ഫാഷന്‍ ഷോയ്ക്ക് വേണ്ടിയല്ല, ജീവിക്കാന്‍ വേണ്ടിയാണ് ചീര വിൽക്കുന്നത്: മഞ്ജു

By Muralikrishna Maaloth

Updated: Tuesday, March 22, 2016, 17:12 [IST]

കർഷക കുടുംബത്തില്‍ ജനിച്ചുവളര്‍ന്ന ആളാണോ, അതോ കൃഷിയോടുള്ള താല്‍പര്യം കൊണ്ടാണോ ഇങ്ങനെ ചെയ്യുന്നത് ചെയ്യുന്നത്?

ഞാന്‍ കാര്‍ഷിക കുടുംബത്തില്‍ ജനിച്ചുവളര്‍ന്ന ആളൊന്നും അല്ല. അച്ഛനും അമ്മയും കൃഷിക്കാരല്ല. പ്രീഡിഗ്രി പഠിക്കുന്ന കാലത്താണ് കൃഷിയിലേക്ക് തിരിയുന്നത്. സ്വന്തമായി 10 സെന്റ് ഭൂമിയേ ഉള്ളൂ, പ്രീഡിഗ്രി പഠിക്കുമ്പോള്‍ മുതല്‍ പാട്ടത്തിന് ഭൂമിയെടുത്ത് കൃഷി ചെയ്യുമായിരുന്നു. കുടുംബശ്രീ വഴിയൊക്കെയാണ് ആദ്യകാലത്ത് കൃഷി ചെയ്തിരുന്നത്.

സി പി ഐ ടിക്കറ്റിലാണ് മത്സരിച്ച് ജയിച്ചത്. ഇലക്ഷനില്‍ മത്സരിക്കുന്നത് എങ്ങനെയാണ്. പാര്‍ട്ടി കുടുംബമാണോ?

അല്ല. ഞങ്ങളുടേത് ഒരു പാര്‍ട്ടി കുടുംബമൊന്നും അല്ല. പാര്‍ട്ടിയില്‍ ചേര്‍ന്നിട്ട് ഒരുപാട് കാലമൊന്നും ആയിട്ടില്ല. തിരഞ്ഞെടുപ്പ് വന്നപ്പോള്‍ മത്സരിക്കാമോ എന്ന് പാര്‍ട്ടി ചോദിച്ചു. ഞാന്‍ സമ്മതിച്ചു. ജനങ്ങള്‍ക്ക് എന്നെ ആവശ്യമുണ്ടെങ്കില്‍ ജനങ്ങള്‍ എന്നെ ജയിപ്പിക്കുമെന്ന് എന്ന് എനിക്ക് തോന്നി. ജനങ്ങള്‍ക്ക് എന്നെ ആവശ്യമുണ്ടായിരുന്നു. അവര്‍ എന്നെ ജയിപ്പിച്ചു. വനിതാ സംവരണ സീറ്റായിരുന്നു.

എങ്ങനെയാണ് പഞ്ചായത്ത് പ്രസിഡണ്ട് സ്ഥാനവും ഈ കൃഷിക്കാര്യങ്ങളും ഒരുമിച്ച് കൊണ്ടുപോകുന്നത്?

ആഴ്ചയില്‍ രണ്ടോ മൂന്നോ ദിവസം ചന്തയില്‍ പോകും. നേരത്തെ കടയുണ്ടായിരുന്നു. ചീര മാത്രമല്ല, പയറും ചേമ്പും മറ്റ് പച്ചക്കറികളുമൊക്കെ ഉണ്ടായിരുന്നു. ഇത്തവണ ചീരയാണ് ഏറ്റവും കൂടുതല്‍ ഇട്ടത്. മറ്റുള്ളതിന്റെയൊക്കെ സീസണ്‍ ആകുന്നതേയുള്ളൂ. രണ്ട് മണിക്കൂറ് തികച്ചിരിക്കണ്ട, പത്തെഴുന്നൂറ് രൂപയുടെ ചീരയൊക്കെ വില്‍ക്കാം. അറിയാവുന്ന ആള്‍ക്കാര് വന്ന് വാങ്ങിക്കും.

പഞ്ചായത്ത് പ്രസിഡണ്ടായത് കൊണ്ടായിരിക്കും ആളുകള്‍ വന്ന് ചീര വാങ്ങുന്നതല്ലേ?

അല്ല, അല്ല, അല്ല (പഞ്ചായത്ത് പ്രസിഡണ്ടിന് ചിരി). എത്രയോ കാലമായി അറിയാവുന്ന ആളുകളുണ്ട്. പിന്നെ, നമ്മള്‍ ജൈവ വളമൊക്കെയിട്ടാണ് ചീര കൃഷി ചെയ്യുന്നത് ഇത് ആളുകള്‍ക്ക് അറിയാം. ചീര കെട്ടായും കണ്ടിച്ചും കൊടുക്കുന്നുണ്ട്. ചാണകം മാത്രമേ നമ്മള്‍ കൃഷിക്കുപയോഗിക്കൂ എന്ന് ആളുകള്‍ക്ക് അറിയാം, അതൊരു വിശ്വാസത്തിന്റെ പുറത്താണ് ആളുകള്‍ വാങ്ങിക്കുന്നത്.

എത്ര വര്‍ഷമായി ചന്തയില്‍ ചീര കൊണ്ടുവന്ന് വില്‍ക്കുന്നു.

പറഞ്ഞല്ലോ, പ്രീഡിഗ്രി പഠിക്കുന്ന കാലം മുതലേ എന്ന് വെച്ചാല്‍ 1998 മുതല്‍ ചന്തയില്‍ ചീര കൊണ്ടുവന്ന് വില്‍ക്കാറുണ്ടായിരുന്നു. ജീവിതമാര്‍ഗം കണ്ടെത്താന്‍ വേണ്ടി വന്നതാണ് ഈ രംഗത്ത്. അല്ലാതെ ഫാഷന്‍ ഷോയ്ക്ക് വേണ്ടിയൊന്നും വന്നതല്ല. മറ്റ് ജീവിതമാര്‍ഗമൊന്നും കിട്ടാതെ വന്നപ്പോഴാണ് ഇങ്ങനെ ചെയ്യാമെന്ന് തീരുമാനിച്ചത്. പച്ചക്കറി ആദ്യം മുതലേ ഉണ്ടായിരുന്നു, കുടുംബശ്രീ സഹായത്തോടെയാണ് ഇടവിള കൃഷികളൊക്കെ തുടങ്ങിയത്.

അടുത്ത പേജില്‍: ചീര വില്‍ക്കുന്ന പഞ്ചായത്ത് പ്രസിഡണ്ട് സോഷ്യല്‍ മീഡിയയിലും ഹിറ്റ്