വിസ നിയന്ത്രണത്തിനെതിരെ പ്രേംജി

വാഷ്‌ങ്‌ടണ്‍: വിദഗ്‌ദ തൊഴിലാളികള്‍ക്കുള്ള എച്ച്‌ വണ്‍ ബി വിസയ്‌ക്ക്‌ നിയന്ത്രണം ഏര്‍പ്പെടുത്തിക്കൊണ്ടുള്ള അമേരിക്കയുടെ തീരുമാനം അവര്‍ക്കുതന്നെ ദോഷം ചെയ്യുമെന്ന്‌ വിപ്രോ ചെയര്‍മാന്‍ അസിം പ്രേംജി.

ഇത്‌ അമേരിക്കയെ സ്‌തംഭനത്തിലേയ്‌ക്ക്‌ നയിക്കുമെന്നും ഇന്ത്യയുമായുള്ള കച്ചവടയുദ്ധത്തിന്‌ വഴിവച്ചേയ്‌ക്കുമെന്നും ബിസിനസ്‌ സ്റ്റാന്‍ഡേര്‍ഡിന്‌ നല്‍കിയ അഭിമുഖത്തില്‍ പ്രേംജി പറഞ്ഞു.

വിദഗ്‌ധതൊഴിലാളികളുടെ അഭാവം പ്രാദേശിക തൊഴിലാളികളെ വച്ച്‌ നികത്താനാവില്ല. വിദഗ്‌ധ തൊഴിലാളികളെ വളരെയെളുപ്പം ലഭിക്കില്ല. അതുപോലെതന്നെ ഇന്ത്യപോലുള്ള രാജ്യവുമായി കച്ചടവയുദ്ധത്തിനായിരിക്കും അമേരിക്ക തുടക്കം കുറിയ്‌ക്കുക.- പ്രേംജി പറഞ്ഞു.

അമേരിക്കയിലെ വന്‍കിട കമ്പനികളുടെ വരുമാനത്തിന്റെ 60മുതല്‍ 70ശതമാനം വരെ ഇന്ത്യ, ചൈന എന്നീ രാജ്യങ്ങളില്‍ നിന്നുമാണ്‌. ഇന്ത്യയില്‍ നിന്നുള്ള തൊഴിലാളികള്‍ക്ക്‌ അമേരിക്ക നിയന്ത്രണം ഏര്‍പ്പെടുത്തുമ്പോള്‍ അമേരിക്കന്‍ കമ്പനികളുമായി നിസഹകരിക്കാനും കരാറുകള്‍ റദ്ദാക്കുവാനും ഇന്ത്യന്‍ സര്‍ക്കാര്‍ നിര്‍ബന്ധിതമാക്കും.

ഇന്ത്യന്‍ കയറ്റുമതിയില്‍ 24ശതമാനം വിഹിതമുള്ള സോഫ്‌റ്റ്‌വേര്‍ അവഗണിക്കാന്‍ സര്‍ക്കാറിനാവില്ല. എച്ച്‌ വണ്‍ ബി വിസ നിയന്ത്രണം സംബന്ധിച്ച ബില്‍ പാസാക്കുന്ന കാര്യത്തില്‍ ഒബാമ കൂടുതല്‍ പക്വമായ നിലപാടെടുക്കുമെന്ന്‌ പ്രേംജി പ്രത്യാശ പ്രകടിപ്പിച്ചു.