ശബരിമലയില്‍ വന്‍ ഭക്തജനത്തിരക്ക്

ശബരിമല: ശബരിമലയില്‍ ദര്‍ശനത്തിനായി വന്‍ ഭക്ത ജനത്തിരക്ക്. തിക്കിലും തിരക്കിലും പെട്ടു മുതിര്‍ന്ന മാളികപുറങ്ങളും കുട്ടികളുമടക്കമുള്ള തീര്‍ഥാടകര്‍ക്കു പരുക്കേറ്റു.

കാല്‍ നൂറ്റാണ്ടിനിടെ ആദ്യമായാണു നടതുറന്ന ദിവസം ശബരിമലയില്‍ ഇത്രയേറെ തിരക്ക് അനുഭവപ്പെടുന്നത്. ബുധനാഴ്ച പുലര്‍ച്ചെ നാലിന് നട തുറന്നപ്പോള്‍ തന്നെ തീര്‍ഥാടകരുടെ ക്യൂ മരക്കൂട്ടം വരെ നീണ്ടു.

സന്നിധാനത്തെ തിരക്ക് നിയന്ത്രിക്കുന്നതില്‍ പൊലീസ് തീര്‍ത്തും നിസ്സഹായരായി. വിരലിലെണ്ണാവുന്ന പൊലീസുകാര്‍ മാത്രമാണു സന്നിധാനത്ത് തിരക്കു നിയന്ത്രിക്കാന്‍ ഉണ്ടായിരുന്നത്.

ശ്രീകോവിലിന് മുന്നിലേക്കു വന്നിറങ്ങുന്ന ഫ്‌ളൈ ഓവറില്‍ നിയന്ത്രണമില്ലാതെ തീര്‍ഥാടകര്‍ ഇടിച്ചു കയറിയത് തിരക്കു വര്‍ധിക്കാന്‍ കാരണമായി.

ക്യൂവില്‍ കുടുങ്ങിയ കുട്ടികളെ പൊലീസും ധ്രുതകര്‍മ സേനയും ഏറെ പണിപ്പെട്ടു പുറത്തേക്ക് വലിച്ചെടുക്കുകയായിരുന്നു.

തിരക്ക് നിയന്ത്രിക്കാന്‍ എല്ലാ സംവിധാനങ്ങളും ഒരുക്കിയെന്ന് അധികൃതര്‍ പലവട്ടം പറഞ്ഞിട്ടുണ്ടെങ്കിലും ആദ്യദിവസം തന്നെ ക്രമീകരണങ്ങള്‍ പാളുന്ന സ്ഥിതിയാണ് ശബരിമലയിലുള്ളത്.

ചൊവ്വാഴ്ച വൈകീട്ടാണ് മണ്ഡല മഹോത്സവത്തിനായി ശബരിമല നട തുറന്നത്.