നെടുമ്പാശേരി: 26% ഓഹരി ഹഡ്കോയ്ക്ക്

കൊച്ചി: നെടുമ്പാശേരിയിലെ കൊച്ചി അന്താരാഷ്ട്രവിമാനത്താവളത്തിന്റെ 26 ശതമാനം ഓഹരികള്‍ ഹഡ്കോ വാങ്ങി.

53 കോടി രൂപയ്ക്കാണ് ഹഡ്കോ ഇത്രയും ഓഹരികള്‍ വാങ്ങിയത്. കഴിഞ്ഞ ബോര്‍ഡ് യോഗത്തിലാണ് ഈ തീരുമാനം എടുത്തതെന്ന് വിമാനത്താവളത്തിന്റെ വാര്‍ഷിക ജനറല്‍ ബോഡി യോഗത്തില്‍ വിമാനത്താവള ചെയര്‍മാനും മുഖ്യമന്ത്രിയുമായ എ.കെ. ആന്റണി പറഞ്ഞു.

അതേ സമയം വിമാനത്താവളത്തിന്റെ ഓഹരികള്‍ വാങ്ങിയവരുടെ സംഘടനയുടെ പ്രസിഡന്റായ ജോസ് മാളിയേക്കല്‍ ഈ തീരുമാനത്തെ യോഗത്തില്‍ എതിര്‍ത്തു. വിമാനത്താവളത്തിന്റെ ഓഹരികള്‍ വാങ്ങിയ വ്യക്തികള്‍ക്കാണ് അവകാശ ഓഹരികള്‍ വാങ്ങാനുള്ള മുന്‍ഗണന നല്കേണ്ടതെന്നതാണ് ജോസ് മാളിയേക്കല്‍ അവകാശപ്പെടുന്നത്. ഇക്കാര്യം ചൂണ്ടിക്കാണിച്ച് അദ്ദേഹം ഹൈക്കോടതിയില്‍ പരാതി നല്കിയിട്ടുണ്ട്.

നെടുമ്പാശേരിയില്‍ വിമാനത്താവളസമിതി ഏറ്റെടുത്തിട്ടുള്ള 400 ഏക്കര്‍ ഭൂമി ഭാവി വികസനത്തിന് എങ്ങിനെ പ്രയോജനപ്പെടുത്തണമെന്നത് സംബന്ധിച്ച് ഒരു പദ്ധതി തയ്യാറാക്കി ബോര്‍ഡ് ഡയറക്ടര്‍മാക്ക് സമര്‍പ്പിയ്ക്കുമെന്ന് വിമാനത്താവളത്തിന്റെ മാനേജിംഗ് ഡയറക്ടര്‍ വി.ജെ. കുര്യന്‍ പറഞ്ഞു. വിമാനത്താവളസമിതിയുടെ അടുത്ത ബോര്‍ഡ് യോഗത്തില്‍ ഈ പ്രശ്നം ചര്‍ച്ച ചെയ്യും.

2001-2002 സാമ്പത്തികവര്‍ഷത്തെ കണക്ക് പ്രകാരം വിമാനത്താവളം 18 കോടി രൂപയുടെ നഷ്ടത്തിലാണ്. പക്ഷെ 2002-2003 സാമ്പത്തികവര്‍ഷത്തില്‍ വിമാനത്താവളം ലാഭത്തിലാകും.