സ്വർണ വില ഇനിയും കുത്തനെ താഴേക്ക്; 150000 രൂപ വരെ പവന് ഇടിഞ്ഞാലും ലോട്ടറി..ഇനി സംഭവിക്കുക ഇത്

സ്വർണ വില ഇന്നലെ വീണ്ടും കുറഞ്ഞതോടെ കടുത്ത ആശങ്കയിലായിരിക്കുകയാണ് നിക്ഷേപകർ. ഇന്നലെ വിലയിൽ 2 ശതമാനത്തോളം ഇടിവാണ് ഉണ്ടായത്. ഇതോടെ ആഗോള വിപണിയിൽ ഒരു ആഴ്ചയിലേറെയായി രേഖപ്പെടുത്തുന്ന ഏറ്റവും താഴ്ന്ന നിരക്കായ 4,862 ഡോളറിലേക്ക് (ഒരു ഔൺസിന്) സ്വർണവില കൂപ്പുകുത്തിയിരിക്കുകയാണ്.

യുഎസ് ഡോളർ ശക്തിപ്പെട്ടത്, പ്രധാന വിപണികളിലെ അവധികൾ കാരണം വ്യാപാര പ്രവർത്തനങ്ങൾ കുറഞ്ഞത്, ഫെഡറൽ റിസർവിൻ്റെ ഭാവി പലിശ നിരക്ക് തീരുമാനങ്ങളെക്കുറിച്ചുള്ള നിക്ഷേപകരുടെ കാത്തിരിപ്പ്, മെച്ചപ്പെട്ട ഭൂമിശാസ്ത്രപരമായ സാഹചര്യങ്ങൾ, സമാധാന ചർച്ചകൾ എന്നിവയെല്ലാം സ്വർണവില ഇടിയാനും ഡിമാൻഡ് കുറയാനും കാരണമായി. യുഎസ് ഡോളർ സൂചിക 0.3% വർദ്ധിച്ചതാണ് പ്രാഥമികമായി സ്വർണവിലയെ സ്വാധീനിച്ചത്. ഡോളർ കരുത്താർജിക്കുമ്പോൾ, മറ്റു കറൻസികൾ ഉപയോഗിച്ച് സ്വർണം വാങ്ങുന്നവർക്ക് അത് ചെലവേറിയതാകുകയും ആഗോള ഡിമാൻഡ് കുറയുകയും ചെയ്യും. ചാന്ദ്ര പുതുവർഷ അവധിയും പ്രസിഡന്റ്സ് ഡേയും കാരണം ചൈന, യുഎസ് ഉൾപ്പെടെയുള്ള പ്രധാന വിപണികൾ അടഞ്ഞുകിടന്നത് ഡിമാൻ്റ് ഇടിച്ചു, അത് വിലയിലും പ്രതിഫലിച്ചു.

ഇനി എന്ത് എന്നതാണ് പ്രധാന ചോദ്യം. വില 4,862 ഡോളറിന് താഴേക്ക് പോകുമോ അതോ 6,000 ഡോളർ എന്ന സ്വപ്ന നിലവാരത്തിലേക്ക് എത്തുമോ എന്നാണ് നിക്ഷേപകർ ഉറ്റുനോക്കുന്നത്. ജനുവരിയിലെ ഫെഡറൽ റിസർവ് യോഗത്തിന്റെ മിനിറ്റ്സ് ഭാവി പലിശ നിരക്ക് തീരുമാനങ്ങളെക്കുറിച്ച് സൂചന നൽകുമോ എന്നതിലേക്കാണ് നിക്ഷേപകരുടെ . ഈ വർഷം മൂന്ന് പലിശ നിരക്ക് കുറയ്ക്കലുകളാണ് വിപണി പ്രതീക്ഷിക്കുന്നത്, ആദ്യത്തേത് ജൂണിൽ വന്നേക്കാമെന്നാണ് വിലയിരുത്തൽ. പലിശ നിരക്ക് കുറക്കുന്നത് സ്വർണത്തിന് പിന്തുണ കൂട്ടും, വില ഉയരും.

ചൊവ്വാഴ്ച സ്പോട്ട് ഗോൾഡ് 1.5% കുറഞ്ഞ് ഒരു ഔൺസിന് 4,917.90 ഡോളറിലെത്തി. ഇത് ഫെബ്രുവരി 6 ന് ശേഷമുള്ള ഏറ്റവും താഴ്ന്ന നിരക്കായിരുന്നു, ഇടയ്ക്ക് 4,862 ഡോളറിലേക്കും എത്തി. ഏപ്രിൽ മാസത്തെ യുഎസ് ഗോൾഡ് ഫ്യൂച്ചേഴ്സ് 2.2% ഇടിഞ്ഞ് 4,936.60 ഡോളറിലുമെത്തി. ഭൂമിശാസ്ത്രപരമായ സംഭവവികാസങ്ങളും സ്വർണവിലയെ സ്വാധീനിക്കും. അനിശ്ചിതത്വത്തിന്റെയോ സംഘർഷങ്ങളുടെയോ സമയങ്ങളിൽ സുരക്ഷിത നിക്ഷേപം എന്ന നിലയിൽ സ്വർണത്തിന് ആവശ്യം വർദ്ധിക്കാറുണ്ട്. എന്നാൽ സമീപകാല നയതന്ത്ര ചർച്ചകൾ വിപണിയിലെ ഉടനടിയുള്ള ആശങ്കകൾ കുറച്ചിട്ടുണ്ട്. ജനീവയിൽ ഇറാനുമായുള്ള ആണവ ചർച്ചകളിൽ അമേരിക്ക പരോക്ഷമായി പങ്കാളിയാകുമെന്ന് ഡൊണാൾഡ് ട്രംപ് അറിയിച്ചിരുന്നു. യുക്രെയ്ൻ, റഷ്യ പ്രതിനിധികൾ സമാധാന ചർച്ചകളിൽ പങ്കെടുക്കുമെന്നും പ്രതീക്ഷിക്കുന്നുണ്ട്. ഇത്തരം സംഭവവികാസങ്ങൾ സ്വർണം പോലുള്ള സുരക്ഷിത നിക്ഷേപങ്ങൾക്കുള്ള ആവശ്യം കുറച്ചു.

ഡോളറിന്റെ ശക്തി, വിപണിയിലെ പണലഭ്യത കുറഞ്ഞത്, ആഗോള സംഘർഷങ്ങളിലെ അയവ് എന്നിവയെല്ലാം ഈ വിലയിടിവിന് പ്രധാന കാരണങ്ങളായി. ഫെഡറൽ റിസർവിന്റെ നയപരമായ കാഴ്ചപ്പാടും പലിശ നിരക്ക് കുറയ്ക്കുമെന്ന പ്രതീക്ഷകളും സ്വർണത്തിന്റെ ഭാവി ഗതിയിൽ വലിയ സ്വാധീനം ചെലുത്തും.

അതേസമയം സ്വർണം ഇതിനകം 4,862 ഡോളർ എന്ന നിലയിലേക്ക് എത്തിയിട്ടുണ്ട്. ഇതിന് താഴെ പോയാൽ ഹ്രസ്വകാലയളവിൽ ഇനിയും വിലയിടിവിന് സാധ്യതയുണ്ടെന്നാണ് വിദഗ്ധർ ചൂണ്ടിക്കാട്ടുന്നത്. എന്നാൽ 5,120 ഡോളറിലേക്ക് വില ഉയർന്നാൽ 5,600 ഡോളറിലേക്കും അവിടെ നിന്ന് 6,000 ഡോളറിലേക്കും വില ഉയരാനുള്ള സാധ്യത തള്ളിക്കളയാനാകില്ല. പലിശ നിരക്ക് കുറയ്ക്കൽ, ദുർബലമായ ഡോളർ, വർദ്ധിച്ചുവരുന്ന ആഗോള അനിശ്ചിതത്വം എന്നിവ സ്വർണത്തിന് ശക്തമായ തിരിച്ചുവരവിന് പിന്തുണ നൽകിയേക്കാം. ഡോളർ ശക്തമായി തുടരുകയും നിരക്ക് കുറയ്ക്കൽ വൈകുകയും ചെയ്താൽ സ്വർണത്തിന്മേൽ സമ്മർദ്ദം തുടരും എന്നാണ് വിപണി വിദഗ്ധർ പറയുന്നത്.

കേരളത്തിലെ വില

വില കുറഞ്ഞ് തുടങ്ങിയതോടെ കേരളത്തിലും വലിയ ആഘോഷത്തിലാണ് ആഭരണപ്രേമികൾ. 1 ലക്ഷത്തിന് താഴേക്ക് വില കുറയുമോയെന്നത് തന്നെയാണ് ഉറ്റുനോക്കുന്നത്. കുറഞ്ഞത് 15,000 രൂപയെങ്കിലും വില കുറഞ്ഞാൽ അത് ആശ്വാസമാണെന്നാണ് ചിലരുടെ അഭിപ്രായം. എന്തായാലും ഇനി വിലക്കുറവിൻ്റെ നാളുകളായിരിക്കുമെന്ന ആശ്വാസത്തിലാണ് പലരും.