ഷൊര്‍ണൂര്‍ ഷോക്ക്‌ ഗൗരവത്തോടെ കാണുന്നുവെന്ന്‌ യച്ചൂരി

ദില്ലി: ഷൊര്‍ണൂര്‍ നഗരസഭാ തിരഞ്ഞെടുപ്പില്‍ ഉണ്ടായ പരാജയം പാര്‍ട്ടി ഗൗരവത്തോടെയാണ്‌ കാണുന്നതെന്ന്‌ സിപിഎം പൊളിറ്റ്‌ ബ്യൂറോ അംഗം സീതാറാം യച്ചൂരി. സംസ്ഥാന കമ്മിറ്റിയുടെ റിപ്പോര്‍ട്ട്‌ വന്നശേഷം ഇക്കാര്യം പരിശോധിക്കുമെന്നും യച്ചൂരി ദില്ലിയിലെ പാര്‍ട്ടി ആസ്ഥാനത്ത്‌ പറഞ്ഞു.

തിരഞ്ഞെടുപ്പില്‍ പാര്‍ട്ടി പരാജയപ്പെടാനും വിമതപക്ഷം വിജയം നേടാനുമുള്ള കാരണങ്ങള്‍ കേന്ദ്ര നേതൃത്വം സംസ്ഥാന സെക്രട്ടേറിയറ്റിനോട്‌ ആരാഞ്ഞിട്ടുണ്ട്‌. ജനറല്‍ സെക്രട്ടറി പ്രകാശ്‌ കാരാട്ടിന്റെ നാട്ടില്‍ സിപിഎമ്മിനേറ്റ തോല്‍വിയെന്ന പേരിലാണ്‌ ദേശീയമാധ്യമങ്ങള്‍ തരിഞ്ഞെടുപ്പ്‌ ഫലം വാര്‍ത്തായാക്കിയത്‌.

ഇതിന്റെ പശ്ചാത്തലത്തിലാണ്‌ കാരാട്ട്‌ നേരിട്ട്‌ കാരണങ്ങള്‍ ആരാഞ്ഞിരിക്കുന്നത്‌. ഔദ്യോഗിക വിഭാഗത്തിന്‌ ഇഷ്ടമില്ലാത്തവരെ അച്ചടക്കലംഘനം ആരോപിച്ച്‌ കൂട്ടത്തോടെ പുറത്താക്കുന്ന കേരളത്തിലെ രീതിയില്‍ ചില പിബി അംഗങ്ങള്‍തന്നെ അതൃപ്‌തി രേഖപ്പെടുത്തിയിട്ടുണ്ടെന്നാണ്‌ സൂചന.

ഇങ്ങനെ പുറത്തുപോകുന്ന വിമതര്‍ക്കൊപ്പം അണികളും നിലയുറപ്പിക്കുന്നത്‌ സിപിഎമ്മിന്‌ പുതിയ ആഘാതമാണ്‌. വിമതരാണ്‌ പാര്‍ട്ടിയുടെ ഇപ്പോഴത്തെ ഏറ്റവും വലിയ തലവേദന. ഷൊര്‍ണൂരില്‍ മാത്രമല്ല കോഴിക്കോട്‌ ജില്ലയിലെ ഒഞ്ചിയത്തും ഇതുതന്നെയാണ്‌ നടന്നുകൊണ്ടിരിക്കുന്നത്‌.

ഷൊര്‍ണൂരില്‍ എംആര്‍ മുരളി വിഭാഗീയതയുടെ പേരിലല്ല, അഴിമതിയുടെ പേരില്‍ നടപടിയ്‌ക്കു വിധേയനായ വ്യക്തിയാണെന്നും കോണ്‍ഗ്രസിന്റെ കളിയാണ്‌ മുരളിയെ ഇപ്പോള്‍ സഹായിച്ചിരിക്കുന്നതെന്നുമാണ്‌ സംസ്ഥാന നേതാക്കള്‍ ദില്ലിയില്‍ നല്‍കിയിട്ടുള്ള പ്രാഥമിക വിശദീകരണം.