എന്ഡിഎയില് ഭിന്നത? കൂടുതല് സീറ്റ് ചോദിച്ച് മാഞ്ചിയും ചിരാഗും
പാട്ന: ബിഹാറില് നിയമസഭാ തിരഞ്ഞെടുപ്പ് അടുത്തിരിക്കെ എന്ഡിഎയിലെ സീറ്റ് വിഭജനത്തില് ഭിന്നത. തന്റെ പാര്ട്ടിക്ക് കുറഞ്ഞത് 15 സീറ്റുകള് ലഭിച്ചില്ലെങ്കില് വരാനിരിക്കുന്ന സംസ്ഥാന തിരഞ്ഞെടുപ്പുകളില് തന്റെ പാര്ട്ടി മത്സരിക്കില്ലെന്ന് ഹിന്ദുസ്ഥാനി അവാം മോര്ച്ച (സെക്യുലര്) നേതാവും മുന് ബീഹാര് മുഖ്യമന്ത്രിയുമായ ജിതന് റാം മാഞ്ചി പറഞ്ഞു. തങ്ങള് നിരന്തരം അവഗണന നേരിടുകയാണ് എന്നും അദ്ദേഹം ആരോപിച്ചു.
''ഞങ്ങള്ക്ക് 15 സീറ്റുകള് ലഭിച്ചില്ലെങ്കില്, ഞങ്ങള് തിരഞ്ഞെടുപ്പില് മത്സരിക്കില്ല. ഞങ്ങളെ അപമാനിക്കുന്നതായി തോന്നുന്നു. ഞങ്ങളുടെ ജനങ്ങളെ അവഗണിക്കുകയും ചെയ്തു. ഞങ്ങള് എപ്പോഴും എന്ഡിഎയെ പിന്തുണച്ചിട്ടുണ്ട്; ഞങ്ങളെ ബഹുമാനിക്കുന്നുവെന്ന് ഉറപ്പാക്കേണ്ടത് അവരുടെ കടമയാണ്. പതിനഞ്ച് സീറ്റുകളില് 8-9 സീറ്റുകളില് ഞങ്ങള്ക്ക് ജയിക്കാന് കഴിയും,' അദ്ദേഹം അവകാശപ്പെട്ടു.
എന്നാല് ഈ സീറ്റ് ഫോര്മുല അംഗീകരിച്ചില്ലെങ്കില് 70 ഓളം സീറ്റുകളില് തനിച്ച് മത്സരിക്കുമെന്നും അദ്ദേഹം പറഞ്ഞു. 'സീറ്റ് പങ്കിടല് സംബന്ധിച്ച് ഞങ്ങളുടെ ഭാഗത്ത് നിന്ന് തര്ക്കമൊന്നുമില്ല. നിയമസഭയില് ഞങ്ങളുടെ പാര്ട്ടിക്ക് ഔദ്യോഗിക പദവി ലഭിക്കുന്നതിന് അംഗീകൃത സീറ്റുകള് മാത്രമാണ് ഞങ്ങള് ആവശ്യപ്പെടുന്നത്. ഒരു സീറ്റില് പോലും ഞങ്ങള് മത്സരിച്ചില്ലെങ്കിലും, ഞങ്ങള് എന്ഡിഎയില് തന്നെ തുടരും', അദ്ദേഹം പിന്നീട് പറഞ്ഞു.
അതേസമയം ജിതന് റാം മാഞ്ചിക്ക് പിന്നാലെ ലോക് ജനശക്തി പാര്ട്ടി (റാം വിലാസ്) മേധാവി ചിരാഗ് പാസ്വാനും സീറ്റ് വിഭജനത്തില് അവകാശവാദവുമായി രംഗത്തെത്തിയിട്ടുണ്ട്. എന്ഡിഎയുടെ സീറ്റ് പങ്കിടല് ചട്ടക്കൂടിനുള്ളില് പാര്ശ്വവല്ക്കരണം തന്റെ പാര്ട്ടി അംഗീകരിക്കില്ലെന്ന് പരോക്ഷ മുന്നറിയിപ്പാണ് അദ്ദേഹം നല്കിയിരിക്കുന്നത്. മാഞ്ചിയും പാസ്വാനും എന്ഡിഎയിലെ ദളിത് കേന്ദ്രീകൃത പാര്ട്ടികളുടെ തലവന്മാരാണ്.
ഇരുവരും തങ്ങളുടെ വിലപേശല് ശക്തി ശക്തിപ്പെടുത്താന് മത്സരിക്കുകയാണ്. ദര്ഭംഗയില് നടന്ന ഒരു റാലിയില്, മാഞ്ചി തന്റെ ആവശ്യങ്ങള് ആവര്ത്തിച്ചിരുന്നു. 'ഞങ്ങള്ക്ക് ഇപ്പോള് നാല് എംഎല്എമാര് മാത്രമേയുള്ളൂ. നിയമസഭയില് ഞങ്ങളുടെ ശബ്ദം ശക്തമായി കേള്ക്കാന് ഞങ്ങള്ക്ക് 20 മുതല് 25 വരെ എംഎല്എമാര് വേണം. പെണ്കുട്ടികള്ക്ക് സൗജന്യ വിദ്യാഭ്യാസം, വര്ദ്ധിച്ച സാമൂഹിക പെന്ഷന്, സൗജന്യ ഗാര്ഹിക വൈദ്യുതി എന്നിവ ഉള്പ്പെടെയുള്ള വാഗ്ദാനങ്ങളും അദ്ദേഹം മുന്നോട്ടുവെച്ചിട്ടുണ്ട്.
നവംബര് ആറിനും 11 നും ആണ് ബിഹാര് നിയമസഭാ തിരഞ്ഞെടുപ്പ് നടക്കുക. നവംബര് 14 ന് ഫലം പ്രഖ്യാപിക്കും.
Click it and Unblock the Notifications
Sign in with Google