ജയറാമിന്റെ രാജി പ്രധാനമന്ത്രി നിരസിച്ചു

ദില്ലി: കേന്ദ്ര മന്ത്രിസഭയില്‍ നിന്നും രാജിവെയ്ക്കാന്‍ വനം പരിസ്ഥിതി മന്ത്രി ജയറാം രമേശ് സന്നദ്ധത അറിയിച്ചെങ്കിലും പ്രധാനമന്ത്രി തള്ളി. കേന്ദ്ര ആഭ്യന്തര മന്ത്രാലയത്തിനെതിരെ ചൈനയില്‍ നടത്തിയ പ്രസ്താവനയെ തുടര്‍ന്ന് പ്രധാനമന്ത്രിയുടെയും കോണ്‍ഗ്രസ് നേതൃത്വത്തിന്റെയും വിമര്‍ശനം ഏറ്റുവാങ്ങിയ സാഹചര്യത്തില്‍ രാജി സന്നദ്ധത അറിയിച്ചത്. എന്നാല്‍ പ്രധാനമന്ത്രി മന്‍മോഹന്‍ സിങ് രാജി വേണ്ടെന്ന നിലപാടാണ് സ്വീകരിച്ചത്.

ചൈനീസ് കമ്പനികള്‍ക്ക് ഇന്ത്യയില്‍ പ്രവര്‍ത്തിക്കാന്‍ അനുമതി നല്‍കാത്ത ആഭ്യന്തരവകുപ്പിന്റെ നിലപാടിനെയാണ് ചൈന സന്ദര്‍ശനത്തിനിടെ ജയറാം രമേശ് വിമര്‍ശിച്ചത്. ആഭ്യന്തരവകുപ്പിനും ദേശീയ സുരക്ഷാ സെക്രട്ടറിയേറ്റിനും സംശയരോഗമെന്നായിരുന്നു വിമര്‍ശനം. ഇന്ത്യ-ചൈന സൗഹൃദത്തെ ഇതു പ്രതികൂലമായി ബാധിച്ചുവെന്നും ഷാങ്ഹായില്‍ ഒരു ചടങ്ങില്‍ അദ്ദേഹം പറഞ്ഞു.

രമേശിന്റെ പ്രസ്താവനയിലുള്ള അതൃപ്തി ചിദംബരം പ്രധാനമന്ത്രിയെ കത്തു മുഖേന അറിയിച്ചിരുന്നു. തുടര്‍ന്നു പ്രധാനമന്ത്രി ജയറാം രമേശിനെ വിളിച്ചുവരുത്തി താക്കീത് നല്‍കി. മറ്റു വകുപ്പുകളുടെ കാര്യങ്ങളില്‍ ഇടപെടേണ്ടതില്ലെന്നു പ്രധാനമന്ത്രി നിര്‍ദേശിച്ചു. ഈ സാഹചര്യത്തിലാണ് ജയറാം രമേശ് രാജി സന്നദ്ധത അറിയിച്ചതായി റിപ്പോര്‍ട്ട് വന്നത്.