കൊവിഡ് വ്യാപനത്തിൽ വർധനവ്: മതപരമായ ചടങ്ങുകൾ റദ്ദാക്കി മഹാരാഷ്ട്ര മുഖ്യമന്ത്രി

Updated: Monday, September 6, 2021, 21:13 [IST]

മുംബൈ: കൊവിഡിന്റെ മൂന്നാംതരംഗത്തിന്റെ വരവ് കണക്കിലെടുത്ത് ഉത്സവകാലത്തോടനുബന്ധിച്ച ആഘോഷങ്ങൾ നടത്തുന്നതിൽ നിന്ന് വിട്ടുനിൽക്കുമെന്ന് മഹാരാഷ്ട്ര മുഖ്യമന്ത്രി ഉദ്ധവ് താക്കറെ. സംസ്ഥാനത്ത് കൊവിഡ് കേസുകളിൽ വർധനവ് റിപ്പോർട്ട് ചെയ്യുന്ന സാഹചര്യത്തിലാണ് മുഖ്യമന്ത്രിയുടെ ആഹ്വാനം. പൗരന്മാരുടെ ആരോഗ്യത്തിന് മുൻഗണന നൽകുമെന്നും ആഘോഷങ്ങൾ പിന്നീട് നടത്താമെന്നും അദ്ദേഹം പറഞ്ഞു.

"നമുക്ക് പിന്നീട് ഉത്സവങ്ങൾ ആഘോഷിക്കാം. നമ്മുടെ പൗരന്മാരുടെ ജീവിതത്തിനും ആരോഗ്യത്തിനും നമുക്ക് മുൻഗണന നൽകാം. ദൈനംദിന കേസുകളുടെ വർദ്ധനവ് കണക്കിലെടുക്കുമ്പോൾ സ്ഥിതി കൈവിട്ടുപോകും, "അദ്ദേഹം പ്രസ്താവനയിൽ പറഞ്ഞു. തിങ്കളാഴ്ച നടന്ന ദുരന്തനിവാരണ യോഗത്തിൽ മുഖ്യമന്ത്രിയും സംസ്ഥാനത്തെ മറ്റ് മുതിർന്ന മന്ത്രിമാരും പങ്കെടുത്തിരുന്നു.

ഉത്സവങ്ങൾക്കും മതപരമായ പരിപാടികൾക്കും ആരാണ് നിയന്ത്രണങ്ങൾ ഏർപ്പെടുത്താൻ ആഗ്രഹിക്കുന്നത്? എന്നാൽ ജനങ്ങളുടെ ജീവിതം പ്രധാനമാണെന്നും അദ്ദേഹം പറഞ്ഞു. ഉത്സവതാലത്ത് ആഘോഷ പരിപാടികൾ സംഘടിപ്പിക്കുന്നത് മഹാരാഷ്ട്രയിലെ കോവിഡ് -19 കേസുകളുടെ എണ്ണം കൂടാൻ ഇടയാക്കുമെന്ന് വിദഗ്ദ്ധർ അഭിപ്രായപ്പെടുന്നതിനാൽ, സാമൂഹിക, മത, രാഷ്ട്രീയ ഒത്തുചേരലുകളും യോഗങ്ങളും റദ്ദാക്കാൻ താക്കറെ നിർദ്ദേശം നൽകിയിട്ടുണ്ട്.

എല്ലാവരും മാസ്ക് ധരിക്കുക, അകലം പാലിക്കുക, കൂടിച്ചേരലുകൾ ഒഴിവാക്കുക തുടങ്ങിയ കോവിഡ് മാനദണ്ഡങ്ങൾ പാലിക്കുകയാണെങ്കിൽ, പുതിയ നിയന്ത്രണങ്ങൾ ഏർപ്പെടുത്തേണ്ട ആവശ്യമില്ലെന്ന് മുഖ്യമന്ത്രി പറഞ്ഞു. "മൂന്നാം തരംഗത്തിന് ഒരാൾ തയ്യാറാകേണ്ടതുണ്ട്, കാരണം കൊവിഡിന്റെ രണ്ടാം തരംഗത്തിൽ രാജ്യം മുഴുവൻ കഷ്ടപ്പെടേണ്ടി വന്നിരുന്നു. പ്രധാനമായും ഓക്സിജൻ വിതരണത്തിലെ കുറവാണ് വെല്ലുവിളിയായതെന്നും" താക്കറെ പറഞ്ഞു.

വരാനിരിക്കുന്ന ഉത്സവ ദിവസങ്ങൾ നിർണായകവും വെല്ലുവിളി നിറഞ്ഞതുമാണെന്ന് താക്കറെ പറഞ്ഞു. കാര്യങ്ങൾ നിയന്ത്രണാതീതമാകുന്നില്ലെന്ന് ഉറപ്പുവരുത്തേണ്ട ബാധ്യത രാഷ്ട്രീയ പാർട്ടികൾക്കാണെന്നും താക്കറെ പറഞ്ഞു. "കോവിഡ് -19 ന്റെ മൂന്നാം തരംഗം നമ്മുടെ പടിവാതിൽക്കലെത്തി" എന്നും മുഖ്യമന്ത്രി പറഞ്ഞു. കേരളത്തിൽ പ്രതിദിനം 30,000 കേസുകൾ വർദ്ധിക്കുന്നു. ഇതൊരു അപകട സൂചനയാണ്, ഞങ്ങൾ ഇത് ഗൗരവമായി എടുത്തില്ലെങ്കിൽ, മഹാരാഷ്ട്ര വലിയ വില നൽകേണ്ടിവരുമെന്നും അദ്ദേഹം കൂട്ടിച്ചേർത്തു.

ഔദ്യോഗിക കണക്കുകൾ പ്രകാരം കഴിഞ്ഞ കുറച്ച് ദിവസങ്ങളായി മുംബൈയിൽ പ്രതിദിനം 400 ലധികം പുതിയ കോവിഡ് -19 കേസുകൾ റിപ്പോർട്ട് ചെയ്യപ്പെടുന്നുണ്ട്. ഞായറാഴ്ച, മഹാരാഷ്ട്രയിൽ 4,057 കൊറോണ വൈറസ് കേസുകൾ റിപ്പോർട്ട് ചെയ്തു, ഇതോടെ സംസ്ഥാനത്തെ മൊത്തം കൊവിഡ് കേസുകളുടെ എണ്ണം 64,86,174 ആയി ഉയർന്നിട്ടുണ്ട്. 67 പേർ കൂടി രോഗം ബാധിച്ച് മരിച്ചതോടെ കൊവിഡ് മരണങ്ങൾ 1,37,774 ആയി ഉയർന്നതായും ആരോഗ്യ വകുപ്പ് അറിയിച്ചു.

വീണ്ടും ആരാധകരെ ഞെട്ടിച്ച് സംയുക്ത മേനോന്‍; വൈറലായ പുതിയ ഫോട്ടോഷൂട്ട് കാണാം