ഭക്ഷ്യ വിഷബാധ: കര്ശന നടപടിക്ക് ആരോഗ്യമന്ത്രിയുടെ നിര്ദ്ദേശം, സംസ്ഥാന വ്യാപകമായി പരിശോധന
തിരുവനന്തപുരം: കാസര്ഗോഡ് ഷവര്മ കഴിച്ച് ഭക്ഷ്യ വിഷബാധയേറ്റ് വിദ്യാര്ത്ഥിനി മരണമടയുകയും നിരവധിപേര്ക്ക് അസുഖം ബാധിച്ചതുമായ സംഭവത്തില് അന്വേഷിച്ച് റിപ്പോര്ട്ട് നല്കാന് ആരോഗ്യ വകുപ്പ് മന്ത്രി വീണാ ജോര്ജ് ഭക്ഷ്യസുരക്ഷാ കമ്മീഷണര്ക്ക് നിര്ദേശം നല്കി.
ഭക്ഷ്യ വിഷബാധയേറ്റവര്ക്ക് വിദഗ്ധ ചികിത്സ ഉറപ്പാക്കാന് ജില്ലാ മെഡിക്കല് ഓഫീസര്ക്ക് നിര്ദേശം നല്കി. അവധി ദിവസമാണെങ്കിലും മതിയായ ക്രമീകരണങ്ങളൊരുക്കാനും നിര്ദേശം നല്കി. അന്വേഷണത്തിന്റെ അടിസ്ഥാനത്തില് സ്ഥാപനത്തിനെതിരെ കര്ശന നടപടി സ്വീകരിക്കുമെന്ന് മന്ത്രി വ്യക്തമാക്കി.
അതേസമയം, ഭക്ഷ്യ വിഷബാധയേറ്റ് വിദ്യാര്ത്ഥിനി മരണപ്പെട്ട പശ്ചാത്തലത്തില് സംസ്ഥാന വ്യാപകമായി പരിശോധന നടത്തുമെന്ന് മന്ത്രി എം വി ഗോവിന്ദന് അറിയിച്ചു. നിയമം ലംഘിച്ചുകൊണ്ടു ഭക്ഷ്യവില്പന നേരത്തെയും ഉണ്ടായിരുന്നു. ഇതിനെതിരെ കര്ശന നടപടി സ്വീകരിക്കുമെന്നും മന്ത്രി വ്യക്തമാക്കി.
ഷവര്മ്മ വില്പ്പന നടത്തിയ ഐഡിയല് ഫുഡ് പോയിന്റ് എന്ന സ്ഥാപനത്തിന് ലൈസന്സില്ലെന്ന് ഭക്ഷ്യസുരക്ഷ വകുപ്പ് അറിയിച്ചു. സംഭവത്തെ തുടര്ന്ന് കൂള്ബാര് പൂട്ടി സീല് ചെയ്തു. പ്രദേശത്തെ മറ്റ് കടകളിലും പരിശോധന നടത്തുമെന്ന് ഭക്ഷ്യ സുരക്ഷ വകുപ്പ് അറിയിച്ചു.
അതേസമയം, ചെറുവത്തൂരില് ഭക്ഷ്യ വിഷബാധയെ തുടര്ന്ന് വിദ്യാര്ത്ഥി മരിക്കുകയും 31 പേരെ ആശുപത്രിയില് പ്രവേശിപ്പിക്കുകയും ചെയ്ത സാഹചര്യത്തില് പൊതുജനങ്ങള് ജാഗ്രത പാലിക്കണമെന്ന് ജില്ലാ മെഡിക്കല് ഓഫീസര് (ആരോഗ്യം) ഡോ. എ വി രാംദാസ് അറിയിച്ചു.
ചെറുവത്തൂര് ബസ് സ്റ്റാന്റില് ഐഡിയല് കൂള് ബാറില് നിന്ന് കഴിഞ്ഞ രണ്ടു ദിവസത്തിനകം ആഹാരം കഴിച്ചവരില് ആരെങ്കിലും ദേഹാസ്വാസ്ഥ്യം പ്രകടിപ്പിക്കുന്നുണ്ടെങ്കില് തൊട്ടടുത്ത ആരോഗ്യ കേന്ദ്രത്തില് ചികിത്സ തേടണമെന്നും അദ്ദേഹം അറിയിച്ചു.
ഭക്ഷണത്തില് കലരുന്ന രാസവസ്തുക്കള് മൂലമോ ഭക്ഷണം പഴകുന്നതു മൂലമോ ഭക്ഷ്യവിഷബാധ സംഭവിക്കാമെന്നും ഭക്ഷണം പാകം ചെയ്യുമ്പോഴും സൂക്ഷിച്ചു വെക്കുമ്പോഴും സംഭവിക്കുന്ന അശ്രദ്ധയാണ് ഭക്ഷണത്തെ വിഷമയമാക്കി അണുബാധയ്ക്ക് കാരണമാകുന്നത്. വൃത്തിഹീനമായ സാഹചര്യത്തില് പാകം ചെയ്യുന്നതോ ഇറച്ചി സൂക്ഷിച്ചു വെച്ചു പിന്നീട് പാകം ചെയ്യുന്നതും ആയ ഷവര്മ, ബര്ഗര് പോലുള്ള ഹോട്ടല് ഭക്ഷണം, തിളപ്പിക്കാതെ വിതരണം ചെയ്യുന്ന വെള്ളം, പൊതുചടങ്ങുകളില് വിതരണം ചെയ്യുന്ന ഭക്ഷണം എന്നിവ വഴിയാണ് സാധാരണ ഭക്ഷ്യ വിഷബാധയുണ്ടാകുന്നത്.
വീട്ടിലുണ്ടാക്കുന്ന സൂക്ഷിച്ചു വെച്ചു പിന്നീട് ഉപയോഗിക്കുന്ന ഭക്ഷണം വഴിയും ഭക്ഷ്യവിഷബാധ ഉണ്ടാകാറുണ്ട്. പൊടിപടലങ്ങളില് നിന്നും മലിന ജലത്തില് നിന്നുമൊക്കെ ബാക്ടീരിയ ഭക്ഷണത്തില് കലരാനുള്ള സാധ്യതയും ഏറെയാണെന്ന് അദ്ദേഹം വ്യക്തമാക്കി.
Click it and Unblock the Notifications
Sign in with Google