കടുവാ സങ്കേതം: മാറ്റം ആവാമെന്ന് കോടതി

ദില്ലി: കടുവാ സങ്കേതങ്ങളിലെ വിനോദ സഞ്ചാരത്തിന് നിയന്ത്രണം ഏര്‍പ്പെടുത്തി കൊണ്ട് കേന്ദ്ര പരിസ്ഥിതി മന്ത്രാലയം തയ്യാറാക്കിയ മാര്‍ഗരേഖയില്‍ സംസ്ഥാനങ്ങള്‍ക്ക് അവശ്യമായ മാറ്റങ്ങള്‍ വരുത്താമെന്ന് സുപ്രീംകോടതി അറിയിച്ചു. മധ്യപ്രദേശിലെ പച്ച്മര്‍ച്ചി ക്ഷേത്രത്തിന്റെ വാദം കേള്‍ക്കവേയാണ് ജസ്റ്റിസുമാരായ എ.കെ.പട്‌നായിക്, സ്വതന്ത്രകുമാര്‍ എന്നിവരടങ്ങിയ ബെഞ്ച് ഇക്കാര്യം വ്യക്തമാക്കിയത്.

പരിസ്ഥിതി മന്ത്രാലയത്തിന്റെ നിര്‍ദേശങ്ങള്‍ ശബരിമലയില്‍ നടപ്പിലാക്കാന്‍ ബുദ്ധിമുട്ടുണ്ടെന്ന് കാണിച്ച് കേരള സര്‍ക്കാര്‍ തിങ്കളാഴ്ച സത്യവാങ്മൂലം സമര്‍പ്പിച്ചിരുന്നു. കേസില്‍ കക്ഷി ചേരാന്‍ അയ്യപ്പ സേവാസമാജത്തിന് കോടതി ബുധനാഴ്ച അനുമതി നല്‍കി. മാര്‍ഗരേഖകള്‍ സംബന്ധിച്ച് ഉയര്‍ന്ന ആശങ്കകള്‍ക്ക് അടിസ്ഥാനമില്ലെന്ന് കോടതി നിരീക്ഷിച്ചു.

കേന്ദ്ര സര്‍ക്കാര്‍ പുറത്തിറക്കിയ മാര്‍ഗരേഖ വിപുലമാണ്. സംസ്ഥാന സര്‍ക്കാരുകള്‍ക്ക് മാര്‍ഗ്ഗരേഖയില്‍ ആവശ്യമായ മാ്റ്റങ്ങള്‍ വരുത്താമെന്ന് അതില്‍ പറയുന്നുണ്ട്. കടുവാസങ്കേതങ്ങളുടെ പദ്ധതികള്‍ തയ്യാറാക്കുന്നതും വിനോദ സഞ്ചാര കേന്ദ്രങ്ങള്‍ വേര്‍തിരിയ്ക്കുന്നതും സംസ്ഥാന സര്‍ക്കാരുകളാണെന്ന കാര്യവും കോടതി ഓര്‍മ്മിപ്പിച്ചു.

രാജ്യത്തെ കടുവാ സങ്കേതങ്ങളില്‍ വിനോദ സഞ്ചാരവും തീര്‍ഥാടനവും നിയന്ത്രിക്കണമെന്ന കേന്ദ്ര സര്‍ക്കാരിന്റെ നിര്‍ദേശത്തിനെതിരെ തമിഴ്‌നാടും കഴിഞ്ഞ ദിവസം രംഗത്തെത്തിയിരുന്നു. ഇത് നടപ്പിലാക്കിയാല്‍ വിനോദസഞ്ചാരത്തെ പ്രതികൂലമായി ബാധിക്കുമെന്ന് കാണിച്ച് തമിഴ്‌നാട് സുപ്രീംകോടതിയില്‍ സത്യവാങ്മൂലം സമര്‍പ്പിച്ചു.

English summary

Suspense over the exact number of tigers in India continued in the Supreme Court Wednesday when the Centre and other parties in a case relating to eco-tourism guidelines for the tiger reserves assumed contradictory positions on whether the number of big cats has risen or gone down.,