സരസ്വതി ദേവീ അറിവാണ് പകര്ന്നത്, വിവേചനമല്ല; ഹിജാബ് വിവാദത്തില് രാഹുല് ഗാന്ധി
ന്യൂദല്ഹി: കര്ണാടകയിലെ ഹിജാബ് വിവാദത്തില് പ്രതികരണവുമായി കോണ്ഗ്രസ് നേതാവും എം പിയുമായ രാഹുല് ഗാന്ധി. സരസ്വതി ദേവി എല്ലാവര്ക്കും അറിവ് നല്കുന്നുവെന്നും ആരോടും വേര്തിരിവ് കാണിക്കുന്നില്ലെന്നും രാഹുല് ഗാന്ധി പറഞ്ഞു. സരസ്വതി പൂജയുടെ ദിവസം ഓര്മിപ്പിച്ച് കൊണ്ടാണ് രാഹുല് ഗാന്ധിയുടെ പ്രതികരണം. വിദ്യാര്ഥികളുടെ ഹിജാബ് അവരുടെ വിദ്യാഭ്യാസത്തിന് തടസമാകുന്നുണ്ടെങ്കില് അതിലൂടെ നാം ഇന്ത്യയുടെ പെണ്മക്കളുടെ ഭാവി കവര്ന്നെടുക്കുകയാണെന്നും അദ്ദേഹം കൂട്ടിച്ചേര്ത്തു.
കര്ണാടക കോളേജുകളിലെ ഹിജാബ് നിരോധനത്തിനെതിരെ കശ്മീര് മുന് മുഖ്യമന്ത്രിമാരായ മെഹ്ബൂബ മുഫ്തി, ഒമര് അബ്ദുല്ല എന്നിവരും രംഗത്തെത്തിയിട്ടുണ്ട്. വ്യക്തികള്ക്ക് സ്വന്തം വസ്ത്രം തെരഞ്ഞെടുക്കാന് സ്വാതന്ത്ര്യമുണ്ടെന്നായിരുന്നു ഒമര് അബ്ദുല്ലയുടെ പ്രതികരണം. ഉത്തര്പ്രദേശ് മുഖ്യമന്ത്രി യോഗി ആദിത്യനാഥ്, പ്രഗ്യ സിംഗ് ഠാക്കൂര് എന്നിവരുടെ ചിത്രങ്ങള് ട്വീറ്റ് ചെയ്തുകൊണ്ട്, ഇവര്ക്ക് കാവി ധരിക്കാമെങ്കില് പെണ്കുട്ടികള്ക്ക് ഹിജാബ് ധരിക്കാമെന്നായിരുന്നു അദ്ദേഹം പ്രതികരിച്ചത്.
സംസ്ഥാനത്തെ പ്രതിപക്ഷ നേതാവായ സിദ്ധരാമയ്യ ഹിജാബ് ധരിച്ചെത്തിയ പെണ്കുട്ടികള്ക്ക് കോളജില് പ്രവേശനം നിഷേധിക്കുന്നത് മനുഷ്യത്വരഹിതവും മൗലികാവകാശങ്ങളുടെ ലംഘനവുമാണെന്ന് അഭിപ്രായപ്പെട്ടിരുന്നു. ഭരണകക്ഷിയായ ബി ജെ പി സംഭവവികാസങ്ങള് നിരീക്ഷിച്ചു വരികയാണെന്നും ഹിജാബ് വിഷയത്തില് ഉചിതമായ തീരുമാനം കൈക്കൊള്ളുമെന്നും മുന് മുഖ്യമന്ത്രി ബി.എസ് യെദിയൂരപ്പ അഭിപ്രായപ്പെട്ടത്.
ഹിജാബ് ധരിച്ചതിന്റെ പേരില് കര്ണാടകയിലെ പ്രീ യൂണിവേഴ്സിറ്റി കോളേജില് നിന്നും വിദ്യാര്ഥിനികളെ പുറത്താക്കിയിരുന്നു. നിലവില് ഹിജാബ് (ശിരോവസ്ത്രം) ധരിച്ചതിന്റെ പേരില് കര്ണാടകയിലെ പ്രീ യൂണിവേഴ്സിറ്റി കോളേജില് നിന്നും പുറത്താക്കപ്പെട്ട വിദ്യാര്ത്ഥിനികള്ക്ക് ഹൈക്കോടതി വിധി വരുന്നത് വരെ കോളേജില് പ്രവേശിക്കാനാവില്ല. മുഖ്യമന്ത്രി ബസവരാജ് ബൊമ്മെയുടെ നേതൃത്വത്തില് ചേര്ന്ന യോഗത്തില് കര്ണാടകയിലെ വിദ്യാഭ്യാസ സ്ഥാപനങ്ങള്ക്ക് നിലവിലുള്ള യൂണിഫോം നിബന്ധന തുടരാന് നിര്ദേശം നല്കിയിട്ടുണ്ട്. കര്ണാടകയില് വിവിധയിടങ്ങളില് ഹിജാബ് ധരിച്ചെത്തിയ വിദ്യാര്ത്ഥിനികളെ തടയുന്ന സംഭവം പതിവായതോടെ സ്കൂളുകളിലും കോളേജുകളിലും ശിരോവസ്ത്രം നിരോധിച്ച് സര്ക്കാര് ഉത്തരവിറക്കിയിരുന്നു.
ഹിജാബ് നിരോധിച്ചത് മൗലികാവകാശങ്ങളുടെ ലംഘനമെന്ന് ചൂണ്ടിക്കാട്ടി ഉഡുപ്പി വനിതാ കോളേജിലെ വിദ്യാര്ത്ഥികളാണ് ഹൈക്കോടതിയില് ഹര്ജി നല്കിയത്. ഹിജാബ് നിരോധിച്ചത് മതസ്വാതന്ത്രത്തിനുള്ള അവകാശം നിഷേധിച്ചതിന് തുല്യമാണെന്ന് വിദ്യാര്ത്ഥികള് പറയുന്നു. കര്ണാടകയിലെ ഉഡുപ്പിയിലെ തീരദേശ പട്ടണമായ കുന്ദാപൂരിലെ ഭണ്ഡാര്ക്കേഴ്സ് ആര്ട്സ് ആന്ഡ് സയന്സ് ഡിഗ്രി കോളേജിന്റെ ഗേറ്റിന് മുന്നില് ഹിജാബ് ധരിച്ച് 40 ഓളം വനിതാ വിദ്യാര്ത്ഥിനികള് പ്രതിഷേധിച്ചിരുന്നു. ശിരോവസ്ത്രം ധരിക്കാന് നിര്ബന്ധിച്ചതിന് തങ്ങളെ ക്ലാസുകളില് നിന്ന് തടഞ്ഞുവെന്ന് ആരോപിച്ച് ആറ് വിദ്യാര്ത്ഥിനികള് ഉഡുപ്പി ജില്ലയിലെ ഗവണ്മെന്റ് ഗേള്സ് പിയു കോളേജില് ആഴ്ചകള്ക്ക് മുമ്പ് ഹിജാബ് പ്രതിഷേധം ആരംഭിച്ചിരുന്നു.
Click it and Unblock the Notifications
Sign in with Google