ധാര്മിക പൊലീസ് ചമഞ്ഞ് 16കാരിയെ ചുട്ടുകൊന്നു
ഗാസിയാബാദ്: ധാര്മിക പൊലീസ് ചമഞ്ഞ ഗ്രാമീണര് പതിനാറുകാരിയെ ചുട്ടുകൊന്നു. ഗ്രാമത്തില്ത്തന്നെയുള്ള ഒരു യുവാവുമായി പെണ്കുട്ടി ലൈംഗിക ബന്ധം പുലര്ത്തുന്നുണ്ടെന്നാരോപിച്ചാണ് നാലു പേര് ചേര്ന്ന് പെണ്കുട്ടിയെ ജീവനോടെ തീകൊളുത്തിയത്.
തിങ്കളാഴ്ച ഉച്ചതിരിഞ്ഞാണ് സംഭവം നടന്നത്. ഗുരുതരമായി പൊള്ളലേറ്റ കുട്ടിയെ മോഡിനഗര് ആശുപത്രിയില് പ്രവേശിപ്പിച്ചെങ്കിലും പിന്നീട് മരിക്കുകയായിരുന്നു.
ഭോജ്പൂര് പൊലീസ് സ്റ്റേഷന് പരിധിയില്പ്പെട്ട തിയോറി ഗ്രാമത്തിലാണ് അരുംകൊല നടന്നത്. പെണ്കുട്ടിയുടെ വീട്ടില് അടിക്കടി ആളുകള് വന്നുപോകുന്നുണ്ടെന്നും അവിടെ അനാശാസ്യ പ്രവര്ത്തനമാണ് നടക്കുന്നതെന്നും ആരോപണമുണ്ടായിരുന്നുവത്രേ.
തിങ്കളാഴ്ച വൈകീട്ട് നാല് യുവാക്കള് പെണ്കുട്ടിയുടെ വീട്ടിലെത്തി ഇര്ഫാന് എന്നയാള് എന്തിനാണ് അവിടെ അടിക്കടി സന്ദര്ശനം നടത്തുന്നതെന്ന് ചോദിച്ചുവത്രേ.
യുവാക്കള് പ്രശ്നമുണ്ടാക്കാനാണ് വന്നതെന്ന് മനസ്സിലായപ്പോള് കൊല്ലപ്പെട്ട കുട്ടിയുടെ അനിയത്തി വീട്ടില് നിന്നും ഓടി രക്ഷപ്പെട്ടു. ഇതിനിടെ യുവാക്കള് മറ്റേ പെണ്കുട്ടിയെ മര്ദ്ദിച്ചവശയാക്കി മണ്ണെണ്ണയൊഴിച്ച് തീകൊളുത്തുകയായിരുന്നു.
മരിക്കുന്നതിന് മുമ്പ് തന്നെ മര്ദ്ദിച്ച് തീകൊളുത്തിയ യുവാക്കള്ക്കെതിരെ പെണ്കുട്ടി മൊഴി നല്കിയിട്ടുണ്ട്. പൊലീസ് ഇവര്ക്കായുള്ള തിരച്ചില് നടത്തുകയാണ്.