ഗെലോട്ടല്ല ആര് വന്നാലും പ്രശ്‌നമില്ല; പൊതുസമ്മതനായാല്‍ സമ്മതം, നിലപാടറിയിച്ച് പൃഥ്വിരാജ് ചവാന്‍

മുംബൈ: കോണ്‍ഗ്രസ് അധ്യക്ഷ തിരഞ്ഞെടുപ്പ് അടുത്ത് വരുന്ന സാഹചര്യത്തില്‍ നിലപാട് വ്യക്തമാക്കി മുന്‍ മഹാരാഷ്ട്ര മുഖ്യമന്ത്രി പൃഥ്വിരാജ് ചവാന്‍. അശോക് ഗെലോട്ട് വരുന്നതിനോട് യാതൊരു എതിര്‍പ്പും ജി23 നേതാക്കള്‍ക്കില്ല. ഗെലോട്ടല്ല ആര് വന്നാലും ഞങ്ങള്‍ക്ക് എതിര്‍പ്പില്ല. എന്നാല്‍ പാര്‍ട്ടിക്കുള്ളില്‍ പൊതു സമ്മതനായ നേതാവായിരിക്കണം അധ്യക്ഷനാവേണ്ടത്.

അത് മാത്രമാണ് ഞങ്ങളുടെ ആവശ്യമെന്നും ചവാന്‍ പറഞ്ഞു. പാര്‍ട്ടിക്കുള്ളില്‍ എല്ലാവര്‍ക്കും ഒരു നേതാവിനെ ഇഷ്ടപ്പെടുകയാണെങ്കില്‍, അത് പൊതുസമ്മതനായ സ്ഥാനാര്‍ത്ഥിയാണെങ്കില്‍ ജി23ക്ക് എതിര്‍പ്പില്ല. അങ്ങനെയൊരു സാഹചര്യത്തില്‍ വോട്ടിംഗ് പോലും വേണ്ടെന്നും ചവാന്‍ പറഞ്ഞു.

അശോക് ഗെലോട്ടിന് മത്സരിക്കാന്‍ താല്‍പര്യമുണ്ടെങ്കില്‍ അങ്ങനെ ചെയ്യട്ടെ. പാര്‍ട്ടിയിലുള്ളവരും അദ്ദേഹത്തെ പിന്തുണയ്ക്കുമെന്ന് കരുതുന്നു. എന്തായാലും ആ നേതാവിന് പൊതുസമ്മതി വേണം. ജി23യ്ക്ക് അതില്‍ യാതൊരു എതിര്‍പ്പും ഉണ്ടാവില്ലെന്നും ചവാന്‍ പറഞ്ഞു. അതേസമയം അധ്യക്ഷ തിരഞ്ഞെടുപ്പില്‍ ആര് മത്സരിക്കുമെന്ന കാര്യം ഇപ്പോഴും തീരുമാനിച്ചിട്ടില്ല.

ഗാന്ധി കുടുംബത്തിലെ ആര്‍ക്കും മത്സരിക്കാന്‍ താല്‍പര്യമില്ല. തിരിച്ചുവരില്ലെന്നാണ് രാഹുല്‍ ഗാന്ധി പറഞ്ഞിരിക്കുന്നത്. എന്നാല്‍ നേതാക്കള്‍ ചേര്‍ന്ന് അദ്ദേഹത്തെ അനുനയിപ്പിക്കാനുള്ള ശ്രമത്തിലാണ്. എന്നാല്‍ ഗാന്ധി കുടുംബത്തില്‍ നിന്നുള്ള ആരും മത്സരിക്കില്ലെന്നാണ് അറിയിച്ചിരിക്കുന്നത്.

കോണ്‍ഗ്രസ് എംപി ശശി തരൂര്‍ മത്സരിക്കാനുള്ള താല്‍പര്യം നേരത്തെ അറിയിച്ചിരുന്നു. ഒന്നിലധികം സ്ഥാനാര്‍ത്ഥികള്‍ അധ്യക്ഷ സ്ഥാനത്തേക്ക് മത്സരിക്കുമെന്നും തരൂര്‍ പറഞ്ഞിരുന്നു. ജി23 നേതാക്കള്‍ക്കിടയില്‍ നിന്ന് തരൂരായിരിക്കും മത്സരിക്കുന്നയാള്‍ എന്ന സൂചനയുമുണ്ടായിരുന്നു.

പാര്‍ട്ടിയുടെ പ്രവര്‍ത്തന രീതിയില്‍ മാറ്റം വേണമെന്ന് ആവശ്യപ്പെട്ട നേതാക്കളിലൊരാളാണ് തരൂര്‍. അതേസമയം ഇലക്ടറല്‍ റോളുകള്‍ പരസ്യമാക്കണമെന്നും തരൂര്‍ നേരത്തെ ആവശ്യപ്പെട്ടിരുന്നു. തിരഞ്ഞെടുപ്പില്‍ കൃത്രിമം നടക്കാന്‍ സാധ്യതയുണ്ടെന്ന ആരോപണമാണ് ഉന്നയിച്ചിരിക്കുന്നത്. മുമ്പ് സോണിയാ ഗാന്ധി മത്സരിച്ചപ്പോഴും ഇതേ ആരോപണങ്ങള്‍ ഉയര്‍ന്നിരുന്നു.

പല വോട്ടുകളും വ്യാജമായി ഉണ്ടാക്കുന്നതാണെന്ന് കോണ്‍ഗ്രസിനുള്ളില്‍ തന്നെ പല നേതാക്കളും കരുതുന്നുണ്ട്. ഇല്ലാത്ത പ്രവര്‍ത്തകരുടെ വോട്ടാണ് ബാലറ്റില്‍ കാണിക്കുന്നതെന്നും ചിലര്‍ ഉന്നയിക്കുന്നുണ്ട്. പൃഥ്വിരാജ് ചവാനും ഇലക്ടറല്‍ റോള്‍ പരസ്യമാക്കണമെന്ന് ആവശ്യപ്പെട്ടിട്ടുണ്ട്. ഇത് എല്ലാ വോട്ടിംഗ് അംഗങ്ങള്‍ക്കും ഇമെയിലിലൂടെ അയക്കണം.

പാര്‍ട്ടി വെബ് സൈറ്റില്‍ ഇത് പ്രസിദ്ധീകരിക്കണം. ഇത് തിരഞ്ഞെടുപ്പിലെ സുതാര്യത വര്‍ധിപ്പിക്കാനാണ്. സാധാരണ കോണ്‍ഗ്രസ് പ്രവര്‍ത്തകര്‍ക്കിടയില്‍ ഇത് ആത്മവിശ്വാസം വര്‍ധിപ്പിക്കുമെന്നും പൃഥ്വിരാജ് ചവാന്‍ പറഞ്ഞു. ഇതേ ആവശ്യം മനീഷ് തിവാരിയും, കാര്‍ത്തി ചിദംബരവും ഉന്നയിച്ചിട്ടുണ്ട്.

English summary

congress president candidate will be made by consensus says prithviraj chavan