6 തവണ ബ്രിട്ടീഷുകാര്‍ക്ക് മാപ്പെഴുതിയ സവര്‍ക്കര്‍ വീരനല്ല, ഭീരുവാണ്: എംവി ജയരാജന്‍

കണ്ണൂര്‍: 6 തവണ ബ്രിട്ടീഷ് സര്‍ക്കാറിന് മാപ്പ് എഴുതിക്കൊടുത്ത വിഡി സവര്‍ക്കറാണ് ബിജെപിക്കാര്‍ക്ക് ഇന്നും വീര സവര്‍ക്കര്‍ എന്ന് സിപിഎം കണ്ണൂര്‍ ജില്ലാ സെക്രട്ടറി എംവി ജയരാജന്‍. സവർക്കർ വീരനല്ല ഭീരുവാണ് . നിസ്സഹരണ പ്രസ്ഥാനത്തെ തള്ളിപ്പറയുകയായിരുന്നു ആർ എസ് എസ് സ്ഥാപക നേതാക്കളിൽ ഒരാളായ ഗോൾവാക്കൾ ചെയ്തതെന്നും അദ്ദേഹം അഭിപ്രായപ്പെടുന്നു. സ്വാതന്ത്ര ദിന സന്ദേശത്തിലായിരുന്നു ആര്‍എസ്എസിനെതിരെ അദ്ദേഹം രൂക്ഷമായ വിമര്‍ശനം ഉന്നയിച്ചു. എംവി ജയരാജന്‍റെ വാക്കുകളുടെ പൂര്‍ണ്ണ രൂപം ഇങ്ങനെ.

സ്വാതന്ത്ര്യത്തിന്റെ 75 ആം പിറന്നാൾ സ്വാതന്ത്ര്യ സംരക്ഷണ ദിനമായി ഇന്ത്യൻ ജനത കണക്കാക്കുകയാണ്. സംഘപരിവാർ ഭരണത്തിന് കീഴിൽ സ്വാതന്ത്ര്യവും ജനാധിപത്യവും മത നിരപേക്ഷതയും ഭരണഘടനാ മൂല്യങ്ങളും ഭീഷണി നേരിടുന്നു . സ്വാതന്ത്ര്യ സമരത്തിന് ഒരു പങ്കും വഹിക്കാത്തവരും സ്വാതന്ത്ര്യ സമര പോരാട്ടത്തിൽ ഉജ്ജ്വലമായ പങ്കു വഹിച്ച ഗാന്ധിജിയെ കൊല ചെയ്തവരുമാണ് ഇന്ന് രാജ്യം ഭരിക്കുന്നവർ . ബി ജെ പി യുടെ പിൻഗാമികൾ സ്വാതന്ത്ര്യ സമരത്തെ ഒറ്റു കൊടുത്തു. ഹിന്ദുത്വ വാദിയായ വി ഡി സവർക്കർ 6 തവണയാണ് ബ്രിട്ടീഷ് സർക്കാരിന് മാപ്പെഴുതിക്കൊടുത്തത്.

എന്നിട്ടും ബി ജെ പിക്കാർ സവർക്കരെ 'വീര സവർക്കർ ' എന്നാണ് വിശേഷിപ്പിക്കുന്നത്. സവർക്കർ വീരനല്ല ഭീരുവാണ്. നിസ്സഹരണ പ്രസ്ഥാനത്തെ തള്ളിപ്പറയുകയായിരുന്നു ആർ എസ് എസ് സ്ഥാപക നേതാക്കളിൽ ഒരാളായ ഗോൾവാക്കൾ ചെയ്തത്. ബ്രിട്ടീഷ് ഭരണാധികാരികളുടെ കരി നിയമങ്ങളോട് പോലും സന്ധി ചെയ്തവരാണ് ഹെഡ്ഡെവർ അടക്കമുള്ള ആദ്യ കാല ആർ എസ് എസ് നേതാക്കൾ. അതുകൊണ്ട് കൂടിയാണ് ഫാസിസ്റ്റ് സ്വഭാവമുള്ള ഇക്കൂട്ടർ പൗരാവകാശങ്ങൾ നിഷേധിക്കുന്നതും രാജ്യ ദ്രോഹ നിയമവും UAPA കേസും മനുഷ്യാവകാശ പ്രവർത്തകർക്കെതിരെ ഉപയോഗിക്കുന്നത്. രാജ്യ സഭയിൽ ഗുണ്ടാ രാജ് നടപ്പാക്കിയവർ പാർലമെന്ററി ജനാധിപത്യം പോലും ചവിട്ടി അരക്കുകയാണ്.

സ്വാതന്ത്ര്യ സമരത്തിൽ ത്യാഗോജ്വലമായ പങ്കാണ് കമ്മ്യൂണിസ്റ് പാർട്ടിക്കുള്ളത് . ബ്രിട്ടീഷ് വിരുദ്ധ സമരത്തിൽ പങ്കെടുത്ത് ജീവൻ ബലിയർപ്പിച്ച നിരവധി കമ്മ്യൂണിസ്റ്റ് വിപ്ലവകാരികളുണ്ട് . ഒന്നാം സ്വാതന്ത്ര്യ ദിനം മുതൽ കമ്മ്യൂണിസ്റ്റുകാർ ഈ ഉജ്ജ്വല പോരാട്ടത്തെ ഉയർത്തിപ്പിടിച്ചു . സ്വാതന്ത്ര്യ ദിനം ജയിലിൽ വച്ചായിരുന്നു എ കെ ജി ദേശിയ പതാക ഉയർത്തി ആചരിച്ചത് . ലോകം കണ്ട ഏറ്റവും വലിയ ധൈഷ്ണികനായ നോം നോം ചോംസ്കി സംഘപരിവാർ ഭരണത്തെ കുറിച്ച് വിലയിരുത്തിയത് ' ഇന്ത്യയെ ഓർക്കുമ്പോൾ എനിക്ക് ഭയമാണ് ' എന്നാണ് .

നിർഭയമായി രാജ്യത്ത് പട്ടിണി കൂടാതെ ജീവിക്കാൻ വേണ്ടിയുള്ള പോരാട്ടമാണ് സി പി ഐ എമ്മും ഇടതുപക്ഷവും നടത്തുന്നത് . അത്തരമൊരു പോരാട്ടത്തിന് തുടക്കം കുറിക്കുകയാണ് രാജ്യത്തിൻറെ 75 ആം സ്വാതത്ര്യ ദിനത്തിൽ സി പി ഐ എം ചെയുന്നത്. എല്ലാവർക്കും സ്വാതന്ത്ര്യ ദിനാശംസകൾ നേരുന്നതോടൊപ്പം സ്വാതന്ത്ര്യ സംരക്ഷണ പോരാട്ടത്തിൽ അണിനിരക്കണമെന്നും അഭ്യർത്ഥിക്കുന്നു .

English summary

Savarkar, who apologized to British 6 times, is not a hero, he is a coward: MV Jayarajan