മുട്ടൊപ്പം വെള്ളം, വോട്ട് ചെയ്യാനാകെതെ ജനം; വോട്ടെടുപ്പ് മാറ്റിവെയ്ക്കണമെന്ന് മുല്ലപ്പള്ളി

കൊച്ചി: മഴ കനത്തതോടെ എറണാകുളത്ത് സ്ഥിതി ഓരോ നിമിഷവും വഷളായിക്കൊണ്ടിരിക്കുകയാണ്. പലയിടങ്ങളും വെള്ളത്തിനടയിലായതോടെ വോട്ട് ചെയ്യാന്‍ ബൂത്തിലെത്താന്‍ കഴിയാത്ത സാഹചര്യമാണ് ഉള്ളത്.ഇതോടെ ​എറണാകുളത്ത് തിരഞ്ഞെടുപ്പ് മാറ്റിവെയ്ക്കണമെന്ന് കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ ആവശ്യപ്പെട്ടു. ഇക്കാര്യം തിരഞ്ഞെടുപ്പ് കമ്മീഷന്‍റെ ശ്രദ്ധയില്‍ പെടുത്തിയിട്ടുണ്ടെന്നും എന്നാല്‍ കേന്ദ്ര നിരീക്ഷകയുടെ നിലപാടാണ് തടസം നില്‍ക്കുന്നതെന്നും മുല്ലപ്പള്ളി പറഞ്ഞു.

ആദ്യം വോട്ടെടുപ്പ് മാറ്റി വെയ്ക്കുന്നത് സംബന്ധിച്ച് അനുകൂലമായ നിലപാടായിരുന്നു മുഖ്യതിരഞ്ഞെടുപ്പ് ഓഫീസര്‍ സ്വീകരിച്ചിരുന്നത്. എന്നാല്‍ കേന്ദ്ര നിരീക്ഷകയുടെ നിലപാടാണ് പുതിയ നിലപാടിന് കാരണമെന്നാണ് കരുതുന്നതെന്നും മുല്ലപ്പള്ളി പറഞ്ഞു. എത്ര പ്രതികൂല സാഹചര്യമുണ്ടായാലും എല്ലാവരും സമ്മതിദാനാവകാശം വിനിയോഗിക്കണമെന്നും മുല്ലപ്പള്ളി പറഞ്ഞു.

എറണാകുളത്ത് ഉള്‍പ്പെടെ വോട്ടിങ്ങ് മാറ്റിവെയ്ക്കേണ്ട സാഹചര്യം ഇല്ല. ആവശ്യമെങ്കില്‍ പോളിങ്ങ് സമയം നീട്ടില്‍ നല്‍കാം. എല്ലാ വോട്ടര്‍മാരും സഹകരിക്കണമെന്നും ടീക്കറാം മീണ ആവശ്യപ്പെട്ടു. നിലവില്‍ മഞ്ചേശ്വരം ഒഴികെയുള്ള നാല് മണ്ഡലങ്ങളിലും മഴ തുടരുകയാണ്. ഇതോടെ കുറഞ്ഞ പോളിങ്ങാണ് ഇവിടങ്ങളില്‍ രേഖപ്പെടുത്തിയത്. ശക്തമായ മഴപെയ്യുന്ന എറണാകുളത്ത് തിരഞ്ഞെടുപ്പ് മാറ്റി വെയ്ക്കണമെന്ന ആവശ്യം ബിജെപി ഉയര്‍ത്തുന്നുണ്ട്.

English summary

Mullapally says polling in ernakulam should be postponed