യുവനടിമാര്‍ക്കെതിരായ ലൈംഗികാതിക്രമം; 20 പേരുടെ മൊബൈല്‍ ഫോണ്‍ പരിശോധിച്ചു, പ്രതികളെ കണ്ടെത്താനായില്ല

കോഴിക്കോട്: സിനിമ പ്രമോഷനിടെ യുവനടിമാര്‍ക്ക് നേരെ ലൈംഗികാതിക്രമം ഉണ്ടായ സംഭവത്തില്‍ പ്രതികളെ കുറിച്ച് വ്യക്തത വരുത്താനാവാതെ പൊലീസ്. 20 ഓളം മൊബൈല്‍ ഫോണ്‍ ദൃശ്യങ്ങളും മാളിലെ സി സി ടി വി ദൃശ്യങ്ങളും ശേഖരിച്ചെങ്കിലും ആളെ കുറിച്ച് വ്യക്തമായ സൂചന പൊലീസിന് ഇതുവരെ ലഭിച്ചിട്ടില്ല.

സംഭവ സമയത്ത് മാളില്‍ ഉണ്ടായിരുന്ന ആളുകളുടെ മൊബൈല്‍ ഫോണ്‍ ദൃശ്യങ്ങള്‍ കേന്ദ്രീകരിച്ച് അക്രമിയെ കണ്ടെത്താനായിരുന്നു പൊലീസ് ശ്രമം. ഇതിനായി പരിപാടിക്കെത്തിയെ 20 ഓളം ആളുകളുടെ മൊബൈല്‍ ഫോണ്‍ ദൃശ്യങ്ങള്‍ ഇതിനകം പരിശോധിച്ചിരുന്നു. എന്നാല്‍ കാര്യമായ തെളിവുകളൊന്നും പൊലീസിന് ലഭിച്ചിട്ടില്ല.

പരിപാടി ചിത്രീകരിച്ച മുഴുവന്‍ ദൃശ്യങ്ങളുടെയും ആദ്യഘട്ട പരിശോധനയിലും പ്രതിയെ കുറിച്ച് വ്യക്തമായ സൂചനകളില്ല എന്നാണ് പുറത്ത് വരുന്ന റിപ്പോര്‍ട്ട്. തുടരന്വേഷണം എങ്ങിനെ വേണം എന്നതിനെ കുറിച്ച് തീരുമാനമെടുക്കാന്‍ ഇന്ന് അന്വേഷണ ഉദ്യോഗസ്ഥര്‍ ഇന്ന് യോഗം ചേരുന്നുണ്ട്. യോഗത്തില്‍ നിലവിലെ അന്വേഷണ പുരോഗതിയെ കുറിച്ചും വിലയിരുത്തലുണ്ടാകും.

ആക്രമണം നേരിട്ട യുവനടിമാരുടെ പരാതിയുടെ അടിസ്ഥാനത്തില്‍ കണ്ടാല്‍ അറിയാവുന്ന രണ്ട് പേര്‍ക്ക് എതിരെയാണ് പൊലീസ് കേസെടുത്തിരിക്കുന്നത്. ഒരു പരിപാടിയ്ക്കിടെ നടന്ന സംഭവമാണെങ്കിലും പൊലീസ് വ്യത്യസ്ത കേസാണ് രജിസ്റ്റര്‍ ചെയ്തിരിക്കുന്നത്. കോഴിക്കോട് പന്തീരങ്കാവ് പൊലീസ് ആണ് കേസെടുത്തിരിക്കുന്നത്.

അതിക്രമത്തിന് ഇരയായ നടിമാരില്‍ ഒരാള്‍ ദുരനുഭവം സോഷ്യല്‍ മീഡിയയിലൂടെ പങ്കുവെച്ചതോടെയാണ് സംഭവം പുറത്തറിയുന്നത്. തന്റെ കൂടെയുണ്ടായിരുന്ന മറ്റൊരു നടിക്കും ഇതേ അനുഭവം ഉണ്ടായി എന്നും അവര്‍ ഉടന്‍ തന്നെ പ്രതികരിച്ചു എന്നും തനിക്ക് പ്രതികരിക്കാന്‍ സാധിച്ചില്ല എന്നുമായിരുന്നു നടി സോഷ്യല്‍ മീഡിയ പോസ്റ്റില്‍ പറഞ്ഞത്.

കോഴിക്കോട് പാലാഴിയിലെ സ്വകാര്യ മാളില്‍ നടന്ന പരിപാടിയില്‍ നിരവധി പേരാണ് എത്തിയിരുന്നത്. നേരത്തെ ഇവിടെ മറ്റൊരു സിനിമയുടെ പ്രൊമോഷനായി ടോവിനോ തോമസ് വന്നപ്പോള്‍ വലിയ ഗതാഗത കുരുക്കാണ് ഉണ്ടായിരുന്നത്. തൊണ്ടയാട്-രാമനാട്ടുകര ബൈപ്പാസില്‍ ആണ് മാള്‍ സ്ഥിതി ചെയ്യുന്നത്. അതേസമയം പ്രൊമോഷന്‍ പരിപാടിക്കിടെ സുരക്ഷ വീഴ്ച ഉണ്ടായോ എന്നും പൊലീസ് പരിശോധിക്കുന്നുണ്ട്.

English summary

saturday night movie actresses case update: the accused could not be found