ഇന്ത്യയിലെ ഏറ്റവും ഉയരം കൂടിയ കെട്ടിടം മുംബൈയിൽ ഒരുങ്ങുന്നു..? വിശേഷങ്ങൾ അറിയാം

Updated: Tuesday, November 21, 2023, 17:55 [IST]

മുംബൈ മഹാനഗരം ഇന്ത്യയുടെ സാമ്പത്തിക തലസ്ഥാനമാണ്. ഒരുപരിധി വരെ ഇന്ത്യയിലെ സമ്പന്നരുടെ വലിയൊരു ഭാഗം വസിക്കുന്ന അതീവ പ്രാധാന്യമുള്ള മെട്രോ നഗരം. ഇന്ത്യയിലെ ഏറ്റവും ഉയരം കൂടിയ കെട്ടിടം എന്ന പൊൻതൂവൽ കൂടി മുംബൈ നഗരത്തിന് ലഭിക്കുമെന്നാണ് ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്.

സൗത്ത് മുംബൈയിലെ ടാർഡിയോ പദ്ധതിയാണ് ഇന്ത്യയിലെ ഏറ്റവും ഉയരം കൂടിയ കെട്ടിടമായി മാറാൻ ഒരുങ്ങുന്നത്. ഇന്ത്യയിലെ തന്നെ ഏറ്റവും ഉയരം കൂടിയ കെട്ടിടത്തിന് ഇടമൊരുക്കുന്നത് സൗത്ത് മുംബൈയാണ്. മാൻ ഇൻഫ്രാകൺസ്ട്രക്ഷൻ ലിമിറ്റഡ് (എംഐസിഎൽ) എന്ന കമ്പനിയാണ് ഇത് പണി കഴിപ്പിക്കുന്നത്.

ഇതടക്കം ആകെ മൂന്ന് റിയൽ എസ്‌റ്റേറ്റ് പാർപ്പിട സമുച്ചയ പദ്ധതികളിലൂടെ 8000 കോടിയുടെ വരുമാനമാണ് എംഐസിഎൽ ലക്ഷ്യമിടുന്നത്. ഏകദേശം മൂവായിരം കോടി രൂപ ചിലവ് വരുന്ന കെട്ടിടമാണ് സൗത്ത് മുംബൈയിൽ ഒരുങ്ങുന്ന ടാർഡിയോ പ്രോജക്‌ട് എന്നാണ് കമ്പനി വ്യക്തമാക്കുന്നത്.

സൗത്ത് മുംബൈയിൽ ഒരുങ്ങുന്നത് ഇന്ത്യയിലെ ഉയരം കൂടിയ കെട്ടിടമോ ?

ടാർഡിയോ പദ്ധതിയുടെ നടത്തിപ്പുകാരായ എംഐസിഎൽ അവകാശപ്പെടുന്നത് ഈ കെട്ടിട സമുച്ചയത്തിന് ഏതാണ്ട് 1000 അടിയിലധികം ഉയരമുണ്ടാകും എന്നാണ്. നിലവിൽ രാജ്യത്തെ ഏറ്റവും ഉയരമുള്ളകെട്ടിടമായി കണക്കാക്കപ്പെടുന്ന ലോധ വേൾഡ് ടവേഴ്‌സ് 918 അടി ഉയരവുമായാണ് നിലകൊള്ളുന്നതെന്ന പ്രമുഖ റിയൽ എസ്‌റ്റേറ്റ് കൺസൾട്ടൻസിയായ സിബിആർഇയുടെ റിപ്പോർട്ടിൽ പറയുന്നു.

അപ്പോൾ ആയിരം അടിയാണ് ടാർഡിയോ പ്രോജക്‌ടിലെ കെട്ടിടത്തിന്റെ ഉയരമെങ്കിൽ അതാവും ഇനി മുതൽ ഇന്ത്യയിലെ ഏറ്റവും ഉയരം കൂടിയ കെട്ടിടം. ഏകദേശം 18 ലക്ഷം ചതുരശ്ര അടിയോളം വരുന്ന നിർമ്മാണമാണ് അവിടെ നടക്കാൻ പോവുന്നത്. ഏകദേശം മൂവായിരം കോടി വരുമാന സാധ്യതയുള്ള പദ്ധതിയായാണ് കമ്പനി ഇതിനെ വിലയിരുത്തുന്നത്.

ഏകദേശം 6.25 ലക്ഷം ചതുരശ്ര അടി വരുന്ന ഭാഗമായിരിക്കും പാർപ്പിട സമുച്ചയത്തിനായി വിൽപ്പനയ്ക്ക് വയ്ക്കുക. രണ്ട് പാർപ്പിട സമുച്ചയങ്ങളിലായി 325 യൂണിറ്റുകൾ ഇവിടെ സജ്ജീകരിക്കും. 3ബിഎച്ച്‌കെ, 4ബിഎച്ച്‌കെ, 5ബിഎച്ച്‌കെ എന്നിങ്ങനെ 1200 സ്‌ക്വയർ ഫീറ്റ് മുതൽ 3300 സ്‌ക്വയർ ഫീറ്റ് വരെ വിസ്‌തീർണമുള്ള യൂണിറ്റുകളാവും ഇവിടെ ഒരുക്കുക.