കൊച്ചിയില്‍ ആക്രി ഗോഡൗണില്‍ വന്‍തീപിടിത്തം; 9 തൊഴിലാളികളെ രക്ഷപ്പെടുത്തി

കൊച്ചി: സൗത്ത് റെയിൽ വേ മേൽപ്പാലത്തിന് സമീപം ആക്രി ​ഗോഡൗണിൽ വൻ തീപിടത്തം. സമീപത്തെ വീടുകളും പാർക്കിങ് ഏരിയയിലെ വാഹനങ്ങളും കത്തിനശിച്ചു. ​ഗോഡൗണിൽ ഉണ്ടായിരുന്ന ഒൻപത് പേരെ അ​ഗ്നിശമന സേന രക്ഷപ്പെടുത്തി. വീടുകളിൽ നിന്ന് ആളുകളെ ഒഴിപ്പിച്ചു. പുലർച്ചെ ഒരു മണിയോടെയാണ് തീപിടിത്തം ഉണ്ടായത്. ഫയർഫോഴ്സും പോലീസും ചേർന്ന് മൂന്നരമണിക്കൂറിലേറെ സമയമെടുത്താണ് തീയണച്ചത്.

സൗത്ത് റെയിൽവേ പാലത്തിന് സമീപമായതിനാൽ ട്രെയിൻ​ഗതാ​ഗതവും തടസ്സപ്പെട്ടു. രണ്ട് മണിക്കൂർ കഴിഞ്ഞാറ് ട്രെയിൻ ​ഗതാ​ഗതം പുനഃസ്ഥാപിച്ചത്. തീ നിയന്ത്രണവിധേയമെന്ന് അ​ഗ്നിശമന സേന അറിയിച്ചു. സമീപ പ്രദേശങ്ങളിലെ ആളുകളെ പെട്ടെന്ന് ഒഴിപ്പിക്കാനായത് മൂലം വൻ ദുരന്തം ഒഴിവായി. അ​ഗ്നിബാധയെ തുടർന്ന് ​ഗോഡൗണിലെ 12 ​ഗ്യാസ് സിലണ്ടറുകൾ പൊട്ടിത്തെറിച്ചതായാണ് റിപ്പോർട്ട്.

അതേ സമയം. നെടുമ്പാശ്ശേരി വിമാനത്താവളത്തിന് സമീപം ഹോട്ടലിലെ പാർക്കിം​ഗ് ഏരിയയിൽ ഉണ്ടായ തീപിടിത്തത്തിൽ വാഹനങ്ങൾ കത്തി. നെടുമ്പാശ്ശേരി വിമാനത്താവളത്തിന് സമീപത്തെ ആപ്പിൾ റസിഡൻസിയിൽ അർധ രാത്രിയോടെയാണ് തീപിടിത്തം ഉണ്ടായത്. കാർ പാർക്കിം​ഗ് ഏരിയയിൽ ഉണ്ടായ അ​ഗ്നിബാധയിൽ ഒരു കാർ പൂർണമായും കത്തിനശിച്ചു. 3 കാറുകളും ഏതാനും ബൈക്കുകളും ഭാ​ഗികമായി കത്തിനശിച്ചു.