പാലക്കാട് സ്കൂൾ വിദ്യാർഥിക്ക് മർദനം; ആക്രമിച്ചത് സഹപാഠിയുടെ അച്ഛൻ

പാലക്കാട്: പാലക്കാട് വടക്കഞ്ചേരിയിൽ സ്കൂൾ വിദ്യാർഥിക്ക് മർദനം. സഹപാഠിയുടെ അച്ഛനാണ് പത്താം ക്ലാസ് വിദ്യാർഥിയെ മർദിച്ചത് .കുട്ടികൾ തമ്മിൽ കഴിഞ്ഞ ദിവസം വഴക്കുണ്ടായിരുന്നു.

ഇതിന്റെ തുടർച്ചയായാണ് മർദനമേറ്റ കുട്ടിയുടെ അച്ഛൻ ബസ് വടക്കഞ്ചേരി സ്റ്റാൻഡിൽ വെച്ച് വിദ്യാർഥിയെ മർദിച്ചത്. കുട്ടി ആശുപത്രിയിൽ ചികിത്സ തേടി. സംഭവത്തിൽ കുട്ടിയുടെ കുടുംബം പരാതി നൽകി.

ഇന്നലെ വൈകിട്ട് അഞ്ചുമണിയോടെയാണ് വടക്കഞ്ചേരി ബസ്സ്റ്റാൻഡിൽ വെച്ച് വിദ്യാർഥിക്ക് മർദനമേറ്റത്. സ്കൂൾ കഴിഞ്ഞ് സ്റ്റാൻഡിലെത്തിയ വിദ്യാർഥിയെ പിന്നാലെ ഓടിയെത്തിയ ആൾ മർദ്ദിക്കുകയായിരുന്നു. പരിസരത്ത് കിടന്ന പിക്കപ്പ് വാനിൽ ചേർത്ത് വെച്ച് വിദ്യാർഥിയെ മർദിക്കുന്നതും കുട്ടി നിലത്ത് വീഴുന്നതും പുറത്ത് വന്ന ദൃശ്യങ്ങളിൽ വ്യക്തമായി കാണാം.

തുടർന്ന് ഓടികൂടിയ ആളുകാണ് സഹപാഠിയുടെ പിതാവിനെ പിടിച്ച് മാറ്റിയത്. കുട്ടി നിലവിൽ ആശുപത്രിയിൽ ചികിത്സയിലാണ്. ഇന്നലെ കുട്ടിയുടെ മാതാപിതാക്കൾ സംഭവത്തിൽ പരാതി നൽകിയിരുന്നില്ല. എന്നാൽ ഇന്ന് രാവിലെയോടെ ഇവർ പോലീസിൽ പരാതി നൽകി. വിഷയത്തിൽ തുടർ നടപടികൾ സ്വീകരിക്കുമെന്ന് പോലീസ് അറിയിച്ചു. കഴിഞ്ഞ ദിവസം സ്കൂളിൽ വിദ്യാർഥികൾ തമ്മിൽ വാക്കേറ്റവും സംഘർഷവും നടന്നിരുന്നതായാണ് സൂചന. ഇതിന് പിന്നാലെയാണ് ഇതിൽ ഒരു കുട്ടിക് നേരെയുള്ള സഹപാഠിയുടെ പിതാവിന്റെ മർദനം.

ജില്ലയിൽ കഴിഞ്ഞ ദിവസം പട്ടാമ്പിയിലും വിദ്യാർഥികളുടെ കൂട്ടത്തല്ല് ഉണ്ടായിരുന്നു. പട്ടാമ്പി പോലീസ് സ്റ്റേഷന് മുൻവശത്തെ ബസ് കാത്തിരിപ്പ് കേന്ദ്രത്തിൽ വച്ചാണ് വിദ്യാര്‍ഥികള്‍ തമ്മില്‍ തല്ലിയത്. സ്വകാര്യ വിദ്യാഭ്യാസ സ്ഥാപനത്തിലെ കുട്ടികൾ ചേരി തിരിഞ്ഞു പരസ്പരം അടികൂടുകയായിരുന്നു. പോലീസ് എത്തിയാണ് വിദ്യാർഥികളെ പിടിച്ച് മാറ്റിയത്. പ്ലസ് ടു വിദ്യാര്‍ത്ഥികളും സ്‌കൂളില്‍ നിന്ന് ഈ വര്‍ഷം പഠിച്ചിറങ്ങിയ വിദ്യാര്‍ത്ഥികളും നേരത്തെയുള്ള പ്രശ്‌നങ്ങളുടെ പേരില്‍ ഏറ്റുമുട്ടുകയായിരുന്നു. സംഘര്‍ഷത്തെ തുടര്‍ന്ന് തൊട്ടടുത്തുള്ള പോലീസ് എത്തിയതില്‍ തല്ല് അധിക നേരം നീണ്ടുനിന്നില്ല. തുടര്‍ന്ന് രക്ഷിതാക്കളെ വിളിച്ചുവരുത്തി താക്കീത് നല്‍കിയാണ് വിട്ടയച്ചത്.

English summary

10th class student beaten up by classmates father palakkad vadakkanchery on thursday police starts probe