നിറഞ്ഞുകവിഞ്ഞ് പ്രാദേശിക പത്രങ്ങളിലെ ചരമപേജ്: ഗുജറാത്തിൽ കൊവിഡ് മരണത്തിൽ പൊരുത്തക്കേടെന്ന് റിപ്പോർട്ട്

Updated: Monday, May 10, 2021, 18:19 [IST]

അഹമ്മദാബാദ്: ഇന്ത്യയിൽ കൊവിഡ് വ്യാപനം രൂക്ഷമായി തുടരുന്ന സാഹചര്യത്തിൽ ഗുജറാത്തിലെ മരണസംഖ്യയിൽ പൊരുത്തക്കേടുണ്ടെന്ന് റിപ്പോർട്ട്. ഗുജറാത്തിലെ പ്രാദേശിക പത്രങ്ങളിൽ കൊവിഡ് മരണസംഖ്യ ക്രമാനുഗതമായി വർദ്ധിച്ചുകൊണ്ടിരിക്കുകയാണെന്ന സൂചനകളാണ് നൽകുന്നത്. കഴിഞ്ഞ കുറച്ച് ദിവസങ്ങളായി ഗുജറാത്തിലെ സൗരാഷ്ട്ര മേഖലയിലെ പ്രധാന ദിനപത്രങ്ങളിൽ 16 പേജുകളിൽ ഏഴെണ്ണവും മരണാനന്തര അറിയിപ്പുകൾക്കും അനുശോചന കുറിപ്പുകൾക്കുമായാണ് നീക്കിവച്ചിട്ടുള്ളത്.

അതേ സമയം കഴിഞ്ഞ മൂന്ന് ദിവസമായി ഗുജറാത്തിൽ കേസുകളും മരണങ്ങളും കുറവാണ് റിപ്പോർട്ട് ചെയ്യുന്നത്. എന്നാൽ പത്രങ്ങളിലെ മരണവും അനുശോചന സന്ദേശങ്ങളും കൂടുതലായി പുറത്തുവരുന്നതാണ് ഔദ്യോഗിക കണക്കുകൾ സംബന്ധിച്ച് സംശയം ജനിപ്പിക്കുന്നത്. സൗരാഷ്ട്ര ഭാസ്‌കറിന്റെ ഭാവ് നഗർ പതിപ്പിൽ മാത്രം ഒരു ദിവസം മാത്രം 200 ഓളം ചരമവാർത്തയാണ് പ്രസിദ്ധീകരിച്ചിട്ടുള്ളത്. മാസത്തിൽ 30 എന്ന കണക്കിൽ നിന്നാണ് ദിവസേന 200ലേക്ക് വർധിച്ചിട്ടുള്ളത്.

തമിഴ്നാട്ടിൽ സമ്പൂർണ ലോക്ക്ഡൗൺ... ചിത്രങ്ങളിലൂടെ

ഗുജറാത്തിൽ കഴിഞ്ഞ 24 മണിക്കൂറിനുള്ളിൽ 11,800 പുതിയ കൊവിഡ് -19 കേസുകളാണ് റിപ്പോർട്ട് ചെയ്തിട്ടുള്ളത്. രോഗമുക്തി നേടിയവരുടെ എണ്ണം 14,000 ലേക്ക് ഉയർന്നിട്ടുണ്ട്. അതേ സമയം ഔദ്യോഗിക കണക്കുകൾ പ്രകാരം കൊവിഡ് ബാധിച്ച് മരിച്ചവരുടെ എണ്ണം 119 ആണ്. എന്നാൽ സംസ്ഥാനത്തെ മരണസംഖ്യ കുറവാണോ എന്ന ചോദ്യത്തിന് മറ്റ് രോഗാവസ്ഥകൾ മൂലമുള്ള മരണം ഔദ്യോഗിക മരണത്തിൽ ഉൾപ്പെടുത്തില്ലെന്നാണ് ഗുജറാത്ത് മുഖ്യമന്ത്രി വിജയ് രുപാനിയുടെ പ്രതികരണം.