തൊടുപുഴ ന​ഗരസഭ തിരഞ്ഞെടുപ്പ്: മുസ്ലിം ലീ​ഗ് പിന്തുണയോടെ എൽഡിഎഫിന് വിജയം

തൊടുപുഴ: തൊടുപുഴ ന​ഗരസഭയിയിൽ മുസ്ലിം ലീ​ഗ് പിന്തുണയോടെ എൽ ഡി എഫിന് വിജയം. സി പി എമ്മിലെ സബീന ബിഞ്ചു ചെയർപേഴസണായി തിരഞ്ഞെടുക്കപ്പെട്ടു. മുസ്ലിം ലീ​ഗും കോൺ​ഗ്രസും സ്ഥാനാർത്ഥികളെ നിർത്തിയതാണ് ഭൂരിപക്ഷം ഉണ്ടായിട്ടും യു ഡി എഫിന് തിരിച്ചടിയായത് എന്നാണ് പയുന്നത്.

ഹാജരായ 32 പേരിൽ സബീനയക്ക് ലീ​ഗിന്റെ അഞ്ച് കൗൺസിലർമാരുടേതടക്കം 14 വോട്ടുകൾ ലഭിച്ചു. കോൺ​ഗ്രസിന്റെ സ്ഥാനാർത്ഥി ദീപക്കിന് പത്തും ലഭിച്ചു. ആറ് വോട്ട് നേടിയ ലീ​ഗ് സ്ഥാനാർത്ഥി എം എം കരീം ആദ്യ റൗണ്ടിൽ പുറത്തായി. 10 എൽ ഡി എഫ് കൗൺസിലർമാരിൽ മെർളി രാജു കോൺ​ഗ്രസ് സ്ഥാനാർത്ഥി ദീപക്കിനെ പിന്തുണച്ചു. കൂടാതെ ദീപക്കിന് ആറ് കോൺ​ഗ്രസ് ജെയിലെ ജോസഫ് ജോണും മുൻ ചെയർമാൻ സനീഷ് ജോർജും മുസ്ലിം ലീ​ഗ് സ്വതന്ത്രൻ ജോർജ് ജോണും വോട്ട് ചെയ്തു. രണ്ടാം റൗണ്ടിൽ പുറത്തായ എട്ട് അം​ഗങ്ങളുള്ള ബി ജെ പി അവസാന റൗണ്ടിൽ വിട്ടുനിന്നു.

ഇടുക്കി സബ് കളക്ടർ അരുൺ എസ് നായർ വരണാധികാരിയായിരുന്നു. കൗൺസിൽ നടക്കവെ ന​ഗരസഭ കാര്യാലയത്തിന് മുന്നിൽ കോൺഗ്രസ് - ലീ​ഗ് സംഘർഷം ഉണ്ടായി. വൻ പോലീസ് സന്നാഹം ക്യാമ്പ് ചെയ്തിരുന്നു. കൂറ് മാറിയ മെർളി രാജുവിനെ പോലീസ് കാവലിൽ പുറത്തെത്തിക്കാൻ ശ്രമിച്ചെങ്കിലും എൽ ഡി എഫ് പ്രതിഷേധം മൂലം നടന്നില്ല. സി പി എം കൗൺസിൽ ആർ ഹരി രോ​ഗ ബാധിതനായതിനാൽ തിരഞ്ഞെടുപ്പിൽ പങ്കെടുത്തില്ല. സി പി ഐ യുടെ ജോസ് മഠത്തിൽ വിട്ടുനിന്നതിന്റെ കാരണം വ്യക്തമല്ല.

യു ഡി എഫിന് 13 ഉം എൽ ഡി എഫിന് 12 ഉം ബി ജെ പിക്ക് എട്ടും കൗൺസിലർമാരാണ് ഉണ്ടായത്. ഒരു സീറ്റ് ഒഴിഞ്ഞ് കിടക്കുകയാണ്. മുസ്ലിം ലീ​ഗ് - ആറ്, കോൺ​ഗ്രസ് - ആറ്, കേരള കോൺ​ഗ്രസ് ജെ - ഒന്ന് എന്നിങ്ങനെയാണ് യു ഡി എഫ് കക്ഷിനില. ചെയർമാനായ സനീഷ് ജോർജ് രാജി വെച്ചതിന് പിന്നാലെ വന്ന ഒഴിവിലേക്കാണ് പുതിയ ചെയർമാനെ തിരഞ്ഞെടുക്കാനായി തിരഞ്ഞെടുപ്പ് നടന്നത്.