പുനസം:ഘടനയില്‍ പാളി എ ഗ്രൂപ്പ്, കോഴിക്കോട് ഡിസിസി കൈവിട്ടു, സിദ്ദിഖിനെതിരെ പടയൊരുക്കം

Updated: Monday, August 30, 2021, 10:55 [IST]

തിരുവനന്തപുരം: കോണ്‍ഗ്രസില്‍ ഡിസിസി പുനസംഘടന കഴിഞ്ഞതിന് പിന്നാലെ ഗ്രൂപ്പ് പോരും കനക്കുന്നു. കോഴിക്കോട് ഡിസിസി കൈവിട്ടതാണ് എ ഗ്രൂപ്പിന്റെ ചൊടിപ്പിച്ചിരിക്കുന്നത്. ഇതിന് പ്രധാന കാരണമായി എ ഗ്രൂപ്പ് ചൂണ്ടിക്കാണുന്നത് ടി സിദ്ദിഖിനെയാണ്. ദീര്‍ഘകാലമായി എ ഗ്രൂപ്പ് കൈവശം വെച്ചിരുന്നതായിരുന്നു കോഴിക്കോട് ഡിസിസി അധ്യക്ഷ സ്ഥാനം. ഇത്തവണ ഉമ്മന്‍ ചാണ്ടി തന്നെ ഇവിടെ പേരും നിര്‍ദേശിച്ചിരുന്നു. എന്നാല്‍ സുധാകരന്റെ പിന്തുണയോടെ അപ്രതീക്ഷിതമായി പ്രവീണ്‍ കുമാര്‍ ഇവിടെ അധ്യക്ഷനാവുകയായിരുന്നു. ഉമ്മന്‍ ചാണ്ടി പറഞ്ഞ പേരിനെ മറികടന്ന് ഐ ഗ്രൂപ്പുകാരനെ പിന്തുണച്ചത് ടി സിദ്ദിഖാണ്.

എ ഗ്രൂപ്പിലെ നിര്‍ണായക നേതാവ് തന്നെ ഐ ഗ്രൂപ്പിനെ പിന്തുണച്ചത് വലിയ ക്ഷീണമായെന്നാണ് വിലയിരുത്തല്‍. അതും ഉമ്മന്‍ ചാണ്ടി നിര്‍ദേശിച്ച പേരിനെ മറികടന്ന് വിശ്വസ്തന്‍ കൂടിയായ സിദ്ദിഖ് ഐ ഗ്രൂപ്പിനെ പിന്തുണച്ചതാണ് നേതാക്കളെ രോഷാകുലരാക്കുന്നത്. ഗ്രൂപ്പിന്റെ വക്താവായിരുന്നയാളാണ് സിദ്ദിഖ്, ഇപ്പോള്‍ ഗ്രൂപ്പില്ലെന്ന് പറയുന്നത് ആത്മവഞ്ചനയാണെന്ന് നേതാക്കള്‍ തുറന്നടിക്കുന്നു. പാര്‍ട്ടി വക്താവായ കെസി അബു സിദ്ദിഖിനെതിരെ പരസ്യമായി രംഗത്ത് വന്നു. ഒന്നര പതിറ്റാണ്ടായി കോഴിക്കോട് ഡിസിസിയിലെ പ്രസിഡന്റ് സ്ഥാനം എ ഗ്രൂപ്പിന് കൈവശമായിരുന്നു. അതാണ് ഇപ്പോള്‍ കൈവിട്ടുപോയിരിക്കുന്നത്.

ഹിമാചലില്‍ വെക്കേഷന്‍ അടിച്ചുപൊളിച്ച് നടി സാനിയ അയ്യപ്പന്‍; വൈറല്‍ ഫോട്ടോഷൂട്ട് കാണാം

അതേസമയം സിദ്ദിഖിനെ മാത്രം ഈ വിഷയത്തില്‍ കുറ്റപ്പെടുത്താനുമാവില്ല. കാര്യമായിട്ടുള്ള പേരുകളൊന്നും ജില്ലയില്‍ നിന്ന് എ ഗ്രൂപ്പിന് നിര്‍ദേശിക്കാനില്ലായിരുന്നു. അതുകൊണ്ട് തന്നെ ഡിസിസി അധ്യക്ഷ പദവി കൈവിട്ട് പോകുമോ എന്ന പേടി എ ഗ്രൂപ്പിനുണ്ടായിരുന്നു. കെപിസിസി സെക്രട്ടറി ബാലകൃഷ്ണന്‍ കിടാവിന്റെ പേരാണ് ഉമ്മന്‍ ചാണ്ടി ജില്ലയിലേക്ക് നിര്‍ദേശിച്ചത്. എന്നാല്‍ ഇതിനെ എ ഗ്രൂപ്പിലാരുംകാര്യമായി പിന്തുണയ്ക്കാന്‍ തയ്യാറായില്ല. ബാലകൃഷ്ണന്‍ ഗ്രൂപ്പിനുള്ളിലും പാര്‍ട്ടിക്കുള്ളിലും വേണ്ടത്ര പിന്തുണയില്ലെന്ന് വ്യക്തമായിരുന്നു. ജില്ലയില്‍ നിന്നും സുപ്രധാന നേതാവായിട്ടും ബാലകൃഷ്ണനെ പിന്തുണയ്ക്കാന്‍ സിദ്ദിഖ് തയ്യാറായില്ല.

ഐ ഗ്രൂപ്പുകാരനായ പ്രവീണ്‍ കുമാറിനെയാണ് സിദ്ദിഖും പിന്തുണച്ചത്. ഇത് തീര്‍ത്തും അപ്രതീക്ഷിതമായിരുന്നു. എ ഗ്രൂപ്പിലെ കടുത്ത അമര്‍ഷത്തിന് കാരണവും ഇത് തന്നെയാണ്. ഗ്രൂപ്പിന്റെ ഭാഗമായി നിന്ന് ഇപ്പോള്‍ ഗ്രൂപ്പില്ല എന്നൊക്കെ പറഞ്ഞാല്‍, അത് വെറും കബളിപ്പിക്കലാണെന്ന് കെസി തുറന്നടിച്ചു. ടി സിദ്ദിഖിനെതിരെയുള്ള ഒളിയമ്പ് കൂടിയാണ് ഇത്. അതേസമയം ഡിസിസി പ്രസിഡന്റായെങ്കിലും ഐ ഗ്രൂപ്പില്‍ വലിയ പിന്തുണ പ്രവീണ്‍ കുമാറിനില്ല. ഗ്രൂപ്പ് നോമിനിയായിട്ടല്ല, മറിച്ച് എംകെ രാഘവന്റെയും കെ മുരളീധരന്റെയും ആളെന്ന നിലയിലാണ് പ്രവീണ്‍ കുമാര്‍ അധ്യക്ഷനാവുന്നത്. കോഴിക്കോട് നിന്ന് എംഎല്‍എയില്ലെന്ന നാണക്കേട് അടക്കം ഒഴിവാക്കുകയാണ് പുതിയ അധ്യക്ഷന്റെ വെല്ലുവിളി.

ഇതിനിടെ ഡിസിസി പുനസംഘടനയില്‍ മുതിര്‍ന്ന നേതാക്കളാകെ രോഷത്തിലാണ്. താനുമായി പുനസംഘടന കാര്യത്തില്‍ വേണ്ടത്ര ചര്‍ച്ച നടത്തിയില്ലെന്ന വാദത്തില്‍ ഉറച്ച് നില്‍ക്കുകയാണ് ഉമ്മന്‍ ചാണ്ടി. സുധാകരന്‍ കഴിഞ്ഞ ദിവസം നടത്തിയ പ്രസ്താവനയില്‍ അമര്‍ഷത്തിലാണ് ഉമ്മന്‍ ചാണ്ടി. രണ്ട് തവണ ചര്‍ച്ച നടത്തിയിട്ടില്ലെന്ന് ഉമ്മന്‍ ചാണ്ടി പറയുന്നു. ഒറ്റതവണയാണ് ചര്‍ച്ച നടന്നതെന്നും, വിഡി സതീശനും ഒപ്പമുണ്ടായിരുന്നുവെന്ന് ഉമ്മന്‍ ചാണ്ടി വ്യക്തമാക്കി. രണ്ട് തവണ ചര്‍ച്ച നടന്നിരുന്നെങ്കില്‍ ഈ പ്രശ്‌നങ്ങള്‍ ഉണ്ടാവില്ലായിരുന്നു. ആദ്യത്തെ ചര്‍ച്ചയില്‍ നല്‍കിയ ലിസ്റ്റാണ് സുധാകരന്റെ കൈവശമുള്ളത്. അതില്‍ വിശദ ചര്‍ച്ച നടന്നിട്ടില്ലെന്നും ഉമ്മന്‍ ചാണ്ടി പറഞ്ഞു.