സത്യം കന്പ്യൂട്ടേഴ്സ് ഇനി മഹീന്ദ്ര സത്യം

ഹൈദരാബാദ്‌: കമ്പനി ചെയര്‍മാനായിരുന്ന രാമലിംഗരാജുവിന്റെ സാമ്പത്തിക ക്രമക്കേടുകളിലൂടെ വാണിജ്യ ലോകത്തെ ഞെട്ടിച്ച രാജ്യത്തെ പ്രമുഖ സോഫ്‌റ്റ്‌ വെയര്‍ സ്ഥാപനമായ സത്യം കമ്പ്യൂട്ടേഴ്‌സ്‌ ഇനി മഹീന്ദ്ര സത്യം എന്നറിയപ്പെടും.

ഏറെ വിവാദങ്ങളും നിയമനടപടികളും നേരിട്ടതിന്‌ ശേഷമാണ്‌ സത്യം കമ്പ്യൂട്ടേഴ്‌സ്‌ പുതിയ മുഖം തേടുന്നത്‌. മഹീന്ദ്ര ഗ്രൂപ്പിന്റെ ചിഹ്നമായിരിക്കും ഇനി കമ്പനി ഉപയോഗിക്കുക.

സാമ്പത്തിക തട്ടിപ്പിലൂടെ സത്യത്തിനുണ്ടായ ചീത്തപ്പേര്‌ മാറ്റിയെടുക്കാനാണ്‌ പേര്‌ മാറ്റത്തിലൂടെ ശ്രമിയ്‌ക്കുന്നതെന്ന്‌ മഹീന്ദ്ര ഗ്രൂപ്പ്‌ മാനേജിങ്‌ ഡയറക്ടര്‍ ആനന്ദ്‌ മഹീന്ദ്ര പറഞ്ഞു. മഹീന്ദ്ര ഗ്രൂപ്പില്‍ നിന്നും ഉപഭോക്താക്കള്‍ക്ക്‌ ലഭിച്ചിരുന്ന വിശ്വസ്‌ത സേവനം മഹീന്ദ്ര സത്യത്തില്‍ നിന്ന്‌ ലഭ്യമാവുമെന്നും അദ്ദേഹം വ്യക്തമാക്കി.

സത്യത്തിന്റെ തിരിച്ചുവരവില്‍ ഈ പേര്‌ മാറ്റം നിര്‍ണായകമാവുമെന്ന്‌ കമ്പനിയുടെ എക്‌സിക്യൂട്ടീവ്‌ വൈസ്‌ ചെയര്‍മാന്‍ വിനീത്‌ നയ്യാര്‍ പറഞ്ഞു. ഏപ്രില്‍ നടന്ന ലേലത്തിലാണ്‌ സത്യം കമ്പ്യൂട്ടേഴ്‌സിനെ ടെക്ക്‌ മഹീന്ദ്ര വാങ്ങിയത്‌.