കൗമാരക്കാരി ഇരട്ടക്കുട്ടികള്‍ക്ക് ജന്മം നല്‍കി, രണ്ട് കുട്ടികളുടേയും അച്ഛന്‍മാര്‍ രണ്ട്..! അപൂര്‍വം

റിയോ ഡി ജനീറോ: ഇരട്ടക്കുട്ടികള്‍ ജനിക്കുന്നത് ഇന്ന് അത്ര അസാധാരണമല്ല. ചിലപ്പോഴൊക്കെ സയാമീസ് ഇരട്ടകളും ജനിക്കാറുണ്ട്. എന്നാല്‍ ഇരട്ടകള്‍ക്ക് രണ്ട് പേര്‍ക്ക് രണ്ട് അച്ഛന്‍മാരുണ്ടാകുമോ!?. അമ്പരക്കേണ്ട അത്തരമൊരു വാര്‍ത്തയാണ് ബ്രസീലില്‍ നിന്ന് പുറത്തുവരുന്നു എന്ന് അന്താരാഷ്ട്ര മാധ്യമങ്ങള്‍ പറയുന്നത്. ബ്രസീലില്‍ നിന്നുള്ള 19 വയസുള്ള ഒരു കൗമാരക്കാരിയാണ് ഒന്നര വര്‍ഷം മുന്‍പ് ഇരട്ടക്കുട്ടികളെ പ്രസവിച്ചത്.

ഗോയാസിലെ മിനേറിയോസ് സ്വദേശിയായ അജ്ഞാതയായ സ്ത്രീ ഒരേ ദിവസം രണ്ട് പുരുഷന്മാരുമായി ലൈംഗിക ബന്ധത്തില്‍ ഏര്‍പ്പെട്ട് ഒമ്പത് മാസത്തിന് ശേഷമാണ് ഇരട്ടക്കുട്ടികള്‍ക്ക് ജന്മം നല്‍കിയത്. ഇരട്ടക്കുട്ടികളുടെ പിതാവ് ആരെന്ന കാര്യത്തില്‍ സംശയം തോന്നിയതോടെയാണ്, സംശയം ദൂരീകരിക്കാന്‍ യുവതി കുട്ടികളുടെ പിതൃത്വ പരിശോധന നടത്തിയത്.

വാര്‍ത്താ ഏജന്‍സിയായ ഗ്ലോബോ ആണ് ഈ അപൂര്‍വ വാര്‍ത്ത റിപ്പോര്‍ട്ട് ചെയ്തിരിക്കുന്നത്. താന്‍ പിതാവാണെന്ന് കരുതുന്ന ആളുടെ ഡി എന്‍ എ പരിശോധനയില്‍ ഒരു കുഞ്ഞിന് മാത്രം പോസിറ്റീവ് ആയപ്പോള്‍ താന്‍ സ്തംഭിച്ച് പോയി എന്ന് കൗമാരക്കാരിയായ അമ്മ പറയുന്നു. അതേസമയം രണ്ട് വ്യത്യസ്ത പുരുഷന്മാരാല്‍ ഗര്‍ഭം ധരിച്ചിട്ടും ഒറ്റ പ്രസവത്തില്‍ ജനിച്ചിട്ടും കുഞ്ഞുങ്ങള്‍ വളരെ സാമ്യമുള്ളതായി കാണപ്പെടുന്നുവെന്ന് ഇവര്‍ പറഞ്ഞു.

ഞാന്‍ മറ്റൊരു പുരുഷനുമായി ലൈംഗിക ബന്ധത്തില്‍ ഏര്‍പ്പെട്ടത് പെട്ടെന്ന് എനിക്ക് ഓര്‍മ വന്നു. ഇതോടെ അയാളെ പരിശോധിച്ചു.അത് പോസിറ്റീവായിരുന്നു. ഫലങ്ങള്‍ എന്നെ അത്ഭുതപ്പെടുത്തി. ഇത് സംഭവിക്കുമെന്ന് തനിക്കറിയില്ലായിരുന്നു എന്നും കുട്ടികള്‍ വളരെ സാമ്യമുള്ളവരാണ് എന്നും അമ്മ പ്രാദേശിക മാധ്യമങ്ങളോട് പറഞ്ഞു.

അതേസമയം ഇത്തരം ഗര്‍ഭധാരണം അപൂര്‍വമാണെങ്കിലും അസാധ്യമല്ല എന്നാണ് വിദഗ്ധര്‍ പറയുന്നത്. 'ഒരു ദശലക്ഷത്തില്‍ ഒരാള്‍ക്ക്' മാത്രം സംഭവിക്കുന്ന അപൂര്‍വ ഗര്‍ഭധാരണമാണിത്. ശാസ്ത്രീയമായി, ഇതിനെ ഹെട്രോപാരന്റല്‍ സൂപ്പര്‍ഫെകണ്ടേഷന്‍ എന്നാണ് വിളിക്കുന്നത്. ഒരേ അമ്മയുടെ രണ്ട് അണ്ഡങ്ങളുമായി വ്യത്യസ്ത പുരുഷന്മാരുടെ ബീജസങ്കലനം ഉണ്ടാകുമ്പോള്‍ ഇത് സംഭവിക്കാം. കുഞ്ഞുങ്ങള്‍ അമ്മയുടെ ജനിതക സാമഗ്രികള്‍ പങ്കിടുന്നു, എന്ന് സ്ത്രീയുടെ ഫിസിഷ്യനായ ഡോ ടുലിയോ ജോര്‍ജ് പറഞ്ഞു.

ഇത്തരം കേസുകളില്‍ അങ്ങേയറ്റത്തെ അപൂര്‍വതയാണ് ഉള്ളത് എന്നും അതിനാലാണ് ഇതിനെ 'ഒരു ദശലക്ഷത്തില്‍ ഒരാള്‍ക്ക്' എന്ന് വിശേഷിപ്പിക്കുന്നത് എന്നും അദ്ദേഹം പറഞ്ഞു. റിപ്പോര്‍ട്ടുകള്‍ പ്രകാരം, ആകെ 20 ഹെറ്ററോപാരന്റല്‍ സൂപ്പര്‍ഫെകന്‍ഡേഷനുകള്‍ മാത്രമേ ലോകത്തുള്ളൂ. ബ്രസീലിലെ കൗമാരക്കാരിയുടെ കുഞ്ഞുങ്ങള്‍ക്ക് നിലവില്‍ 16 മാസം പ്രായമുണ്ട്. ഒരു പിതാവാണ് അവരെ പരിപാലിക്കുന്നതെന്ന് അമ്മ പറയുന്നു.

'അദ്ദേഹം ഇരുവരെയും പരിപാലിക്കുന്നു, എന്നെ വളരെയധികം സഹായിക്കുന്നു. ആവശ്യമായ എല്ലാ പിന്തുണയും നല്‍കുന്നു,' അമ്മ പറഞ്ഞു. അതേസമയം ഇരട്ടക്കുട്ടികളുടെ ജനന സര്‍ട്ടിഫിക്കറ്റില്‍ ഒരാളുടെ പേര് മാത്രമേ ചേര്‍ക്കൂ എന്നാണ് പുറത്ത് വരുന്ന റിപ്പോര്‍ട്ടുകളില്‍ പറയുന്നത്. ഏതായാലും സംഭവം വൈദ്യശാസ്ത്രരംഗത്ത് വലിയ വാര്‍ത്തയായിട്ടുണ്ട്.

English summary

Teenage girl gave birth to twins, both children's have different fathers, extremely rare case