മൈസൂര്‍ മഹാരാജാവിന് തിങ്കളാഴ്ച മാംഗല്യം; യദുവീറിന് വധു ത്രിശിക, വിവാഹ വിശേഷങ്ങളിതാ...

മൈസൂര്‍: മൈസൂര്‍ മഹാരാജാവിന് വിവാഹം. ജൂണ്‍ 27 തിങ്കളാഴ്ചയാണ് വിവാഹം. മൈസൂര്‍ രാജകുടുംബത്തിലെ ഇളമുറക്കാരനും സ്ഥാനം കൊണ്ട് മഹാരാജാവുമായ യദുവീറിന് ത്രിശികയാണ് വധു. തിങ്കളാഴ്ചയാണ് താലികെട്ടെങ്കിലും വിവാഹത്തിന്റെ ചടങ്ങുകള്‍ തുടങ്ങിക്കഴിഞ്ഞു. 29 ബുധനാഴ്ച വരെ നീളും ഈ ചടങ്ങുകള്‍. മൈസൂര്‍ രാജകൊട്ടാരത്തിലെ കല്യാണ മണ്ഡപത്തില്‍ തിങ്കളാഴ്ച രാവിലെ 9.05 നും 9.40നും ഇടയിലാണ് മുഹൂര്‍ത്തം.

24 വയസ്സേ ആയിട്ടുള്ളു മൈസൂര്‍ മഹാരാജാവ് യദുവീര്‍ കൃഷ്ണദത്ത ചാമരാജ വാഡിയാര്‍ക്ക്. 1976 ന് ശേഷം കൊട്ടാരത്തില്‍ നടക്കുന്ന രാജവിവാഹമാണിത്. ഏപ്രില്‍ 25നാണ് യദുവീറും ത്രിശിക കുമാരിയുമായുള്ള വിവാഹം നിശ്ചയിച്ചത്. ജൂണ്‍ 25 ശനിയാഴ്ച രാവിലെ എണ്ണ സ്‌നാനത്തോടെയാണ് യദുവീര്‍ വിവാഹത്തിന് ഒരുങ്ങുന്ന ചടങ്ങുകള്‍ തുടങ്ങുക. പിന്നീട് ശ്രീ പാറക്കല്‍ മഠത്തില്‍ പാദപൂജ ചെയ്യും.

ഞായറാഴ്ചയാണ് കാശിയാത്ര എന്ന് പേരിട്ട ചടങ്ങ്. രാജകുടുംബാംഗങ്ങളും ക്ഷണിക്കപ്പെട്ട അതിഥികളും മാത്രമേ ഈ ചടങ്ങിനുണ്ടാകൂ. 27 ന് രാവിലെ 9.05 നും 9.40നും ഇടയിലാണ് വിവാഹത്തിനുള്ള ശുഭമുഹൂര്‍ത്തം. 28ന് വൈകിട്ട് ഏഴര മുതല്‍ സല്‍ക്കാരം. മൈസൂര്‍ കൊട്ടാരത്തിലെ ദര്‍ബാര്‍ ഹാളിലാണ് റിസപ്ഷന്‍. ജൂലൈ 2ന് ബെംഗളൂരു കൊട്ടാരത്തില്‍ വിശിഷ്ടാതിഥികള്‍ക്ക് വേണ്ടി റിസപ്ഷന്‍. 1500നും 2000നും ഇടയില്‍ അതിഥികള്‍ ഇവിടെയെത്തും.

പ്രധാനമന്ത്രി നരേന്ദ്ര മോദി, പ്രസിഡണ്ട് പ്രണാബ് മുഖര്‍ജി, മുഖ്യമന്ത്രി സിദ്ധരാമയ്യ തുടങ്ങിയ പ്രമുഖരെയെല്ലാം വിവാഹത്തിന് ക്ഷണിച്ചിട്ടുള്ളതായി മഹാറാണി പ്രമോദ ദേവി വാഡിയാര്‍ പറഞ്ഞു. കേന്ദ്ര സംസ്ഥാന മന്ത്രിമാരും വിവിധ പാര്‍ട്ടി നേതാക്കളും വിവാഹത്തിന് എത്തുമെന്ന് പ്രതീക്ഷിക്കപ്പെടുന്നു. മഹാറാണി പ്രമോദ ദേവി വാഡിയാറാണ് യദുവീറിനുള്ള വിവാഹ വസ്ത്രം ഡിസൈന്‍ ചെയ്തിരിക്കുന്നത്.

English summary

Preparations are going on in full swing at the Mysuru Palace for the royal wedding of 27th scion of the 600-year-old Wadiyar dynasty, 24-year-old Yaduveer Krishnadatta Chamaraja Wadiyar and his fiancee Trishika Kumari.