കനത്തമഴ:നെടുമ്പാശേരി വിമാനത്താവളം അടച്ചു

നെടുമ്പാശേരി: കനത്ത മഴയെ തുടര്‍ന്ന് നെടുമ്പാശേരി വിമാനത്താവളം തത്ക്കാലത്തേക്ക് അടച്ചു. വിമാന സര്‍വീസുകള്‍ തടസപ്പെടുന്ന വിധത്തില്‍ റണ്‍വേയില്‍ വെള്ളം കയറിയതിനെ തുടര്‍ന്നാണ് വിമാനത്താവളത്തിന്റെ പ്രവര്‍ത്തനം തത്ക്കാലത്തേക്ക് നിര്‍ത്തിവച്ചതെന്ന് അധികൃതര്‍ അറിയിച്ചു. തിങ്കളാഴ്ച ഉച്ചയ്ക്ക് ഒരുമണിവരെയുള്ള 16 വിമാന സര്‍വീസുകള്‍ക്ക് നടപടി ബാധിക്കും.

നെടുമ്പാശേരിയിലേക്കുള്ള വിമാനങ്ങള്‍ തിരുവനന്തപുരം, കോഴിക്കോട് എയര്‍പോര്‍ട്ടുകളിലേക്ക് തിരിച്ചു വിടാനുള്ള നടപടികള്‍ ആരംഭിച്ചതായാണ് റിപ്പോര്‍ട്ട്. ഉച്ചയ്ക്ക് ഒരുമണിക്ക് സ്ഥിതിഗതികള്‍ വിലയിരുത്തിയതിനു ശേഷം മാത്രമെ വിമാനത്തവാളത്തിന്റെ പ്രവര്‍ത്തനം പുനരാരംഭിക്കുകയുള്ളൂ. എന്നാല്‍, സംസ്ഥാനത്ത് രണ്ടു ദിവസം കൂടെ കനത്ത മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.

അതേസമയം, സംസ്ഥാനത്ത് മഴ കനത്തുകൊണ്ടിരിക്കുകയാണ്. അടിമാലി ചീയപ്പാറയില്‍ രക്ഷാപ്രവര്‍ത്തനത്തിനിടെ വീണ്ടും ഉരുള്‍പ്പൊട്ടി. മണ്ണിനടിയില്‍ നിന്ന് നാലുപേരുടെ മൃതദേഹം കണ്ടെടുത്തു. മൂന്നു പേരെ പരിക്കുകളോടെ അടിമാലി ആശുപത്രിയില്‍ പ്രവേശിപ്പിച്ചു. കടകള്‍ക്കും വാഹനങ്ങള്‍ക്കും മുകളിലാണ് മണ്ണിടിഞ്ഞു വീണത്. മൂന്ന് വാഹനങ്ങള്‍ കൊക്കയിലേക്ക് മറിഞ്ഞു, 10 വാഹനങ്ങള്‍ മണ്ണിനടിയില്‍ കുടുങ്ങി. രക്ഷാപ്രവര്‍ത്തനങ്ങള്‍ പുരോഗമിക്കുകയാണ്.

English summary

The runway of the Nedumbassery airport has been temporarily closed due to heavy rains. The flights to Nedumbassery have been diverted to Karipur and Thiruvananthapuram.