അമ്മമാരുടെ കണ്ണുനിറയിക്കുന്ന ദൃശ്യങ്ങള്‍...കൊച്ചിയിലെ 'കളിവീടില്‍' കുഞ്ഞുങ്ങളോട് ക്രൂരത...

കുട്ടികളുടെ ശരീരത്തില്‍ പാടുകള്‍ കണ്ടതോടെയാണ് രക്ഷിതാക്കള്‍ക്ക് ഇതുസംബന്ധിച്ച് സംശയം തോന്നിതുടങ്ങിയത്.

Published: Tuesday, May 23, 2017, 11:19 [IST]

കൊച്ചി: നഗരത്തിലെ ഡേകെയറില്‍ പിഞ്ചുകുഞ്ഞുങ്ങളെ ക്രൂരമായി മര്‍ദ്ദിക്കുന്ന ദൃശ്യങ്ങള്‍ പുറത്തായി. ഏഷ്യാനെറ്റ് ന്യൂസ് ചാനലാണ് കൊച്ചി പാലാരിവട്ടത്തെ കളിവീട് ഡേകെയര്‍ സെന്ററില്‍ നിന്നുള്ള ഞെട്ടിക്കുന്ന ദൃശ്യങ്ങള്‍ പുറത്തുവിട്ടിരിക്കുന്നത്. ഡേകെയര്‍ സെന്ററിലെത്തിയ ഒന്നരവയസുകാരനെ സ്ഥാപനമുടമ മിനി ക്രൂരമായി മര്‍ദ്ദിക്കുന്നതാണ് ദൃശ്യങ്ങളിലുള്ളത്.

ഇത് ഒറ്റപ്പെട്ട സംഭവമല്ലെന്നും, ഡേകെയറിലെത്തുന്ന മറ്റു ഇരുപതോളം കുട്ടികളെയും ഇവര്‍ ഇത്തരത്തില്‍ മര്‍ദ്ദിക്കാറുണ്ടെന്നും സ്ഥാപനത്തിലെ ജീവനക്കാരി വെളിപ്പെടുത്തിയതായി ഏഷ്യാനെറ്റ് ന്യൂസ് കൊച്ചി റിപ്പോര്‍ട്ടര്‍ വികെ സോന റിപ്പോര്‍ട്ട് ചെയ്യുന്നു. കുട്ടികളുടെ ശരീരത്തില്‍ പാടുകള്‍ കണ്ടതോടെയാണ് രക്ഷിതാക്കള്‍ക്ക് ഇതുസംബന്ധിച്ച് സംശയം തോന്നിതുടങ്ങിയത്.

കൊച്ചി പാലാരിവട്ടത്തെ കളിവീട്...

കൊച്ചി പാലാരിവട്ടത്തെ കളിവീട് ഡേകെയര്‍ സെന്ററില്‍ നിന്നുള്ള ഞെട്ടിക്കുന്ന ദൃശ്യങ്ങളാണ് ഏഷ്യാനെറ്റ് ന്യൂസ് പുറത്തുവിട്ടിരിക്കുന്നത്. കളിവീടിന്റെ നടത്തിപ്പുകാരി ഡേകെയറിലെ ഒന്നരവയസുകാരനെ ക്രൂരമായി മര്‍ദ്ദിക്കുന്നതാണ് ദൃശ്യങ്ങളിലുള്ളത്.

മറ്റു കുട്ടികളെയും...

ഒന്നരവയസുകാരനെ മര്‍ദ്ദിക്കുന്നത് ഒറ്റപ്പെട്ട സംഭവമല്ലെന്നാണ് സ്ഥാപനത്തിലെ ജീവനക്കാരി വെളിപ്പെടുത്തിയിരിക്കുന്നത്. മിനി സ്ഥിരമായി കുഞ്ഞുങ്ങളെ അടിക്കാറുണ്ടെന്ന് ഡേകെയറിലെ നാലുവയസുകാരനും പറഞ്ഞു.

മായ്ക്കാന്‍ പറയും...

കുഞ്ഞുങ്ങളെ മര്‍ദ്ദിക്കുന്ന സ്ഥാപനമുടമ മിനി, അടികൊണ്ട് കുഞ്ഞുങ്ങളുടെ ശരീരത്തിലുണ്ടാകുന്ന പാടുകള്‍ മായ്ക്കാന്‍ പറയാറുണ്ടെന്നും ജീവനക്കാരി വെളിപ്പെടുത്തിയിട്ടുണ്ട്.

രക്ഷിതാക്കള്‍ക്ക് സംശയം...

കുട്ടികളുടെ ശരീരത്തിലെ പാടുകള്‍ കണ്ടതോടെയാണ് ഡേകെയര്‍ സെന്ററില്‍ നിന്ന് മര്‍ദ്ദനമേല്‍ക്കുന്നതായി രക്ഷിതാകള്‍ക്ക് സംശയം തോന്നിയത്. ഡേകെയറില്‍ പോകാന്‍ കുഞ്ഞുങ്ങള്‍ മടികാണിക്കുന്നതും, ടീച്ചറെ കാണുമ്പോള്‍ ഭയക്കുന്നതുമെല്ലാം സംശയം ഇരട്ടിപ്പിച്ചു.

3500 രൂപവരെ പ്രവേശന ഫീസ്...

കുട്ടികളുടെ ശരീരത്തിലെ പാടുകളെക്കുറിച്ച് ചോദിച്ചപ്പോള്‍, അത് വീണപ്പോഴുണ്ടായതാണെന്നും കുട്ടികളെ മര്‍ദ്ദിക്കാറിലെന്നുമായിരുന്നു മിനിയുടെ മറുപടിയെന്ന് രക്ഷിതാക്കളും പറയുന്നു. ഒരു മാസത്തേക്ക് 1500 രൂപ മുതല്‍ 3500 രൂപ വരെ ഫീസ് വാങ്ങിയാണ് ഇവിടെ കുട്ടികളെ പ്രവേശിപ്പിക്കുന്നത്.

രക്ഷിതാക്കളുടെ പ്രതിഷേധം...

വാര്‍ത്തയെ തുടര്‍ന്ന് ഡേകെയറിലെത്തിയ രക്ഷിതാക്കള്‍ പ്രതിഷേധിച്ചു. ആദ്യം സംഭവം നിഷേധിച്ച മിനി ദൃശ്യങ്ങള്‍ കാണിച്ചതോടെ മൗനം പാലിക്കുകയായിരുന്നു. സംഭവമറിഞ്ഞ് പൊതുപ്രവര്‍ത്തകരും നാട്ടുകാരും സ്ഥലത്തെത്തിയിരുന്നു. ഡേകെയര്‍ ഉടമ മിനിയെ പിന്നീട് പോലീസ് കസ്റ്റഡിയിലെടുത്തു.