കാനഡ പ്രതീക്ഷകള് അടയുന്നു: പകരം ഓപ്ഷന് വേണോ? ഇതാ യുകെയും ജർമ്മനിയും അല്ലാത്ത മികച്ച 3 രാജ്യങ്ങള്
ഭവന പ്രതിസന്ധി അടക്കമുള്ള പ്രതിസന്ധികളുടെ പശ്ചാത്തലത്തില് വിദേശ വിദ്യാർത്ഥികളുടെ എണ്ണത്തില് നിയന്ത്രണം ഏർപ്പെടുത്താന് ഒരുങ്ങുകയാണ് കാനഡ. വിസകളുടെ പരിധിയുടെ എണ്ണമോ, എന്ന് നടപ്പിലാക്കുമെന്നോ പ്രഖ്യാപിച്ചില്ലെങ്കിലും ഇത് സംബന്ധിച്ച തീരുമാനം ഉടന് തന്നെ എടുക്കുമെന്നാണ് ഇമിഗ്രേഷൻ മന്ത്രി മാർക്ക് മില്ലർ കഴിഞ്ഞ ദിവസം വ്യക്തമാക്കിയത്.
ഔദ്യോഗിക കണക്കുകൾ പ്രകാരം കഴിഞ്ഞ പത്ത് വർഷത്തിലെ കാനഡയിലെ സ്റ്റഡി പെർമിറ്റ് ഉടമകളുടെ എണ്ണം മൂന്നിരട്ടിയായി. 2013-ൽ വിദേശ വിദ്യാർത്ഥികളുടെ എണ്ണം 300000 ആയിന്നെങ്കില് 2023-ൽ ഇത് ഏകദേശം 900,000 ആയി. ഇന്ത്യയാണ് കാനഡയിലെ ഏറ്റവും വലിയ അന്താരാഷ്ട്ര വിദ്യാർത്ഥി ഗ്രൂപ്പ്.
വിദ്യാർത്ഥികള്ക്ക് നിയന്ത്രണം ഏർപ്പെടുത്തുന്നതിന് പുറമെ മറ്റ് പല നിയന്ത്രണങ്ങളും കാനഡ നടപ്പിലാക്കി തുടങ്ങിയിട്ടുണ്ട്. അടുത്തവര്ഷംമുതല് കാനഡയില് പഠിക്കാനാഗ്രഹിക്കുന്നവര് ജീവിതച്ചെലവിനായി 20,635 കനേഡിയന് ഡോളര് (12,66,476 രൂപ) അക്കൗണ്ടില് കാണിക്കേണ്ടിവരും. കഴിഞ്ഞ രണ്ട് പതിറ്റാണ്ടായി ഇത് 10,000 ഡോളറായിരുന്നു (ഏകദേശം 6.13 ലക്ഷം രൂപ).
ഇതോടൊപ്പം തന്നെ 2023 ന്റെ രണ്ടാം പകുതിയിൽ, ഇന്ത്യയിൽ നിന്നുള്ള വിദ്യാർത്ഥി വിസ അപേക്ഷകളിൽ ഏകദേശം 40% നിരസിക്കപ്പെട്ടുവെന്ന് ടൊറന്റോ സ്റ്റാർ അടുത്തിടെ റിപ്പോർട്ട് ചെയ്തിരുന്നു. ഇത് എല്ലാ രാജ്യങ്ങളിലെയും ഏറ്റവും ഉയർന്ന നിരസിക്കൽ നിരക്കാണ്. നിരസിക്കാനുള്ള കാരണങ്ങൾ 'മറ്റുള്ളവ' അല്ലെങ്കിൽ 'വ്യക്തമല്ലാത്തത്' എന്നിങ്ങനെ തരംതിരിക്കുകയും ചെയ്തിട്ടുണ്ട്.
2023-ന്റെ നാലാം പാദത്തിൽ ഇന്ത്യക്കാർക്ക് അനുവദിച്ച സ്റ്റഡി പെർമിറ്റുകളിൽ 86 ശതമാനം ഇടിവാണ് ഉണ്ടായിരിക്കുന്നത്. കഴിഞ്ഞ വർഷം അവസാനം 14,910 വിദ്യാർത്ഥികൾക്ക് മാത്രമാണ് സ്റ്റഡി പെർമിറ്റ് നൽകിയിരിക്കുന്നത്. എന്നാൽ നേരത്തെ ഇത് 108,940 വിദ്യാർത്ഥികളായിരുന്നുവെന്നും റിപ്പോർട്ടുകള് പറയുന്നു.
കാനഡയിലെ സാഹചര്യം ഇങ്ങനെ തുടരുകയാണെങ്കില് ഇന്ത്യന് വിദ്യാർത്ഥികള് സ്വാഭാവികമായും മറ്റ് സാധ്യതകള് തേടിതുടങ്ങിയിട്ടുമുണ്ട്. 2024-ൽ വിദ്യാർത്ഥികൾ വിദേശ യാത്രകൾക്കായി കാനഡ, യുഎസ്, യുകെ, ഓസ്ട്രേലിയ എന്നീ രാജ്യങ്ങള്ക്ക് അപ്പുറത്തുള്ള ഓപ്ഷനുകൾ കൂടുതലായി നോക്കുമെന്നാണ് ApplyBoard ചീഫ് എക്സ്പീരിയൻസ് ഓഫീസർ കരുൺ കണ്ടോയ് പ്രവചിക്കുന്നത്.
അയർലൻഡ്, ദക്ഷിണ കൊറിയ, തായ്വാൻ, ജപ്പാന് എന്നിവ ഈ വർഷം അന്താരാഷ്ട്ര വിദ്യാർത്ഥികൾക്കായി മത്സരിക്കുന്ന മുൻനിര രാജ്യങ്ങളായി മാറിയേക്കാമെന്നും അദ്ദേഹം നിരീക്ഷിക്കുന്നു. ഈ രാജ്യങ്ങളില് ഇതിനോടകം തന്നെ വിദേശ വിദ്യാർത്ഥികള് എത്തിതുടങ്ങിയിട്ടുണ്ടെന്നും അദ്ദേഹം പറയുന്നു.
അയർലൻഡ്: വിദേശത്ത് പഠിക്കാനുള്ള ഒരു മികച്ച ലക്ഷ്യസ്ഥാനമായി ഇന്ത്യൻ വിദ്യാർത്ഥികൾ അയർലണ്ടിനെ പരിഗണിക്കാന് തുടങ്ങിയിട്ട് അധിക കാലമായിട്ടില്ല. രാജ്യത്തെ എല്ലാ സർവ്വകലാശാലകളും ആഗോളതലത്തിൽ മികച്ച 3% റാങ്കിംഗിൽ ഇടംപിടിച്ചതിനാൽ, അയർലൻഡ് ഉയർന്ന നിലവാരമുള്ള വിദ്യാഭ്യാസത്തിന് പേരുകേട്ടതാണ്. കൂടാതെ, STEM-ലും സാങ്കേതികവിദ്യയിലും അയർലണ്ടിന്റെ ശ്രദ്ധ, അന്തർദ്ദേശീയ വിദ്യാർത്ഥികൾക്ക് ഗവൺമെന്റിൽ നിന്നും സ്ഥാപനങ്ങളിൽ നിന്നുമുള്ള ശക്തമായ പിന്തുണ, പഠനാനന്തര ജോലി അവസരങ്ങൾ, മറ്റ് ലക്ഷ്യസ്ഥാനങ്ങളെ അപേക്ഷിച്ച് കൂടുതൽ താങ്ങാനാവുന്ന ചെലവുകൾ എന്നിവ അയർലണ്ടിനെ മികച്ച തിരഞ്ഞെടുപ്പാക്കി മാറ്റുന്നു.
ദക്ഷിണ കൊറിയ: 2023-ലെ വേനൽക്കാലത്ത്, ദക്ഷിണ കൊറിയൻ വിദ്യാഭ്യാസ മന്ത്രാലയം തങ്ങളുടെ 300K പ്രോജക്റ്റ് പ്രഖ്യാപിച്ചു. 2027-ഓടെ 300,000 അന്തർദ്ദേശീയ വിദ്യാർത്ഥികളെ ആകർഷിക്കുന്നതിനായി സ്ഥാപനങ്ങൾ, പ്രാദേശിക ബിസിനസുകൾ, ഗവൺമെന്റ് എന്നിവ തമ്മിലുള്ള സഹകരണമാണ് ഇതിലൂടെ ലക്ഷ്യമിടുന്നത്. യോഗ്യരായ വിദ്യാർത്ഥികളെ ആറ് വർഷത്തിന് പകരം മൂന്ന് വർഷത്തിന് ശേഷം സ്ഥിരതാമസത്തിന് (പിആർ) അനുവദിക്കുന്ന ഇളവുള്ള പരിശോധനാ നടപടികളും രാജ്യം പരിഗണിച്ച് വരുന്നു.
തായ്വാൻ: തായ്വാൻ 2030-ഓടെ 320,000-ത്തിലധികം വിദ്യാർത്ഥികളെ റിക്രൂട്ട് ചെയ്യാനും ബിരുദാനന്തര നിലനിർത്തൽ നിരക്ക് 40% ൽ നിന്ന് 70% ആക്കാനും പദ്ധതിയിടുന്നു. ഡബിൾ ബാച്ചിലർ പ്രോഗ്രാമുകൾ, രണ്ട് വർഷത്തെ ബാച്ചിലർ ബിരുദങ്ങൾ, രണ്ട് വർഷത്തെ മാസ്റ്റേഴ്സ്, ഡോക്ടറൽ പ്രോഗ്രാമുകൾ എന്നിവ ഉൾക്കൊള്ളുന്ന പ്രത്യേക ഫാസ്റ്റ് ട്രാക്ക് കോഴ്സുകൾ, പ്രത്യേകിച്ച് STEM ഫീൽഡുകളിൽ സ്ഥാപിക്കുന്നതിന് തായ്വാൻ വിദ്യാഭ്യാസ മന്ത്രാലയം സൗകര്യമൊരുക്കുമെന്നും വിദഗ്ധർ ചൂണ്ടിക്കാണിക്കുന്നു.
Click it and Unblock the Notifications
Sign in with Google