'ജാതി സെൻസസ് നടത്താതെ സംവരണം എങ്ങനെ നിർണയിക്കും'; സുപ്രീംകോടതി

Updated: Friday, January 20, 2023, 20:01 [IST]

ഡൽഹി: ജാതി സെൻസസ് നടത്താതെ സംവരണം എങ്ങനെ നിർണയിക്കും എന്ന് സുപ്രീംകോടതി. ഇക്കാര്യം ചോദിച്ച് കോടതി ബീഹാറിലെ ജാതി സെൻസസ് തടയണമെന്ന ആവശ്യം തള്ളി. ബീഹാർ സർക്കാർ ജനുവരി ഏഴിന് ജാതി സെൻസസിന്റെ രണ്ടാം ഘട്ടം ആരംഭിച്ചതിന് ശേഷമാണ് വിജ്ഞാപനം റദ്ദാക്കണമെന്ന ഹരജിയിൽ വാദം കേൾക്കാൻ വിസമ്മതിച്ച് പിൻവലിക്കാൻ അനുവദിച്ചത്.

വേണമെങ്കിൽ ഹൈകോടതിയിൽ പോയി ഹരജി നൽകാനും ജസ്റ്റിസുമാരായ ബി.ആർ ഗവായ്, വിക്രംനാഥ് എന്നിവരടങ്ങുന്ന ബെഞ്ച് നിർദേശിച്ചു. സെൻസസ് ഭരണഘടനയുടെ കേന്ദ്ര വിഷയങ്ങളുടെ പട്ടികയിൽ വരുന്നതാണെന്നും സംസ്ഥാന സർക്കാർ അതിനിറക്കുന്ന വിജഞാപനം തെറ്റാണെന്നുമായിരുന്നു 'ഏക് സോച് ഏക് പ്രയാസ്' എന്ന പേരിൽ ഒരു സംഘം സമർപ്പിച്ച ഹരജിയിൽ ബോധിപ്പിച്ചിരുന്നത്.‌

രാജ്യത്ത് ജാതി സെൻസസ് നടത്തേണ്ടത് അനിവാര്യമാണെന്ന് ആർ.ജെ.ഡി അധ്യക്ഷൻ ലാലു പ്രസാദ് യാദവ് നേരത്തെ പറഞ്ഞിരുന്നു. എസ്.സി, എസ്.ടി, ഒ.ബി.സി വിഭാഗങ്ങളുടെ ജനസംഖ്യ മൊത്തം ജനസംഖ്യയുടെ പകുതിയിലധികമാണെങ്കിൽ 50 ശതമാനം സംവരണപരിധി എടുത്തുകളയണമെന്നും അദ്ദേഹം പറഞ്ഞിരുന്നു.

ആദ്യമായി ജാതി സെൻസസ് എന്ന ആവശ്യമുന്നയിച്ചത് താനാണെന്നും ജാതി സെൻസസ് എന്ന ആവശ്യം ആദ്യമായി പാർലിമെന്റിൽ ഉന്നയിച്ചതും താനാണെന്നും ലാലു പറഞ്ഞിരുന്നു.

എസ്.സി, എസ്.ടി ഉൾപ്പെടെ മുഴുവൻ ജനവിഭാഗങ്ങളുടെയും വികസനമാണ് താൻ ആവശ്യപ്പെടുന്നതെന്നും സ്വാതന്ത്ര്യത്തിന് മുമ്പ് നടന്ന ഒരു സെൻസസിന്റെ അടിസ്ഥാനത്തിലാണ് വിവിധ ജനവിഭാഗങ്ങൾക്കുള്ള ക്വാട്ട ഇപ്പോഴും തീരുമാനിക്കുന്നത്. ജാതി തിരിച്ചുള്ള ഒരു പുതിയ ജനസംഖ്യാ കണക്കെടുപ്പ് നിലവിൽ അനിവാര്യമാണെന്നും ലാലു പ്രസാദ് യാദവ് പറഞ്ഞു.

നിലവിലുള്ള സംവരണ ക്വാട്ട അപര്യാപ്തമാണ്. ഇതുപോലും അപൂർവ്വമായാണ് നികത്തപ്പെടുന്നത്. ഇതിന്റെ ഫലമായി വലിയ തോതിൽ ബാക്ക്‌ലോഗ് രൂപപ്പെട്ടിട്ടുണ്ട്. ഇത് നികത്താൻ ഒരു പുതിയ ജാതി സെൻസസ് നടത്തി ജനസംഖ്യാനുപാതികമായി ആനുകൂല്യങ്ങൾ വിതരണം ചെയ്യണം. അത് 50 ശതമാനം സംവരണപരിധി മറികടക്കുകയാണ് എങ്കില് ആ നിയന്ത്രണം എടുത്തുകളയണമെന്നും അദ്ദേഹം ആവശ്യപ്പെട്ടിരുന്നു.