കെയും പഠിപ്പിച്ചിട്ടുണ്ട് എന്നായിരുന്നു താരം പറഞ്ഞത്. അപ്പോൾ ബാല വേല ആണല്ലേയെന്ന് ഷോയിലെ മറ്റൊരു താരം ചോദിച്ചപ്പോൾ പെൺകുട്ടികൾ ഒക്കെയും ചെയ്തു പഠിക്കണം എന്നായിരുന്നു മുക്ത നൽകിയ മറുപടി.

കല്യാണം കഴിക്കുന്നത് വരെയെ ആർട്ടിസ്റ്റ് ഒക്കെ ഉള്ളു അത് കഴിഞ്ഞാൽ നമ്മൾ വീട്ടമ്മയായി. അപ്പോൾ നമ്മൾ ജോലി ചെയ്തു തന്നെ പഠിക്കണം. ഇവളും വേറെ വീട്ടിൽ ചെന്ന് കയറാൻ ഉള്ളതല്ലേ,എന്നും മുക്ത പറഞ്ഞിരുന്നു. അതേസമയം മുക്തയുടെ പ്രതികരണത്തിനെതിരെ സോഷ്യൽ മീഡിയയിൽ വലിയ പ്രതിഷേധമാണ് ഉയരുന്നത്.

പരിപാടി സ്ത്ര വിരുദ്ധവും ഗുതുതരമായ ബാലവകാശ നിഷേധവും ആണെന്ന് ചൂണ്ടിക്കാട്ടി അഡ്വ. ഷഹീന്റെ നേതൃത്വത്തില്‍ എഴുത്തുകാരിയായ തനുജ ഭട്ടതിരി, അഡ്വക്കേറ്റ് കുക്കു ദേവകി, സുജാത വര്‍മ്മ തുടങ്ങിയവർ ബാലാവകാശ കമ്മീഷനും വനിതാ കമ്മീഷനും തുറന്ന കത്തയച്ചു. കത്തിലെ ഉള്ളടക്കം ഇങ്ങനെ-
ബഹുമാനപ്പെട്ട വനിതാ കമ്മീഷനും ബാലാവകാശ കമ്മീഷനും വാർത്താ വിതരണ വകുപ്പിനും ഒരു തുറന്ന കത്ത്.
ഇതിൽ താഴെ കൊടുത്തിട്ടുള്ള യു ട്യൂബ് ലിങ്ക് ഫ്ലവേർഴ്സ് ചാനലിൽ പ്രക്ഷേപണം ചെയ്യുന്ന സ്റ്റാർ മാജിക്ക് എന്ന ഒരു പരിപാടിയുടെതാണ്
പ്രസ്തുത പരിപാടിയിൽ ഒരു ചെറിയ പെൺകുട്ടിയുടെ സാനിദ്ധ്യത്തിൽ അവളുടെ അമ്മ അവളെക്കൊണ്ട് ചെയ്യിപ്പിക്കുന്ന ചില കാര്യങ്ങൾ പറയുന്നുണ്ട്.

ആ പെൺകുട്ടിയെ വീട്ടു ജോലികളായ ക്ലിനിങ്ങ് കുക്കിംങ്ങ് തുടങ്ങിയ ജോലികൾ ചെയ്യിപ്പിക്കുമെന്നും അത് പെൺകുട്ടിയായതിനാലും മറ്റൊരു വീട്ടിൽ കയറിച്ചെല്ലേണ്ടതിനാലെന്നുമാണ് പറയുന്നത്.
ലക്ഷക്കണക്കിനാളുകൾ കാണുന്ന ഒരു പരിപാടിയിലാണ് തികച്ചും ബാലവിരുദ്ധവും സ്ത്രീ വിരുദ്ധവുമായ ഉള്ളടക്കമടങ്ങുന്ന ഭാഗം തനിക്ക് ചുറ്റും എന്താണ് നടക്കുന്നതെന്നറിയാൻ പോലും ശേഷിയില്ലാത്ത ഒരു ബാലികയെയും ഉൾപ്പെടുത്തികൊണ്ട് പ്രക്ഷേപണം ചെയ്തിരിക്കുന്നതും യുട്യൂബിൽ അപ്ലോഡ് ചെയ്തിരിക്കുന്നതും.

സാമൂഹികമായി പിന്നോക്കം നിൽക്കുന്ന സ്ത്രീ സമൂഹത്തിന്റെ സാമൂഹികവും വിദ്യാഭ്യാസപരവുമായ മുന്നേറ്റത്തിനും , അവരെ സമൂഹത്തിന്റെ മുഖ്യധാരയിലേക്ക് കൈപിടിച്ചുയർത്താനും നമ്മുടെ വാർഷിക ബജറ്റുകളിൽ കോടിക്കണക്കിന് തുക വിലയിരുത്തി പ്രത്യേക പരിപാടികൾ ആസൂത്രണം ചെയ്ത് നടത്തി വരവെയാണ് അതിനെയെല്ലാം തുരങ്കം വെക്കുന്ന രീതിയിൽ സമൂഹത്തിൽ തെറ്റായ സന്ദേശം പ്രചരിപ്പിക്കുന്ന ഇത്തരം പരിപാടികൾ പ്രക്ഷേപണം ചെയ്യുന്നത്.

പെൺകുട്ടികൾ വിദ്യാഭ്യാസം ചെയ്തിട്ടും കാര്യമില്ലെന്നും അവൾ മറ്റൊരു വീട്ടിൽ പോയി വീട്ടുവേല ചെയ്യേണ്ടവളാണെന്നുമുള്ള പരിപാടിയുടെ ഉള്ളടക്കം ഗുതുതരമായ ബാലവകാശ നിഷേധവും സ്ത്രീ വിരുദ്ധവും സ്ത്രീകളെ സാമൂഹികമായി അപമാനിക്കുന്നതുമാണ്.
ആയതിനാൽ പ്രസ്തുത കാര്യത്തിൽ വേണ്ട അന്വേഷണം നടത്തി ഇത്തരം പരിപാടികൾ പ്രക്ഷേപണം ചെയ്യുന്നത് തടയാനും നിലവിൽ യുട്യൂബ് വഴി പ്രചരിപ്പിക്കുന്ന പരിപാടി പിൻവലിക്കുന്നതിനും വേണ്ട നടപടികൾ കൈക്കൊള്ളണമെന്ന് വിനീതമായി അപേക്ഷിക്കുന്നു,കത്തിൽ പറയുന്നു.

എഴുത്തുകാരി തനൂജ ഭട്ടത്തിരിപാട് മറ്റൊരു കുറിപ്പ് പങ്കുവെച്ചിട്ടുണ്ട്. തനൂജയുടെ വാക്കുകൾ -സമൂഹത്തിലെ ഓരോ ഘടകങ്ങളും ഉത്തരവാദിത്തോടെ കലയേയും ജീവിതത്തെയും കാണണം.
പലപ്പോളും,പണ്ട് മുതലേ കേൾക്കുന്ന പല കാര്യങ്ങളും, പലരും, വീണ്ടും അതുപോലെ ആവർത്തിക്കാറുണ്ട്. അത്തരത്തിലൊന്നാണ്,പെൺകുട്ടികളെ വളർത്തുമ്പോളുള്ള ചട്ടക്കൂടുകൾ..!
ഇന്ന് കാലം മാറി... അല്ലെങ്കിൽ മാറിക്കൊണ്ടിരിക്കുന്നു.

ഇത്തരം കമെന്റുകൾ അപ്പോളപ്പോൾ തിരുത്തപ്പെടണം.ചാനലുകളിലൊക്കെ, സ്ത്രീ- ശിശു-ഇതര ലിംഗ വിഷയത്തിലെ ഇത്തരം തരം താഴ്ത്തലുകൾ ഇല്ല എന്നുറപ്പിക്കാൻ,പ്രത്യേക കമ്മിറ്റികൾ വെക്കുകയോ, ആദ്യം നൽകുന്ന അനുമതി പത്രത്തിൽ, ഇതുൾപ്പെട്ട മാർഗ്ഗനിർദേശങ്ങൾ എഴുതികൊടുക്കുകയോ വേണം..!ഒരു പെൺകുട്ടിയെയും, മറ്റൊരു വീട്ടിൽ ജീവിക്കാനായി മാത്രം ഇവിടെ ഒരു വീടുകളിലും വളർത്തരുത്.!അമ്മമാരെ തിരുത്താൻ മക്കൾ തയ്യാറാകണം!ശക്തരാകണം, അവർ കുറിച്ചു.

English summary

Muktha George Comments About Daughter In Starmagic Goes Viral, Here's How Netizens Reacted