വിഴിഞ്ഞം സംഘര്ഷം; കടുത്ത നടപടിയുമായി പൊലീസ്, ഒരാള് അറസ്റ്റില്
തിരുവനന്തപുരം: വിഴിഞ്ഞത്ത് കഴിഞ്ഞ ദിവസമുണ്ടായ സംഘര്ഷവുമായി ബന്ധപ്പെട്ട് ഒരാള് അറസ്റ്റില്. വിഴിഞ്ഞം സ്വദേശി സെല്റ്റനെയാണ് അറസ്റ്റിലായത്. വിഴിഞ്ഞം തുറമുഖത്തെ അനുകൂലിക്കുന്നവരെയും പൊലീസിനെതിരെയും ആക്രമണം നടത്തിയതിനും പൊതുമുതല് നശിപ്പിച്ചതിനുമാണ് അറസ്റ്റ് ചെയ്തിരിക്കുന്നത്. സമരപ്പന്തലിലെ സ്ഥിര സാന്നിദ്ധ്യമാണ് സെല്റ്റന്.
അതേസമയം, സംഘര്ഷത്തില് ലത്തീന് അതിരൂപത ആര്ച്ച് ബിഷപ്പ് ഡോ. തോമസ് ജെ നെറ്റോ ഒന്നാം പ്രതി എന്ന് റിപ്പോര്ട്ട്. സഹായമെത്രാന് ആര് ക്രിസ്തുദാസ് ഉള്പ്പെടെ അമ്പതോളം വൈദികര് പ്രതിപ്പട്ടികയിലുണ്ട്. കണ്ടാലറിയാവുന്ന ആയിരം പേര്ക്കെതിരെയും കേസെടുത്തിട്ടുണ്ട്. ആര്ച്ച് ബിഷപ്പും വൈദികരും ചേര്ന്ന് ഗൂഢാലോചന നടത്തിയെന്ന് എഫ്ഐആറില് പറയുന്നു.
രണ്ടു ലക്ഷം രൂപയുടെ പൊതുമുതല് നശിപ്പിച്ചതിനും കേസെടുത്തിട്ടുണ്ട്. സംഘര്ഷ ഭൂമിയില് നിന്നും ലഭിച്ച പരാതിക്ക് പുറമേ, സ്വമേധയായും പൊലീസ് കേസെടുത്തിട്ടുണ്ട്. നിയമവിരുദ്ധമായി സംഘം ചേരല്, അതിക്രമിച്ച് കടക്കല് തുടങ്ങിയ വകുപ്പുകളും ചുമത്തിയിട്ടുണ്ട്. സംഘര്ഷത്തില് 10 കേസുകളാണ് എടുത്തത്. ഇതില് തുറമുഖ പദ്ധതിയെ എതിര്ക്കുന്ന സമരസമിതിക്കെതിരെ ഒമ്പതു കേസുകളാണ് രജിസ്റ്റര് ചെയ്തത്. തുറമുഖ നിര്മ്മാണത്തെ അനുകൂലിക്കുന്ന ജനകീയ സമിതിക്കെതിരെ ഒരു കേസുമാണ് എടുത്തത്.
അതേസമയം, വിഴിഞ്ഞത്ത് സമരത്തിന്റെ പേരില് കലാപം സൃഷ്ടിക്കാന് ശ്രമിക്കുന്നുവെന്ന് മന്ത്രി ആന്റണി രാജു പറഞ്ഞു. സര്ക്കാരും പൊലീസും ആത്മ സംയമനം പാലിക്കുകയാണ്. ഇതിനെ പൊലീസിന്റെ ദൗര്ഭല്യമായി ആരും കാണരുത്. സര്ക്കാര് കൃത്യമായി ഇടപെട്ടു. മുഖ്യമന്ത്രി ഉള്പ്പടെ ചര്ച്ച നടത്തി. സര്ക്കാരിനെ കൊണ്ട് ചെയ്യാന് സാധിക്കുന്ന എല്ലാം ചെയ്തു. എന്നിട്ടും സമരത്തില് നിന്ന് പിന്മാറാന് തയ്യാരാകുന്നില്ല. യതാര്ത്ഥ്യ ബോധത്തോടെ പെരുമാറാന് തയ്യാറാകണമെന്നും അദ്ദേഹം വ്യക്തമാക്കി.
അതേസമയം, വിഴിഞ്ഞം സമരത്തിനിടെ ഉണ്ടായ സംഘര്ഷത്തിന്റെ പേരില് ലത്തീന് അതിരൂപത ആര്ച്ച് ബിഷപ്പ് ഉള്പ്പെടെയുള്ള വൈദികരെ പ്രതികളാക്കി പൊലീസ് കേസെടുത്തത് അംഗീകരിക്കാനാകില്ലെന്ന് പ്രതിപക്ഷ നേതാവ് വിഡി സതീശന് പറഞ്ഞു. ഇത് കേട്ടുകേള്വിയില്ലാത്ത സംഭവമാണ്. ആര്ച്ച് ബിഷപ്പ് ഡോ. തോമസ് ജെ. നെറ്റോയെയാണ് ഒന്നാം പ്രതിയാക്കിയിരിക്കുന്നത്.
സഹായമെത്രാന് ക്രിസ്തുരാജ് ഉള്പ്പെടെ അമ്പതോളം വൈദികരും പ്രതിപ്പട്ടികയിലുണ്ട്. അദാനിക്ക് വേണ്ടി എന്തും ചെയ്യുമെന്ന നിലയിലേക്ക് പിണറായി സര്ക്കാര് എത്തിയെന്ന് വ്യക്തമാക്കുന്നതാണ് പൊലീസ് നടപടി. വിഴിഞ്ഞത്തുണ്ടായ സംഘര്ഷം സര്ക്കാരിന്റെ ആസൂത്രിത നീക്കത്തെ തുടര്ന്നാണെന്ന ലത്തീന് രൂപതയുടെ ആരോപണം ഗുരുതരമാണ്. അതേക്കുറിച്ചും അന്വേഷിക്കണമെന്നും പ്രതിപക്ഷ നേതാവ് ആവശ്യപ്പെട്ടു.
Click it and Unblock the Notifications
Sign in with Google