പുതിയ മുല്ലപ്പെരിയാര് അണക്കെട്ടിന് 380 കോടി
ഇടുക്കി: പുതിയതായി പണിയാന് ഉദ്ദേശിയ്ക്കുന്ന മുല്ലപ്പെരിയാര് അണക്കെട്ടിന്റെ മതിപ്പ് ചെലവ് 380 കോടി രൂപ. ജല വിഭവ വകുപ്പിന്റെ എട്ടംഗ പഠന സംഘമാണ് ഈ എസ്റ്റിമേറ്റ് തയാറാക്കിയത്. ഈ രേഖ ഓഗസ്റ്റ് 30 തിങ്കളാഴ്ച ചീഫ് എഞ്ചിനിയര്ക്ക് സമര്പ്പിയ്ക്കും.
700 മീറ്റര് നീളവും 54 മീറ്റര് ഉയരവുമുള്ളതാണ് പദ്ധതിയനുസരിച്ചുള്ള ഡാം. നേരത്തെ രണ്ട സ്ഥലങ്ങളിലായി ഡാമുണ്ടാക്കാനാണ് ഉദ്ദേശിച്ചിരുന്നത്. പിന്നീട് സാങ്കേതിക കാരണങ്ങളാല് അത് മാറ്റുകയായിരുന്നു.
ഇപ്പോഴുള്ള മുല്ലപ്പെരിയാര് ഡാം സിമന്റ് ഇല്ലാതെ കുമ്മായം കൊണ്ട് പണിഞ്ഞതാണ്. പുതിയ ഡാം കോണ്ക്രീറ്റിലായിരിയ്ക്കും നിര്മ്മിയ്ക്കുക. ഇതനുസരിച്ചാണ് മതിപ്പ് ചെലവ് തയാറാക്കിയിട്ടുള്ളത്. 2010 ലെ പി ഡബ്ലിയു ഡി റേറ്റ് അടിസ്ഥാനത്തിലാണ് ചെലവ് കണക്കാക്കിയിട്ടുള്ളത്. ഈ ഡാമിലെ വെള്ളം ഉപയോഗിച്ച് ഭാവിയില് വൈദ്യുതി ഉല്പാദിപ്പിയ്ക്കണമെങ്കില് അതിനായി പെന് സ്റ്റോക്ക് പൈപ്പുകള് വേണ്ടിവരും. ഈ ചെലവും ഇപ്പോള് തന്നെ ഉള്പ്പെടുത്തിട്ടുണ്ട്.
ചീഫ് എഞ്ചിനിയര് ഈ മതിപ്പ് ചെലവ് പഠിച്ച ശേഷം അന്തിമ കണക്ക് സര്ക്കാരിന് സമര്പ്പിയ്ക്കും. അവസാന മതിപ്പ് ചെലവ് ഒരാഴ്ചയ്ക്കുള്ളില് തയാറാവുമെന്നാണ് കരുതുന്നത്.