അമ്മയ്ക്ക് ദിലീപിന്റെ കത്ത്.. നിരപരാധിത്വം തെളിയുന്നത് വരെ ഒരു സംഘടനയുടേയും ഭാഗമാകില്ല!

Updated: Thursday, June 28, 2018, 18:55 [IST]

ദിലീപിന്റെ കത്ത്

ഞാൻ അമ്മയ്ക്കയച്ച കത്തിന്റെ പൂർണ്ണരൂപം ചുവടെ എന്ന തലക്കെട്ടിലാണ് ദിലീപ് കത്ത് ഫേസ്ബുക്ക് പേജിൽ പോസ്റ്റ് ചെയ്തിരിക്കുന്നത്. അമ്മ ജനറൽ സെക്രട്ടറിക്കാണ് കത്ത് അയച്ചിരിക്കുന്നത്. കത്ത് ഇങ്ങനെയാണ്: സർ, കഴിഞ്ഞ 24നുകൂടിയ അമ്മയുടെ ജനറൽ ബോഡിയിൽ അമ്മയിലെ മെമ്പറായ എന്നെ പുറത്താക്കുവാൻ എനിക്കു നോട്ടീസ്‌ നൽകാതെയും, എന്റെ വിശദീകരണം കേൾക്കാതെയും എടുത്ത അവയ്‌ലബിൾ എക്സിക്യൂട്ടീവിന്റെ മുൻ തീരുമാനം നിലനിൽക്കുന്നതല്ല എന്ന് തീരുമാനിച്ച വിവരം മാധ്യമങ്ങളിലൂടെ അറിയാൻ ഇടയായി.

ഒരു സംഘടനയിലേക്കുമില്ല

അതിൽ അമ്മ ഭാരവാഹികൾക്കും, സഹപ്രവർത്തകർക്കും നന്ദി രേഖപ്പെടുത്തുന്നു. എന്നാൽ ഞാൻ മനസ്സാ വാചാ അറിയാത്തൊരു കേസ്സിന്റെ കെണിയിൽ പെടുത്തപ്പെട്ടിരിക്കുന്നതിനാൽ ഈ കേസിൽ കേരളത്തിലെ പ്രേക്ഷകർക്കും, ജനങ്ങൾക്കും മുന്നിൽ എന്റെ നിരപരാധിത്വം തെളിയിക്കുo വരെഒരുസംഘടനയുടേയും പ്രവർത്തനങ്ങളിൽ സജീവമാകാൻ ഞാൻ ആഗ്രഹിക്കുന്നില്ല.

അമ്മയെ അപമാനിക്കുന്നതിൽ വിഷമം

‘ഫിയോക്ക്’ എന്ന സംഘടനക്ക് ഇതേ സാഹചര്യത്തിൽ എഴുതിയ കത്തിൽ മുമ്പു് ഇത് ഞാൻ സൂചിപ്പിച്ചിരുന്നതാണ്. മലയാളസിനിമയിലെ ഒട്ടേറെ അഭിനേതാക്കൾക്ക് ആശ്രയമായി നിൽക്കുന്ന അമ്മ എന്ന സംഘടനയെ എന്റെ പേരും പറഞ്ഞ് പലരും അപമാനിക്കുന്നത് കാണുമ്പോൾ സങ്കടം തോന്നുന്നു. അമ്മയുടെ പുതിയ ഭാരവാഹികൾക്ക് ആശംസകൾ നേർന്നുകൊണ്ട് ദിലീപ്- എന്നാണ് കത്ത് അവസാനിക്കുന്നത്.

അമ്മയിലേക്ക് തിരികെ

നടിയെ ആക്രമിച്ച കേസിൽ അറസ്റ്റിലായതിന് തൊട്ടടുത്ത ദിവസമാണ് മമ്മൂട്ടിയുടെ നേതൃത്വത്തിൽ ചേർന്ന അമ്മ എക്സിക്യൂട്ടീവ് യോഗം ദിലീപിനെ പുറത്താക്കിയത്. അതിന്റെ പേരിൽ അന്ന് തന്നെ ഗണേഷ് കുമാർ അടക്കമുള്ളവർ വാളെടുത്തിരുന്നു. ദിലീപിനെ അമ്മയിലേക്ക് തിരികെ എത്തിക്കുമെന്ന കാര്യത്തിൽ സംശയമേതും ഇല്ലായിരുന്നു. പുതിയ നേതൃത്വത്തെ തെരഞ്ഞെടുത്ത ആദ്യ യോഗത്തിൽ തന്നെ ദിലീപിനെ തിരികെ കൊണ്ട് വരികയും ചെയ്തു.

അമ്മയെ രക്ഷിച്ച് ദിലീപ്

എന്നാൽ ഡബ്ല്യൂസിസിയുടെ നേതൃത്വത്തിൽ നടിമാർ കലാപക്കൊടി ഉയർത്തി. ആക്രമിക്കപ്പെട്ട നടി ഉൾപ്പെടെ നാല് പേർ അമ്മയിൽ നിന്നും രാജി വെച്ച് പുറത്തേക്ക് പോയി. അമ്മയ്ക്ക് എതിരെ രൂക്ഷ വിമർശനമാണ് ദിലീപിനെ തിരിച്ച് എടുത്തതിൽ ഉയർന്നത്. പൃഥ്വിരാജ് നടിമാർക്കൊപ്പമാണ് എന്ന് പ്രഖ്യാപിച്ച് രംഗത്ത് വന്നു. അമ്മ ഒരു പിളർപ്പിലേക്ക് നീങ്ങവേയാണ് രക്ഷയായി കത്തുമായി ദിലീപിന്റെ രംഗപ്രവേശം.