അതിതീവ്ര മഴയ്ക്ക് സാധ്യത; ഈ നാല് ജില്ലകളിലെ സ്കൂളുകള്ക്ക് നാളെ അവധി
തിരുവനന്തപുരം: വയനാട്, പത്തനംതിട്ട, കോട്ടയം, ഇടുക്കി ജില്ലകളിലെ വിദ്യാഭ്യാസ സ്ഥാപനങ്ങള്ക്ക് നാളെ (തിങ്കള്) അവധി. കനത്ത മഴയുടെ പശ്ചാത്തലത്തിലാണ് അവധി പ്രഖ്യാപിച്ചിരിക്കുന്നത്. നാളെ അതിതീവ്ര മഴയുടെ സാധ്യത കണക്കിലെടുത്ത് കാലാവസ്ഥാ നിരീക്ഷണ കേന്ദ്രം വയനാട്ടില് റെഡ് അലര്ട്ട് പ്രഖ്യാപിച്ചിരുന്നു.
ഈ സാഹചര്യത്തില് ആണ് അവധി പ്രഖ്യാപിക്കുന്നത് എന്ന് ജില്ല കളക്ടര് അറിയിച്ചു. ട്യൂഷന് സെന്ററുകള്, അങ്കണവാടികള്, പ്രൊഫഷണല് കോളേജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്ക് നാളെ അവധിയായിരിക്കും. അതേസമയം മോഡല് റസിഡന്ഷല് സ്കൂളുകള്ക്ക് അവധി ബാധകമല്ല എന്ന് ജില്ല കളക്ടര് അറിയിച്ചു. കോട്ടയത്ത് മുന്കൂട്ടി പ്രഖ്യാപിച്ച പരീക്ഷകള്ക്ക് മാറ്റമുണ്ടാകില്ല എന്ന് കളക്ടര് വ്യക്തമാക്കി
വയനാടിനെ കൂടാതെ മലപ്പുറം, കോഴിക്കോട്, കണ്ണൂര് ജില്ലകളിലും നാളെ റെഡ് അലര്ട്ട് പ്രഖ്യാപിച്ചിട്ടുണ്ട്. ഈ നാല് ജില്ലകളിലും തിങ്കളാഴ്ച ഒറ്റപ്പെട്ടയിടങ്ങളില് അതിതീവ്രമായ മഴ പെയ്തേക്കും എന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഫെഞ്ചല് ചുഴലിക്കാറ്റിന്റെ പശ്ചാത്തലത്തിലാണ് കേരളത്തിലും മഴ ശക്തമാകുന്നത്.
24 മണിക്കൂറില് 204.4 മില്ലി മീറ്ററില് കൂടുതല് മഴ ലഭിക്കുമെന്നാണ് അതിതീവ്രമായ മഴ എന്നത് കൊണ്ട് കാലാവസ്ഥ വകുപ്പ് അര്ത്ഥമാക്കുന്നത്. അതിതീവ്ര മഴ അപകടങ്ങള് സൃഷ്ടിക്കും എന്നാണ് കാലാവസ്ഥാ നിരീക്ഷണ കേന്ദ്രം അറിയിക്കുന്നത്. കുറഞ്ഞ സമയം കൊണ്ട് വലിയ മഴയുണ്ടാകും. ഇത് കാരണം മലവെള്ളപ്പാച്ചിലും മിന്നല് പ്രളയങ്ങളും ഉണ്ടായേക്കാം. നഗരങ്ങളിലും താഴ്ന്ന പ്രദേശങ്ങളിലും വെള്ളക്കെട്ട് രൂപപ്പെട്ടേക്കാം.
മഴ തുടരുന്നത് മണ്ണിടിച്ചിലിലേക്കും ഉരുള്പൊട്ടലിലേക്കും നയിച്ചേക്കാ എന്നും അധികൃതര് ചൂണ്ടിക്കാട്ടി. അതേസമയം തിങ്കളാഴ്ച അഞ്ച് ജില്ലകളില് ഓറഞ്ച് അലര്ട്ട് ആയിരിക്കും എന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കിയിട്ടുണ്ട്. എറണാകുളം, ഇടുക്കി, തൃശൂര്, പാലക്കാട്, കാസര്ഗോഡ് ജില്ലകളില് ആണ് ഓറഞ്ച് അലര്ട്ട് പ്രഖ്യാപിച്ചിരിക്കുന്നത്. ഈ ജില്ലകളില് അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്.
24 മണിക്കൂറില് 115.6 മില്ലി മീറ്റര് മുതല് 204.4 മില്ലി മീറ്റര് വരെ മഴ ലഭിക്കുമെന്നാണ് അതിശക്തമായ മഴ എന്നത് കൊണ്ട് കാലാവസ്ഥ വകുപ്പ് അര്ത്ഥമാക്കുന്നത്. നാളെ പത്തനംതിട്ട, ആലപ്പുഴ, കോട്ടയം ജില്ലകളില് ശക്തമായ മഴയ്ക്കുള്ള മുന്നറിയിപ്പായ യെല്ലോ അലര്ട്ടാണ് പ്രഖ്യാപിച്ചിരിക്കുന്നത്. 24 മണിക്കൂറില് 64.5 മില്ലിമീറ്ററില് മുതല് 115.5 മില്ലി മീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്.
അതേസമയം ഫെഞ്ചല് ചുഴലിക്കാറ്റ് തമിഴ്നാട്ടിലും പുതുച്ചേരിയിലും കനത്ത നാശം വിതയ്ക്കുകയാണ്. ഇതിനോടകം രാജ്യത്ത് ഒമ്പത് മരണം റിപ്പോര്ട്ട് ചെയ്യപ്പെട്ടിട്ടുണ്ട്. പുതുച്ചേരിയില് പ്രളയ സമാനമായ സാഹചര്യമാണ് നിലനില്ക്കുന്നത്.
Click it and Unblock the Notifications
Sign in with Google