എണ്ണ ഉണ്ടാക്കുന്നത് ആരൊക്കെ
ലോകത്താകമാനം 115 രാജ്യങ്ങള് എണ്ണ ഉത്പാദിപ്പിക്കുന്നുണ്ടെന്ന് കേട്ടാല് ഞെട്ടുമോ. ഒരു സാധനത്തിന്റെ ലഭ്യത കൂടിയാല് ആവശ്യം കുറയും സ്വാഭാവികമായും വിലയും കുറയും. ആത്യന്തികമായി എണ്ണ വിപണിയില് സംഭവിച്ചത് ഇത് തന്നെയാണ്.
സൗദി അറേബ്യയാണ് എണ്ണ ഉത്പാദനത്തില് ഒന്നാമത്. പ്രതിദിനം ഒരുകോടി പതിനേഴ് ലക്ഷത്തി ഇരുപത്തയ്യായിരത്തി അറനൂറ്റിയെമ്പത് ബാരല് അസംസ്കൃത എണ്ണയാണ് അവര് ഉത്പാദിപ്പിക്കുന്നത്. ലോകത്തെ മൊത്തം എണ്ണ ഉത്പാദനത്തിന്റെ 13.80 ശതമാനം വരും ഇത്.
ഏറ്റവും കുറച്ച് എണ്ണ ഉത്പാദിപ്പിക്കുന്ന രാജ്യങ്ങളേയും പരിഗണിക്കേണ്ടതുണ്ട്. ഇക്കാര്യത്തില് പനാമയാണ് ഒന്നാമത്. പ്രതിദിനം വെറും രണ്ട് ബാരല് മാത്രം. തൊട്ടുപിന്നിലുള്ള സ്ലൊവേനിയ അഞ്ച് ബാരല് എണ്ണയും ഓരോ ദിവസവും ഉത്പാദിപ്പിക്കുന്നു.
എണ്ണ ഉത്പാദനത്തില് അമേരിക്കയാണ് രണ്ടാം സ്ഥാനത്തുള്ളത്. സൗദിയുടെ തൊട്ട് പിറകില് തന്നെ. ഒരുകോടി പതിനൊന്ന് ലക്ഷത്തി പതിനെണ്ണായിരത്തി അറനൂറ്റിത്തൊണ്ണൂറ് ബാരല്. ആഗോള ഉത്പാദനത്തിന്റെ 13.09 ശതമാനം. അതിന് പിറകില് റഷ്യ. 12.23 ശതമാനം എണ്ണ ഉത്പാദിപ്പിക്കുന്നത് ഇവരാണ്.
ആദ്യ മൂന്ന് രാജ്യങ്ങള് ചേര്ന്ന് 39.12 ശതമാനം എണ്ണയും ഉത്പാദിപ്പിക്കുന്നു. ശേഷിക്കുന്ന 112 രാജ്യങ്ങളിലെല്ലാം കൂടി ഉത്പാദിപ്പിക്കുന്നത് 60.88 ശതമാനം. നാലാം സ്ഥാനത്തുള്ള ചൈന ഉത്പാദിപ്പിക്കുന്നത് 5.51 ശതമാനമാണ്. പട്ടികയില് 23-ാം സ്ഥാനത്താണ് നമ്മുടെ ഇന്ത്യ. പ്രതിദിനം ഉത്പാദിപ്പിക്കുന്നത് എട്ട് ലക്ഷത്തി തൊണ്ണൂറ്റി ഏഴായിരത്തി മുന്നൂറ് ബാരല്. ലോകത്തിനുള്ള സംഭാവന 1.04 ശതമാനം.
ഒരു ദിവസം ലോകത്ത് ഉത്പാദിപ്പിക്കുന്നത് എട്ട് കോടി നാല്പത്തിയൊമ്പത് ലക്ഷത്തി അമ്പത്തിയൊന്നായിരത്തി ഇരുനൂറ് ബാരല്. എന്നാല് ഇത്രയും എണ്ണ ലോകത്തിന് ഒരു ദിവസം ആവശ്യമില്ലാതെ വന്നാലൊ.
അടുത്ത പേജില് വായിക്കാം: ഉത്പാദനം മാത്രമല്ലല്ലോ കാര്യം, ഉപഭോഗവും നോക്കണ്ടേ...