സൗദി അറേബ്യയില് ഈ മേഖലയിലെ തൊഴില് അവസരം കുത്തനെ കുറയുന്നു; ഇനി സാധ്യത ആരോഗ്യത്തിലും ഐടിയിലും
സൗദി അറേബ്യയിൽ എനർജി മേഖലയിലെ തൊഴില് അവസരങ്ങള് കുറഞ്ഞ് വരുന്നതായി റിപ്പോർട്ട്. ഓയിൽ ആൻഡ് ഗ്യാസ്, വൻകിട നിർമാണ പദ്ധതികൾ തുടങ്ങിയ മേഖലകളിൽ സർക്കാർ ചെലവ് ചുരുക്കലിന്റെ ഭാഗമായി പുതിയ നിയമനങ്ങൾ വൈകുന്നുവെന്നാണ് ഇന്നൊവേഷൻസ് ഗ്രൂപ്പിന്റെ സൗദി ഓപ്പറേഷൻസ് ജനറൽ മാനേജർ അനുരാഗ് വർമയെ ഉദ്ധരിച്ചുകൊണ്ട് ഗള്ഫ് ന്യൂസ് റിപ്പോർട്ട് ചെയ്യുന്നത്.
നിർമാണ മേഖലയിൽ, സൗദി അറേബ്യയുടെ പ്രശസ്തമായ 'ഗിഗാ' പദ്ധതികൾ ഉൾപ്പെടെ ചില പ്രോജക്ടുകളിൽ 'റീ-സൈസിംഗ്' (പദ്ധതി വലിപ്പം കുറയ്ക്കൽ) സംബന്ധിച്ച റിപ്പോർട്ടുകളും പതിവായി ഉയർന്നുവരുന്നുണ്ട്. ഇത് എൻജിനീയറിംഗ്, പ്രോജക്ട്-നിർദ്ദിഷ്ട ജീവനക്കാരുടെ ആവശ്യകത കുറയ്ക്കുന്നതിന് കാരണമായിട്ടുണ്ട്. എന്നിരുന്നാലും, സൗദിയിലെ നിർമാണ മേഖലയ്ക്ക് ഇപ്പോഴും വൻതോതിൽ റിക്രൂട്ട്മെന്റ് ആവശ്യമാണെന്ന് വ്യവസായ വിദഗ്ധർ വ്യക്തമാക്കുന്നു.
നിർമാണ മേഖലയിലെ മന്ദഗതിക്കിടയിലും, റീട്ടെയിൽ, ഫിനാൻഷ്യൽ, എജ്യുക്കേഷൻ മേഖലകളിൽ സൗദി അറേബ്യയിൽ തൊഴിൽ നിയമനങ്ങൾ സജീവമാണെന്നാതാണ് ശ്രദ്ധേയം. "നിലവിലെ മികച്ച പ്രതിഭകളെ നിലനിർത്താൻ തൊഴിലുടമകൾ ശമ്പള വർധനവ് നൽകുന്നുണ്ട്. കഴിഞ്ഞ വർഷത്തെ അപേക്ഷിച്ച് വൈറ്റ്-കോളർ ജീവനക്കാർക്ക് പുതിയ നിയമനങ്ങളിൽ 6%-8% ശമ്പള വർധനവുണ്ട്." അനുരാഗ് വർമയെ ഉദ്ധരിച്ച് ഗള്ഫ് ന്യൂസ് റിപ്പോർട്ട് ചെയ്യുന്നു.
ഇന്നൊവേഷൻസ് ഗ്രൂപ്പിന്റെ റിപ്പോർട്ട് പ്രകാരം, ഈ ദശകാവസാനത്തോടെ സൗദിയിലെ വൈറ്റ്-കോളർ തൊഴിൽ വിപണി 1.16 ബില്യൺ ഡോളറിന്റെ മൂല്യത്തിലെത്തും. അതേസമയം, ബ്ലൂ-കോളർ തൊഴിലാളികളുടെ ആവശ്യകത 1.68 ബില്യൺ ഡോളറിന്റെ വിപണി മൂല്യത്തിലെത്തുമെന്നും റിപ്പോർട്ട് സൂചിപ്പിക്കുന്നു. "ഹെൽത്ത്കെയർ, ടെക്നോളജി, ഫിനാൻഷ്യൽ സർവീസസ് തുടങ്ങിയ പ്രധാന മേഖലകളിൽ ഉയർന്ന വളർച്ചാ അവസരങ്ങൾ ഉയർന്നുവരുന്നതോടെ, കൂടുതൽ വൈദഗ്ധ്യമുള്ള തൊഴിലാളികളുടെ ആവശ്യകത വർധിക്കുകയാണ്," റിപ്പോർട്ട് വ്യക്തമാക്കുന്നു.
ഈ വർഷാവസാനത്തോടെ കൂടുതൽ ബഹുരാഷ്ട്ര കമ്പനികൾ സൗദി അറേബ്യയിൽ അവരുടെ റീജിയണൽ ഹെഡ്ക്വാർട്ടേഴ്സ് സ്ഥാപിക്കുമെന്നാണ് പ്രതീക്ഷിക്കുന്നത്. ഏറ്റവും പുതിയ സൗദി പർച്ചേസിംഗ് മാനേജേഴ്സ് ഇൻഡക്സ് (PMI) റിപ്പോർട്ട് തൊഴിൽ നിയമനത്തിനുള്ള ആവശ്യകത വർധിക്കുന്നതgx സൂചിപ്പിക്കുന്നു. പ്രത്യേകിച്ച് ഫിനാൻഷ്യൽ, ടെക് മേഖലകളിൽ കൂടുതല് നിയമനങ്ങള് നടക്കാന് സാധ്യതയുണ്ട്.
സൗദി അറേബ്യയുടെ ടെക് മേഖല പൂർണ ശേഷിയിലെത്താൻ ഇനിയും വർഷങ്ങൾ വേണ്ടിവരും. നിരവധി ആർട്ടിഫിഷ്യൽ ഇന്റലിജൻസ് (AI) അനുബന്ധ നിക്ഷേപങ്ങൾ പ്രഖ്യാപിക്കപ്പെട്ടിട്ടുണ്ടെങ്കിലും, ഈ മേഖലയിലെ ഗൗരവമായ തൊഴിൽ നിയമനം ഇനിയും ആരംഭിച്ചിട്ടില്ല. യഥാർത്ഥത്തിൽ, 2026-ന് മുമ്പ് ടെക് ഹൈറിംഗ് വേഗത്തിലാകാൻ സാധ്യതയുണ്ടെന്നും മേഖലയിലെ ഒരു എച്ച് ആർ വിദഗ്ധൻ അഭിപ്രായപ്പെടുന്നു.
സൗദി അറേബ്യയുടെ 'വിഷൻ 2030' പദ്ധതി സമ്പദ്വ്യവസ്ഥയെ എണ്ണയെ ആശ്രയിക്കുന്നതിൽ നിന്ന് വൈവിധ്യവത്കരിക്കാൻ ലക്ഷ്യമിടുന്നു. ഈ പദ്ധതിയുടെ ഭാഗമായി ടെക്നോളജി, ഹെൽത്ത്കെയർ, ടൂറിസം, ഫിനാൻഷ്യൽ സർവീസസ് തുടങ്ങിയ മേഖലകൾക്ക് വലിയ ഊന്നലാണ് നൽകുന്നത്. ഇത് ഉയർന്ന വൈദഗ്ധ്യമുള്ള തൊഴിലാളികളുടെ ആവശ്യകത വർധിപ്പിക്കുന്നു. അതേസമയം, നിർമാണ മേഖലയിലെ താൽക്കാലിക മന്ദഗതി 'വിഷൻ 2030' പദ്ധതികളുടെ ബജറ്റ് പുനഃക്രമീകരണത്തിന്റെ ഫലമായാണെന്നും വിദഗ്ധർ ചൂണ്ടിക്കാട്ടുന്നു.
വിഷൻ 2030 പദ്ധതിയുടെ ഭാഗമായി തന്നെ സ്വദേശി തൊഴിലാളികളുടെ പങ്കാളിത്തം വർധിപ്പിക്കുകയും വിദേശ തൊഴിലാളികളെ ആശ്രയിക്കുന്നത് കുറയ്ക്കുകയും ചെയ്യുക എന്ന ലക്ഷ്യത്തോടെ സ്വദേശിവത്കരണവും കൂടുതല് മേഖലകളില് രാജ്യം നടത്തി വരുന്നുണ്ട്. ഓരോ മേഖലയിലും നിശ്ചിത ശതമാനം തൊഴിലാളികൾ സൗദി പൗരന്മാരായിരിക്കണമെന്നാണ് നിയമം പറയുന്നത്. പാലിക്കാത്ത കമ്പനികൾക്ക് പിഴ, ലൈസൻസ് പുതുക്കൽ തടസ്സം, സർക്കാർ കരാറുകളിൽ നിന്നുള്ള വിലക്ക് തുടങ്ങിയ ശിക്ഷകൾ നേരിടേണ്ടി വരും.
2025-ൽ സൗദൈസേഷൻ നയം 269-ലധികം തൊഴിൽ വിഭാഗങ്ങളിലേക്ക് വ്യാപിപ്പിച്ചിട്ടുണ്ട്. ഉദാഹരണത്തിന് ഫാർമസി മേഖലയില് ജൂലൈ 27 മുതൽ 55 ശതമാനമാണ് സൗദൈസേഷൻ നിരക്ക്. ആശുപത്രി ഫാർമസികളിൽ 65%, കമ്യൂണിറ്റി ഫാർമസികളിലും മെഡിക്കൽ കോംപ്ലക്സുകളിലും 35%. അഞ്ചോ അതിലധികം ജീവനക്കാരുള്ള സ്ഥാപനങ്ങൾക്കും നിർദേശം ബാധകമാണ്. ഈ സാഹചര്യത്തില് സ്ഥാപനങ്ങള്ക്ക് പ്രവാസികളെ ഒഴിവാക്കുകയും സൗദി പൗരന്മാരെ റിക്രൂട്ട് ചെയ്യുകയും പരിശീലിപ്പിക്കുകയും ചെയ്യേണ്ടിവരും.
Click it and Unblock the Notifications
Sign in with Google