സ്വാശ്രയം: ഇടതുമുന്നണിയില്‍ പരിഹരിക്കും

തിരുവനന്തപുരം: സ്വാശ്രയ കരാര്‍ പ്രശ്‌നത്തില്‍ മുന്നണിയിലെ ഘടകക്ഷികള്‍ തമ്മിലും മന്ത്രിമാര്‍ തമ്മിലും ഭിന്നത രൂക്ഷമായിരിക്കുന്ന സാഹചര്യത്തില്‍ പ്രശ്‌നത്തിന്‌ പരിഹാരം കാണാന്‍ മന്ത്രിസഭ എല്‍ഡിഎഫ്‌ നേതൃത്വത്തെ ചുമതലപ്പെടുത്തി.

ആഗസ്റ്റ്‌ എട്ടിന്‌ ചേരുന്ന എല്‍ഡിഎഫ്‌ യോഗം കരാറിനെക്കുറിച്ച്‌ ചര്‍ച്ച ചെയ്യും. സ്വാശ്രയ പ്രശ്‌നം എല്‍ഡിഎഫിന്‌ വിടണമെന്ന്‌ മുഖ്യമന്ത്രി വിഎസ്‌ അച്യുതാനന്ദനാണ്‌ മന്ത്രിസഭയില്‍ നിര്‍ദ്ദേശം മുന്നോട്ടുവച്ചത്‌.

എല്‍ഡിഎഫ്‌ യോഗം ചേരുന്നതിന്‌ മുമ്പായി വിദ്യാഭ്യാസ സംഘടനകളുമായി മന്ത്രി എംഎ ബേബി ചര്‍ച്ച ചെയ്യും. സ്വാശ്രയ പ്രശ്‌നം ചര്‍ച്ച ചെയ്‌ത്‌ പരിഹരിക്കാനായി വിദ്യാഭ്യാസ മന്ത്രിയുള്‍പ്പെടെ ബന്ധപ്പെട്ട എല്ലാവരെയും ചുമതലപ്പെടുത്തിയതായാണ്‌ മന്ത്രിസഭാ യോഗത്തിന്‌ ശേഷം വിഎസ്‌ അറിയിച്ചത്‌.

സ്വാശ്രയപ്രശ്‌നം എന്നെന്നേയ്‌ക്കുമായി പരിഹരിക്കുന്നതിന്‌ പുതിയ നിയമം വേണമെന്ന നിലപാടില്‍ ഉറച്ചുനില്‍ക്കാനാണ്‌ സിപിഐയുടെ തീരുമാനം. ഇത്‌ യോഗത്തില്‍ പ്രശ്‌നങ്ങളുണ്ടാകാനിടയാകുമെന്നാണ്‌ കരുതുന്നത്‌.

എന്നാല്‍ വീണ്ടും ഒരു നിയമം കൂടി കൊണ്ടുവരുകയെന്നത്‌ സിപിഎമ്മിന്റെ പരിഗണനയിലില്ലാത്ത കാര്യമാണ്‌. കേന്ദ്രനിയമം മാത്രമേ പരിഹാരമാകൂ എന്ന അഭിപ്രായത്തിലാണ്‌ സിപിഎം നേതൃത്വം. ഇതിനിടെ സ്വാശ്രയപ്രശ്‌നം പരിഹരിക്കാനായി മുന്നണിയുടെ ഉപസമിതിയെ നിയോഗിച്ചേയ്‌ക്കുമെന്ന്‌ സൂചനകളുണ്ട്‌.