അമിതവണ്ണം: ഇന്ത്യയെ കാത്തിരിക്കുന്ന 'മഹാമാരി', ഗുരുതര ആരോഗ്യ പ്രശ്നങ്ങൾ
സ്വന്തം ശരീരം എങ്ങനെ വേണം എന്നുളളത് വ്യക്തിപരമായ തീരുമാനമാണ്. എന്നിരിക്കിലും ശരീരത്തിന്റെ അമിതവണ്ണം ചില ആരോഗ്യപ്രശ്നങ്ങളും സൃഷ്ടിക്കുന്നതാണ്. കിംസ് ഹെൽത്ത് ആശുപത്രിയിലെ ഡോ. ഷാഫി അലി ഖാൻ വിശദീകരിക്കുന്നു ഇതേക്കുറിച്ച്..
ലോകാരോഗ്യ സംഘടനയുടെ നിർവചനം അനുസരിച്ച് ബോഡി മാസ് ഇൻഡക്സ് 30ന് മുകളിലാണെങ്കിൽ അത് അമിതവണ്ണമാണ്. ഒരു കാലത്ത് പാശ്ചാത്യർക്കിടയിലാണ് ഇതൊരു പ്രശ്നമായി കണക്കാക്കിയിരുന്നതെങ്കിൽ ഇന്ന് ഇന്ത്യയിലും അമിതവണ്ണമൊരു ഗുരുതര ആരോഗ്യ പ്രശ്നമായി മാറുകയാണ്. ഏറ്റവും പുതിയ കണക്കുകൾ പ്രകാരം കഴിഞ്ഞ ദശകത്തെ അപേക്ഷിച്ച് കോവിഡിന് ശേഷം രാജ്യത്ത് അമിതവണ്ണമുള്ളവരുടെ എണ്ണം ഗണ്യമായി വർധിക്കുകയാണ്.
ഇന്ത്യയിൽ പുരുഷന്മാരേക്കാൾ സ്ത്രീകളിലാണ് അമിതവണ്ണമുള്ളവരുടെ നിരക്ക് കൂടുതലെന്ന് പഠനങ്ങൾ വ്യക്തമാക്കുന്നു. സ്ത്രീകൾക്കിടയിൽ ഏകദേശം 20 ശതമാനമാളുകളിലാണ് അമിതവണ്ണമുള്ളത്, അതേസമയം പുരുഷന്മാരിൽ ഇത് 18 ശതമാനമാണ്. എന്നിരുന്നാലും, വ്യത്യാസം പ്രാധാന്യമർഹിക്കുന്നില്ല, അമിതവണ്ണവുമായി ബന്ധപ്പെട്ട് സ്ത്രീകളിലും പുരുഷന്മാരിലും ഗുരുതര ആരോഗ്യപ്രശ്നങ്ങൾ ഉണ്ടാകാനുള്ള സാധ്യതയുണ്ട്. കുട്ടികളിലും അമിതവണ്ണം ഗണ്യമായി വർധിക്കുന്നതായാണ് പഠനങ്ങൾ വ്യക്തമാക്കുന്നത്. മെട്രോ നഗരങ്ങളിൽ കുട്ടികളിലെ അമിതവണ്ണത്തിന്റെ വ്യാപന നിരക്ക് 30 ശതമാനം വരെയാണ്.
പ്രമേഹം, ഹൃദ്രോഗം, പക്ഷാഘാതം എന്നിങ്ങനെ വിട്ടുമാറാത്ത പല രോഗങ്ങൾക്കും അമിതവണ്ണം ഒരു പ്രധാന ഘടകമാണ്. ഇത് മാനസികാരോഗ്യ പ്രശ്നങ്ങൾക്കും പ്രത്യുൽപാദനക്ഷമതയ്ക്കും ആയുർദൈർഘ്യം കുറയ്ക്കുന്നതിനും ഇടയാക്കും. പ്രമേഹത്തിന്റെയും ഹൃദ്രോഗത്തിന്റെയും വ്യാപനം രാജ്യത്ത് ഇപ്പോൾ തന്നെ കൂടുതലാണെന്നിരിക്കെ ഈ പ്രശ്നം കൂടുതൽ അപകടകാരിയാണ്.
Health Tips: ഹൃദയാഘാതം വരാതിരിക്കാന് മാര്ഗങ്ങളോ...?
ഇന്ത്യയിൽ അമിതവണ്ണമുള്ളവരുടെ നിരക്ക് വർദ്ധിക്കുന്നതിനുള്ള കാരണങ്ങൾ പലതും സങ്കീർണവുമാണ്. മാറിക്കൊണ്ടിരിക്കുന്ന ജീവിതശൈലി, വ്യായാമമില്ലായ്മ, അനാരോഗ്യകരമായ ഭക്ഷണക്രമം തുടങ്ങിയ ഘടകങ്ങളെല്ലാം ഈ അവസ്ഥയിലേയ്ക്ക് നയിക്കുന്നു. ആരോഗ്യകരമായ ഭാരം നിലനിർത്തേണ്ടത് സംബന്ധിച്ച അവബോധമില്ലായ്മയും പൊതുജനങ്ങൾക്കിടയിൽ ഇതോടൊപ്പമുണ്ട്.
ആരോഗ്യകരമായ ജീവിതശൈലി പ്രോത്സാഹിപ്പിക്കുന്നതിലൂടെ അമിതവണ്ണം തടയുന്നതിന് സർക്കാരും ആരോഗ്യ സംവിധാനവും പ്രവർത്തിക്കുന്നു. ഇതിൽ പൊതുജന ബോധവൽക്കരണ ക്യാമ്പയിനുകൾ, സ്കൂളുകൾ കേന്ദ്രീകരിച്ചുള്ള ബോധവത്കരണം, കമ്മ്യൂണിറ്റി പ്രോഗ്രാമുകൾ എന്നിവ ഉൾപ്പെടുന്നു. പ്രബുദ്ധരായ ഒരു ജനവിഭാഗമെന്ന നിലയിൽ ആരോഗ്യകരമായ ഭാരം നിലനിർത്തുന്നതിനും രോഗങ്ങൾ വരാനുള്ള സാധ്യത കുറയ്ക്കുന്നതിനും നടപടികൾ കൈക്കൊള്ളേണ്ടത് പ്രധാനമാണ്.
ഇന്ത്യയിലെ അമിതവണ്ണമുള്ളവരുടെ നിരക്ക് വർദ്ധിക്കുന്നത് ആശങ്കാജനകമാണ്, സ്ത്രീകൾക്കും പുരുഷന്മാർക്കും ഗുരുതരമായ ആരോഗ്യ പ്രശ്നങ്ങൾ ഉണ്ടാകാനുള്ള സാധ്യതയും കൂടുതലാണ്. ഓരോരുത്തരും അവരവരുടെ ആരോഗ്യത്തിൽ ശ്രദ്ധ കേന്ദ്രീകരിക്കുകയും ജീവിതശൈലി മാറ്റങ്ങളിലൂടെയും ബോധവത്കരണത്തിലൂടെയും ആരോഗ്യകരമായ ഭാരം നിലനിർത്തുന്നതിനുള്ള നടപടികൾ കൈക്കൊള്ളുകയും ചെയ്യേണ്ടത് പ്രധാനമാണ്.
ഡോ. ഷാഫി അലി ഖാൻ എസ്.എൽ
സീനിയർ കൺസൾട്ടന്റ്
ഡിപ്പാർട്മെന്റ് ഓഫ് ജനറൽ ആൻഡ് മിനിമൽ ആക്സസ് സർജറി
കിംസ്ഹെൽത്ത്
തിരുവനന്തപുരം
Click it and Unblock the Notifications
Sign in with Google