കാനഡയുടേത് വല്ലാത്ത പണിയായിപ്പോയി: ഇന്ത്യക്കാർ മാത്രമല്ല, 'പണി കിട്ടിയവർ' സ്വന്തം രാജ്യത്തും

ടൊറൻ്റോ: അന്താരാഷ്ട്ര വിദ്യാർത്ഥി പെർമിറ്റുകള്‍ക്ക് രണ്ട് വർഷത്തേക്ക് നിയന്ത്രണം ഏർപ്പെടുത്തുന്ന കാനഡയുടെ നയം കഴിഞ്ഞ ദിവസം മുതല്‍ പ്രാബല്യത്തില്‍ വന്നിരിക്കുകയാണ്. പാർപ്പിട മേഖലയില്‍ രൂപപ്പെട്ട പ്രതിസന്ധി എല്ലാ പരിധിയും വിട്ട ഘട്ടത്തിലായിരുന്നു വിദേശ വിദ്യാർത്ഥികളെ നിയന്ത്രിക്കാന്‍ കാനഡ തീരുമാനിച്ചത്. കഴിഞ്ഞ വർഷം കാനഡ വിദേശ വിദ്യാർത്ഥികൾക്കായി 650000-ലധികം സ്റ്റഡി പെർമിറ്റുകളാണ് നല്‍കിയത്.

സർക്കാർ കണക്കുകൾ പ്രകാരം, രാജ്യത്തേക്ക് പ്രവേശിക്കുന്ന അന്താരാഷ്ട്ര വിദ്യാർത്ഥികളുടെ എണ്ണം പത്ത് വർഷത്തിന് മുമ്പ് ഉള്ളതിനേക്കാള്‍ മൂന്നിരട്ടിയാണ്. പുതിയ നിയന്ത്രണങ്ങളുടെ സാഹചര്യത്തില്‍ 2024-ൽ ഏകദേശം 364000 പെർമിറ്റുകൾ മാത്രമായിരിക്കും നല്‍കുക. ചില സ്ഥാപനങ്ങളിൽ പഠിച്ച വിദേശ വിദ്യാർത്ഥികൾക്ക് ബിരുദാനന്തര ബിരുദം നൽകുന്ന വർക്ക് പെർമിറ്റുകളുടെ എണ്ണത്തിലും നിയന്ത്രണമുണ്ട്.

വർക്ക് പെർമിറ്റുകൾ സ്ഥിരതാമസത്തിനുള്ള എളുപ്പവഴിയായിട്ടായിരുന്നു വിദേശ വിദ്യാർത്ഥികള്‍ കണ്ടത്. മാസ്റ്റേഴ്സ് അല്ലെങ്കിൽ പോസ്റ്റ്-ഡോക്ടറേറ്റ് പ്രോഗ്രാമുകൾ ചെയ്യുന്ന വിദ്യാർത്ഥികള്‍ക്ക് മൂന്ന് വർഷത്തെ വർക്ക് പെർമിറ്റിന് കാനഡയില്‍ അർഹതയുണ്ട്. അതേസമയം, ബിരുദ, കോളേജ് പ്രോഗ്രാമുകൾ ഉൾപ്പെടെയുള്ള മറ്റ് മേഖലകളിലെ അന്തർദ്ദേശീയ വിദ്യാർത്ഥികളുടെ പങ്കാളികൾക്ക് ഇനി വിസ നല്‍കില്ലെന്നും കാനഡ വ്യക്തമാക്കിയിട്ടുണ്ട്.

കോഴ്‌സുകൾ പൂർത്തിയാക്കിയ ശേഷം വർക്ക് പെർമിറ്റുകൾ നേടുന്നത് താരതമ്യേന എളുപ്പമായതിനാൽ കാനഡ അന്തർദ്ദേശീയ വിദ്യാർത്ഥികളുടെ ഒരു ജനപ്രിയ ലക്ഷ്യസ്ഥാനമായിരുന്നു. എന്നാൽ അന്താരാഷ്‌ട്ര വിദ്യാർത്ഥികളുടെ കുതിച്ചുചാട്ടം രൂക്ഷമായ ഭവന പ്രതിസന്ധിയിലേക്ക് നയിച്ചു. വാടകയും ഗണ്യമായ തോതില്‍ വർധിച്ചു. സ്റ്റാറ്റ്‌സ്‌കാൻ അനുസരിച്ച്, രാജ്യവ്യാപകമായി വാടക ഒരു വർഷം കൊണ്ട് 7.7 ശതമാനമാണ് ഉയർന്നത്.

രാഷ്ട്രീയ പ്രതിസന്ധി

അടുത്ത വർഷം നടക്കാനിരിക്കുന്ന തിരഞ്ഞെടുപ്പിന് മുന്നോടിയായുള്ള അഭിപ്രായ വോട്ടെടുപ്പിൽ പ്രതിപക്ഷ കൺസർവേറ്റീവ് പാർട്ടി നേതാവ് പിയറി പൊയിലീവ്രെ ട്രൂഡോയെക്കാൾ മികച്ച ലീഡ് നേടിയതും പെട്ടെന്നുള്ള നിയന്ത്രണങ്ങള്‍ക്ക് കാരണമായിട്ടുണ്ട്. വാടക പ്രതിസന്ധിക്ക് പുറമേ, ചില സ്ഥാപനങ്ങൾ നൽകുന്ന വിദ്യാഭ്യാസത്തിൻ്റെ ഗുണനിലവാരത്തിലും സർക്കാരിനെതിരെ വിമർശനം ഉയർന്നിരുന്നു.

തിരിച്ചടി നേരിട്ടവർ

അന്താരാഷ്ട്ര വിദ്യാർത്ഥികൾ കനേഡിയൻ സമ്പദ്‌വ്യവസ്ഥയിലേക്ക് പ്രതിവർഷം 22 ബില്യൺ C$ (16.4 ബില്യൺ ഡോളർ) സംഭാവന ചെയ്യുന്നു എന്നാണ് കണക്ക്. വിദ്യാർത്ഥികളുടെ തുടർച്ചയായ വരവ് പ്രതീക്ഷിച്ച് കാമ്പസുകൾ വിപുലീകരിച്ച നിരവധി വിദ്യാഭ്യാസ സ്ഥാപനങ്ങളുണ്ട്. പുതിയ നിയന്ത്രണങ്ങള്‍ ഏറ്റവും വലിയ തിരിച്ചടിയായി മാറുന്നവരില്‍ ഒരു കൂട്ടർ ഇവരുമാണ്.

ഏറ്റവും കൂടുതല്‍ ജനസംഖ്യയുള്ള പ്രവിശ്യയായ ഒൻ്റാറിയോയിലേക്കായിരുന്നു കൂടുതല്‍ വിദേശ വിദ്യാർത്ഥികള്‍ എത്തിയിരുന്നത്. റസ്റ്റോറൻ്റുകളും റീട്ടെയിൽ മേഖലകളും ഉൾപ്പെടെയുള്ള ചില ബിസിനസുകൾ വിദേശ വിദ്യാർത്ഥികളുടെ പരിധി താൽക്കാലിക തൊഴിലാളികളുടെ ക്ഷാമം സൃഷ്ടിക്കുമെന്ന ആശങ്കയും നിലനില്‍ക്കുന്നുണ്ട്. അതേസമയം തന്നെ നിലവില്‍ കാനഡയില്‍ ഉള്ളവർക്ക് തൊഴില്‍ ലഭിക്കാനുള്ള സാഹചര്യവുമുണ്ട്.

കാനഡയിലുടനീളമുള്ള റെസ്റ്റോറൻ്റുകൾ ഏകദേശം 100000 ഒഴിവുകളുള്ള തൊഴിൽ ക്ഷാമം നേരിടുന്നുണ്ട്. കൂടാതെ 2023 ൽ ഭക്ഷ്യ സേവന വ്യവസായത്തിലെ 1.1 ദശലക്ഷം തൊഴിലാളികളിൽ 4.6% അന്തർദ്ദേശീയ വിദ്യാർത്ഥികളാണെന്ന റിപ്പോർട്ടുകളും കഴിഞ്ഞ ദിവസം പുറത്ത് വന്നിരുന്നു. കനേഡിയൻ ബാങ്കുകൾക്കും പുതിയ വിദ്യാർത്ഥികളുടെ പ്രവാഹം പ്രയോജനപ്പെട്ടിരുന്നു. കാനഡയില്‍ പ്രവേശിക്കുന്നതിന് ഓരോ വിദ്യാർത്ഥിക്കും ഗ്യാരണ്ടീഡ് ഇൻവെസ്റ്റ്‌മെൻ്റ് സർട്ടിഫിക്കറ്റ് (GIC) ഉണ്ടായിരിക്കണം. നേരത്തെ ഇത് 10000 കനേഡിയന്‍ ഡോളറായിരുന്നെങ്കില്‍ ഇപ്പോള്‍ അത് 20000 ഡോളറായി ഉയർത്തിയിട്ടുണ്ട്. വിദ്യാർത്ഥികളുടെ വരവ് കുറയുന്നതോടെ അവരുടെ പ്രതീക്ഷകളിലും തിരിച്ചടിയുണ്ടായി.

2022-ലെ ഔദ്യോഗിക കണക്കുകൾ പ്രകാരം കാനഡയിലെ 40% വിദേശ വിദ്യാർത്ഥികളും ഇന്ത്യയിൽ നിന്നാണ് വരുന്നത്. 12% ഉള്ള ചൈന രണ്ടാം സ്ഥാനത്താണ്. പുതിയ നിയന്ത്രണങ്ങള്‍ ഈ കണക്കുകളിലെല്ലാം വ്യാപകമായ ഇടിവുകള്‍ രേഖപ്പെടുത്താന്‍ കാരണമായേക്കും.

English summary

Canada's new restrictions will not only affect Indians