സമ്മാനമായി ഹെലികോപ്റ്റർ, അതിഥികൾക്കായി ചാർട്ടേഡ് വിമാനം; കോടികൾ ഒഴുകിയ ഇന്ത്യയിലെ ചില കല്യാണങ്ങൾ ഇതാ...

വിവാഹം എന്നാൽ സവിശേഷവും പവിത്രവുമായ ഒരു സന്ദർഭമായാണ് ഇന്ത്യയിൽ കണക്കാക്കുന്നത്. കേവലം ഒരു ദിവസത്തെ ആഘോഷമായല്ല അതിനെ നമ്മൾ കാണുന്നത്. മാസങ്ങൾ നീണ്ട ആസൂത്രണവും മറ്റും ഓരോ കല്യാണങ്ങൾക്കും ആവശ്യമായി വരുന്നു. പലപ്പോഴും വിവാഹങ്ങൾ ആഡംബരം കാണിക്കാനുള്ള വേദിയായി മാറി എന്നതാണ് ഇപ്പോഴത്തെ കാലത്തെ കാഴ്‌ച.

അത്തരത്തിൽ ഇന്ത്യൻ വിവാഹങ്ങൾ വളരെ ചെലവേറിക്കൊണ്ടിരിക്കുകയാണ്. ലോകത്തിലെ തന്നെ ഏറ്റവും പണം ഒഴുകിയ വിവാഹങ്ങളിൽ കൂടുതലും ഇന്ത്യയിൽ നിന്നുള്ളതാണ് എന്നതാണ് വാസ്‌തവം. അത്തരത്തിൽ നടന്ന ആഡംബര വിവാഹങ്ങളിൽ ക്രിക്കറ്റ് സൂപ്പർതാരത്തിന്റെയും സിനിമയിലെ പ്രമുഖരുടെയും മുതൽ രാഷ്ട്രീയ നേതാക്കളുടെ മക്കളുടെ വിവാഹം വരെയുണ്ട്.

വനിഷ മിത്തൽ-അമിത് ഭാട്ടിയ വിവാഹം: പ്രമുഖ വ്യവസായി ലക്ഷ്‌മി മിത്തലിന്റെ മകൾ വനിഷയും ബാങ്കർ അമിത് ഭാട്ടിയയുമായുള്ള വിവാഹം പാരീസിൽ ആറ് ദിവസത്തെ ആഘോഷമായാണ് നടന്നത്, ഏകദേശം 240 കോടി രൂപ ചിലവായെന്നാണ് കണക്കുകൾ. ഇതിന്റെ കൊറിയോഗ്രാഫർ ഫറാ ഖാനായിരുന്നു, പോപ്പ് ഗായിക കൈലി മിനോഗും ചടങ്ങിന്റെ ആകർഷണമായിരുന്നു.

കോൺഗ്രസ് നേതാവ് കൻവർ സിംഗ് തൻവാറിന്റെ മകന്റെ വിവാഹം- കോൺഗ്രസ് നേതാവ് കൻവർ സിംഗ് തൻവറിന്റെ മകൻ ലളിതിന്റെ വിവാഹം ഹരിയാനയിലെ ജൗനാപൂർ ഗ്രാമത്തിൽ ഗംഭീരമായ ചടങ്ങായിരുന്നു. ഒരു ഹെലികോപ്റ്ററും 21 കോടി രൂപയുമാണ് സമ്മാനമായി നൽകിയത്. അതിഥികൾക്ക് 30 ഗ്രാം വെള്ളി ബിസ്‌കറ്റ്, സഫാരി സ്യൂട്ട് സെറ്റ്, ഷാൾ, 2100 രൂപ എന്നിവ അടങ്ങുന്ന സമ്മാനവും നൽകി.

ജനാർദ്ദന റെഡ്ഡിയുടെ മകളുടെ വിവാഹം- കർണാടക മുൻ മന്ത്രി ജനാർദ്ദന റെഡ്ഡിയുടെ മകളുടെ വിവാഹം രാജകീയ ചടങ്ങായിരുന്നു. 500 കോടിയിലധികം രൂപയാണ് വിവാഹച്ചെലവായി കണക്കാക്കിയിരുന്നത്. 30 ഏക്കറിൽ പരന്നുകിടക്കുന്ന ബോളിവുഡ് ശൈലിയിലെ സെറ്റുകൾ, ഒരു വലിയ എയർകണ്ടീഷൻ ചെയ്‌ത കൂടാരം എന്നിവയുള്ള വിപുലമായ പ്രവേശന കവാടവും ആഡംബര ആഘോഷത്തിൽ ഉൾപ്പെടുന്നു. വിവാഹ ലെഹങ്കയ്ക്ക് മാത്രം 17 കോടി രൂപയാണ് ചെലവായത്.

അനുഷ്‌ക ശർമ്മയുടെയും വിരാട് കോഹ്‌ലിയുടെയും വിവാഹം- നടി അനുഷ്‌ക ശർമ്മയുടെയും ക്രിക്കറ്റ് താരം വിരാട് കോഹ്‌ലിയുടെയും വിവാഹത്തിന് ഏകദേശം 90 കോടി രൂപയാണ് ചെലവ് കണക്കാക്കിയിരിക്കുന്നത്. ഇറ്റലിയിലെ ലേക്ക് കോമോയിൽ നടന്ന ആഡംബര ചടങ്ങിൽ ദമ്പതികൾ വിവാഹിതരായി, തുടർന്ന് ഡൽഹിയിലും മുംബൈയിലും റിസപ്ഷനുകൾ നടന്നു.

പ്രിയങ്ക ചോപ്രയുടെയും നിക്ക് ജോനാസിന്റെയും വിവാഹം- ബോളിവുഡ് താരം പ്രിയങ്ക ചോപ്രയുടെയും ഗായകൻ നിക്ക് ജോനാസിന്റെയും വിവാഹത്തിന് ഉദയ്‌പൂരിലെ ഉമ്മദ് പാലസിൽ 105 കോടി രൂപ ചെലവായി. ഇന്ത്യയിലെ ഏറ്റവും സമ്പന്നമായ ഹോട്ടലുകളിലൊന്നിൽ അതിഥികൾക്ക് ആഡംബര വിരുന്നും നടത്തി.

മുകേഷ് അംബാനിയുടെ മകൾ ഇഷയുടെ വിവാഹം- മുകേഷ് അംബാനിയുടെ മകൾ ഇഷയുടെ ആനന്ദ് പിരമളുമായുള്ള വിവാഹം ഉദയ്‌പൂരിൽ നടന്നത് താരനിബിഡമായിരുന്നു. വിവാഹത്തിനു മുമ്പുള്ള പരിപാടി ഗായിക ബിയോൺസ് അവതരിപ്പിച്ചു, 100ലധികം ചാർട്ടേഡ് ഫ്ലൈറ്റുകൾ ലോകമെമ്പാടുമുള്ള അതിഥികളെ ഇവിടേക്ക് എത്തിച്ചു. അതിഥി പട്ടികയിൽ ഹിലരി ക്ലിന്റൺ, ലക്ഷ്മി മിത്തൽ, ദേവേന്ദ്ര ഫഡ്‌നാവിസ്, സച്ചിൻ ടെണ്ടുൽക്കർ, പ്രിയങ്ക ചോപ്ര, നിക്ക് ജോനാസ് തുടങ്ങിയ പ്രമുഖർ ഉൾപ്പെടുന്നു.

English summary

The Last Word Of Luxury, Spend Almost 500 Crores; These Are The Most Expensive Indian Weddings