തുരത്താന്‍ വന്ന വനപാലകരെ പേടിപ്പിച്ച് മരത്തില്‍ കയറ്റി; 11 മണിക്കൂറിന് ശേഷം കാട് കയറി കാട്ടാനകള്‍

ഇരിട്ടി: ആറളം പാലത്തിന് സമീപം ജനവാസ കേന്ദ്രത്തില്‍ 11 മണിക്കൂറോളം ഭീതി വിതച്ച കാട്ടാനകളെ തുരത്തിയോടിച്ചു. ആറളം പാലത്തിനും ചാക്കാടിനും ഇടയില്‍ പുഴയിലെ തുരുത്തിലാണ് ഇന്നലെ 7 മണിക്ക് രണ്ട് കാട്ടാനകളെ കണ്ടത്. ഇന്ന് വൈകിട്ട് 6 മണിയോടെയാണ് കാട്ടാനകളെ ആറളം ഫാം വഴി തുരത്താനായത്.

പ്രതീകാത്മക ചിത്രം

ഫാമില്‍ തമ്പടിച്ച കാട്ടാനകളെ തുരത്താന്‍ മാസങ്ങളായി വനം വകുപ്പ് ശ്രമം നടത്തി വരികയായിരുന്നു. ഇതിനിടെയാണ് ഇവിടെ നിന്നുള്ള ആനകള്‍ 10 കിലോമീറ്റര്‍ ദൂരം മറികടന്നു ജനവാസ കേന്ദ്രത്തിലലേക്ക് കടന്ന് കയറിയത്. ജനസാന്ദ്രത കൂടുതല്‍ ഉള്ള മേഖല ആയതിനാല്‍ ഏറെ ജാഗ്രതയോടെയാണ് ആന തുരത്തല്‍ ആസൂത്രണം ചെയ്തത്.

പടക്കം പൊട്ടിച്ച് തുരുത്തില്‍ നിന്നു ആനകളെ പുറത്തിറക്കാനുള്ള നീക്കം നടത്തുന്നതിനിടെ 2 ആനകളും വനപാലകര്‍ക്കു നേരെ തിരിഞ്ഞു. ഇത് എല്ലാവരേയും ആശങ്കയിലാഴ്ത്തി. നിരവധി തവണ ആനകള്‍ തിരിച്ചുപോവുന്നതായി ഭാവിച്ചെങ്കിലും വീണ്ടും തിരിച്ചുവന്ന് ആദ്യം നിന്ന സ്ഥലത്ത് തന്നെ തമ്പടിച്ചു. ഇത് വനപാലകരെ പ്രതിസന്ധിയിലാക്കി.

തുടര്‍ച്ചയായ ശ്രമങ്ങള്‍ക്കൊടുവില്‍ 6 മണിയോടെ ആണ് കാട്ടാനകളെ ജനവാസ കേന്ദ്രത്തില്‍ നിന്നു ഓടിക്കാനായത്. മുന്‍പ് സ്ഥിരമായി ഈ മേഖലകളില്‍ കാട്ടാന എത്താറുണ്ടായിരുന്നു. എന്നാല്‍ സൗരോര്‍ജ വൈദ്യുതി വേലി സ്ഥാപിച്ചതോടെ കാട്ടാന കയറുന്നത് കുറഞ്ഞിരുന്നു.

ഒരു വര്‍ഷത്തിന് ഇടയില്‍ ഇത് രണ്ടാം തവണയാണ് രണ്ട് കൊമ്പനാനകളും ആറളം പലത്തിന് സമീപം ജനവാസമേഖലയിലേക്ക് എത്തുന്നത്. ആറളം പുഴ തുരുത്തില്‍ നിന്നും എളുപ്പത്തില്‍ മുഴക്കുന്ന് പഞ്ചായത്തിന്റെ ഭാഗങ്ങളിലേക്കും ആറളത്തെ ജനവാസമേഖലയിലേക്കും പ്രവേശിക്കാന്‍ കഴിയും എന്നതിനാല്‍ ഈ വഴി കാട്ടാനകള്‍ക്ക് തടസം കൂടാതെ സഞ്ചരിക്കാം.

കൊട്ടിയൂര്‍ റേഞ്ചര്‍ സുധീര്‍ നെരോത്ത്, ഇരിട്ടി ഫോറസ്റ്റര്‍ കെ. ജിജില്‍ എന്നിവരുടെ നേതൃത്വത്തില്‍ വനം വകുപ്പിന്റെ ആര്‍ ആര്‍ ടിയും വാച്ചര്‍മാരും നാട്ടുകാരും ചേര്‍ന്നാണ് ആനകളെ തുരത്തിയോടിച്ചത്.

English summary

Kannur: after11 hours, wild elephants were chased away from Aralam bridge